Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 10-1

ابیات باہو 10-1

سلطان باہو
February 9th, 2008
5 / 5 (1 Votes)

(1)
آپ نہ طالب ہین کہیں دے لوکاں طالب کر دے ہُو
چاون کھیپاں کر دے سیپاں قہر توں ناہیں ڈر دے ہُو
عِشق مجازی تِلکن بازی پیر اولّے دھر دے ہُو
اوہ شرمندے ہوسن باہو اندر روز حشر دے ہو



اوکھے لفظاں دے معنے

طالب=مُرید،بیعت ہوون والا۔ربانے راہ دا چاہوان۔
کسے دا صحیح معنیاں وچ لوڑوند (طالب کر دے دا فاعل ناقص مرشد اے)
کہیں دے=کسے دے وی
چاون =اُٹھاون۔فصل بنے دی پیداوار چک کے لے جاون
کھیپ=پیلی بنے دی ساری فصل۔کُل اناج جو بوریاں وچ بھریا ہووے زمین دا کُل
حاصل۔
سیپ=پنڈ دے کمیاں دا ساؤ لوکاں دے کم کاج کرن دا ورھے دا معاہدہ
ترکھان سارا سال کسے زمیندار دا ترکھانا کم کریسی۔سال دے اخیر تے پکی فصل وچوں
مقررہ دانے مِن یا تول کے ترکھان نوں دتے جاسن۔ترکھان تے زمیندار دونویں اک
دوجے دے سیپی اکھواندے نیں۔ایسے طرح ای جھوٹھے فراڈی پیر سیپ کر رہے نیں
تے سالانہ اُگراہی واسطے آجاندے ہن
عشق مجازی=فانی چیزاں دا عشق
تلکن بازی= جس کھیڈ وچ پیر تھڑکن تے کُراہے پین دا ہر ویلے ڈر ہووے
اولّے= بھیڑے ول دے۔بُرے طور طریقے دے
قہر= خدا دا غضب/ غصہ
اوہ = جعلی تے لوبھی لالچی پیر
روز حشر= قیامت دا دیہاڑا



(2)
ادھی لعنت دُنیا تائیں ساری دُنیا داراں ہُو
راہ صاحب دے خرچ نہ کیتی لین غضب دیاں ماراں ہُو
پیواں کولوں پُتر کوھاوے پھِٹ دنیا مکاراں ہُو
دُنیا ترک کیتی جنھ باہو لیسَن باغ بہاراں ہُو



اوکھے لفظاں دے معنے
دنیا= (1)خدا توں غافل ہوون دی حالت
(2) جیون وچ ادنیٰ گھٹیا قدراں نوں مُکھ رکھن دا نظریہ (3)نفس تَن دے سُکھ تے پالنا
لئی جمع کیتا گیا مال اسباب ٹ ک 93
دنیا دار=دنیا نوں مُکھ رکھن والے لوک۔ دین دیاں اعلیٰ قدراں توں وانجے لوگ
صاحِب=مالک/ آقا (اللہ تعالیٰ)
لَیسن= لین گے
غضب دیاں ماراں= پییاں سخت سزاواں
پیواں کولوں پُتر= ٹ/ک شہنشاہ جہانگیر نے اپنے پُتر شہزادہ خرم نال کیہ سلوک
کیتا
پُتر= ایس دا اُچارن ت اُتے شد دے بغیر اے
پھِٹ= لعنت
مکّاراں= (و۔ش)مکارہ،مکر کرن والی تریمت۔مکار رن پھپھے کُٹن
ٹ ک اکھان=مائی مکاراں۔بھیڑ کریں آپے تے ناں لاویں یاراں' ٹ ک اعوان کاری
ص 390 بادشاہ مکاراں سَدا گھینا
ترک کرنا=تعلق واسطہ چھڈ دینا۔اٹنک ہو کے پرانہہ بہ جانا۔ دنیادی ورتن ویہار چھڈ
دنیا دنیاوی حرص لالچ لگ لیڑ چھڈ دینا
لیسن باغ بہاراں۔ٹ /ک م2/25
اَنَّ لَھُم جَنّٰتِِ تَجّرِی مِن تَحتِھَاالانھٰرُ
نوٹ= جنتی لوگ اپنے رب دا دید وی کرلیسن

 

 (3)
ازل ابد نوں سہی کیتو سے ویکھ تماشے گُزرے ہُو
چوداں طبق دِلیں دے اندر آتش لائے حجرے ہُو
جنہاں حق نہ حَاصل کیتا دوہیں جہانیں اُجڑے ہُو
غرق ہوئے وچ وحدت باہو ویکھ تِنہاں دے مُجرے ہُو



اوکھے لفظاں دے معنے

ازل =کائنات دے مُڈھ بھجن دا ویلا' جیہڑا مِتھیا نہیں جاسکدا
ابد=کائنات دا ہمیش اِنت رہت ویلا جدوں تائیں کائنات رہسی
سہی کیتوسے=اَساں سمجھ پچھان لیا اے۔ٹ /ک ہ۔و۔گھٹ بہیں چرائی توں ماہیاں
دی سہی کیتا ای کراڑ میاں۔ھ۔وبند نمبر 101 سہی کرن(سندھی)= سمجھ لینا پچھان لینا معلوم کر لینا
ویکھ تماشے گزرے=انسان دے ھڈیں جو واقعات بیتے نیں۔
تماشے گُزرے=کائنات تے انسان دے سرواپرے واقعات، اُجرے=اُجڑے
اوہناں نوں مُکھ رکھ کے میں ازل تے ابد توں پچھان لیا اے۔
چوداں طبق=سَت پاتالاں تے ست آکاشاں دے پردیاں اندر جو کجھ وی ہے۔
حُجرے آتش لاون=حجرے وچ رہنا چھڈ دین۔ حجرے دے چھِلے اعتکاف دی پروا نہ کرن
حجرہ= مسیت وچ بنی وکھری کوٹھڑی۔عبادے لئی بنیا وکھرا کمرہ۔خلقت کولوں پرے دو ریڈا
رہن لئی الگ کمرہ۔خلوت خانہ
لاہی= اُتاری ٹ/ک' ایس دیس توں قادرا اگ لاہیں(ہ۔و)
(لائے دی تھاں تے لاہی دے امکان تے وی غور ہو سکدا اے)
حق= حقیقت /سچائی(
Ultimate Truth)
وحدت وچ فرق ہونا=ماسواء اللہ دا قائل ہونا۔ صرف خدا دے ای وجوددا قائل ہونا
عاشق غرق= بیڑے وحدت وچ ڈب گئے نیں اونہاں دے مجرے ویکھو
مُجرا=ادب نال سلام کرن لئی پیش ہوون دا انداز۔ناچیاں دا اپنا فن دکھا کے سلام
کرن دا انداز۔ٹ۔ک ۔ہ۔و۔ بند 365


(4)
اکھیں سُرخ مُنہے تے زردی ہر وَلّوں دل باہیں ہُو!
مُنہا مُہاڑ خوشبوئی والا پُہنتا وَنج کدائیں ہُو !
عشق مُشک نہ چھپے رہندے ظاہر تھین اتھائیں ہُو
نام فقیر تنہاں دا باہُو جِنھ لا مکانی جائیں ہُو



اوکھے لفظاں دے معنے

اکھیں سُرخ=عشق وچ رو رو کے۔ٹ/ک'
عاشقاں راسہ نشانی اے پسر
رنگ زردو آہ سرد وچشم تر
ول=طرف،پاسا
ہر ولوں =ہر پاسے ولوں ایتھے ہر دی تھاں مہر ہوون دا امکان جاپدا اے جیہڑا
فارسی شاعری وچ عِشق دی تھاں ورتیندا اے
ٹ/ک=بسیار خوباں دیدہ ام' مہریتاں ور زیدہ ام
مہر(ف)1۔سورج 2 محبت 3 مہر مجسم محبوب 4 محبوب ولوں ہمدردی دا رویہ
دل ھائیں=ولوں ہائیں اُٹھدیاں نیں
مُنہا مہاڑ= رجحان۔میلان۔اُلیر۔رغبت
خوشبوئی والا= جیہڑا پہلاں نرا خوشبو لین توں شروع ہویا سی
کدائیں ونج پُنہنا ہے=کِتھے جا اپڑیا اے )ٹ ک)(ولے افتاد مُشکلہا)
عشق مُشک=عاشق کولوں کوئی اجیہی حرکت ضرور ہوجاندی اے جنھوں اوھدا عاشق
ہونا ظاہر ہو جاندا اے۔
مُشک=کستوری۔کستوری اپنی واشا پاروں ڈھکی چُھپی نہیں رہ سکدی
کستورے ہرن دی دُھنی وچوں جیہڑی رَت سمدی رہندی اے۔اوہواِکٹھی ہو کے
سُک کے مشک نافہ بن جاندی اے۔کستُورا ہرن اپنی ایس خوشبو دی بھال وچ لگا پھردا
اے۔
اُتھائیں=اوسے تھاں تے ای۔فوراََ۔(2)اوس تھاں تے
لامکانی=لامکان وچ۔ٹ ک95'جائیں=تھاواں۔مقام
جاہیں= جمع جاہ۔مرتبے۔رتبے


(5)
الف۔ اَحد جد دِتی وِکھالی از خود ہویا فانی ہُو
قُرب وصال مقام نہ منزل نہ اُتھ جسم نہ جانی ہُو
نہ اوتھ عشق محبت کائی نہ اُتھ کون مکانی ہُو
عَینوں عین تھیوسے باہو سِر وحدت سُبحانی ہُو



اوکھے لفظاں دے معنے

احد=اک ' پہلا' اپنے گناں پاروںنویکلا ۔بے مثال
ایہہ صفت اللہ دی ذات واسطے ورتیندی اے
وکھالی دتّی=مینوں اپنا جلوہ وکھایا'
ازخود= اپنے آپ توں۔ آپ
فانی ہونا=مٹ جانا۔ہوند وچ نہ رہنا،ناس ہو جانا
قُرب=نیڑتا
وصال= ملاپ
مقام=ڈیرا لان دی تھاں/منزل= پڑاں۔اُتارا کرن دی تھاں۔احد دے وکھالی دین
مگروں بندہ آپے ای فنا ہو گیا تے صرف اِکّو سچائی باقی رہ گئی
اُتھ=وہاں۔اوتھے
جانی=جان
عینوں عین تھیونا=اِک مِک ہو جانا۔خدا تے بندے دا بھیت مُک جانا۔اک دوجے
نوں دیکھ لینا
کون مکان=کائنات دی ہر شے تے تھاں
کون=عالم دا وجود' ہر اوہ شے جیہڑی اپنی صورت وٹاندی رہے
سر وحدت سبحانی=اللہ پاک دا بھیت
وحدت=ایکتا۔یکتائی


(6)
الف۔ الست سُنیا دل میری قالُوابَلیٰ کُوکیندی ہُو
حُب وَطن دی غالب ہوئی ہک پَل سَون نہ دیندی ہُو
قہر پَوے تینوں رہزن دُنیا حق دا راہ مریندی ہُو
عاشقاں مُول قبول نہ باہو توڑے زار رویندی ہُو



اوکھے لفظاں دے معنے

قَالُوابَلیٰ= رُوحاں آکھیا ہاں ٹ ک/ق م7/172
کُو کیندی= میری دل (روح) ہمیشہ توں کُوک کے قالُو ابلیٰ دا اعلان کر رہی اے (دل
نوں مونث ورتن دا رواج عام سی) ایسے کلام وچ ہور مثالاں وی ملن گئیاں
حب وطن=جتھوں میری روح آئی اے اوسے وطن دی محبت پاروں اوہدے دل
واپس مُڑن لئی ترس رہی اے
ٹرک=حُبَّ الوَطَنِ مِنَ الایِمَانِ
غالب ہوئی =غلبہ پایا۔خیالاں تے قبضہ کیتا
رَہزن=راہیاں پاندھیاں نوں رستے وچ ڈک کے لُٹن والی
راہ مارنا=رَستے وچ لُٹنا/راہ ڈکنا' لنگھن نہ دینا
قہر پوے=خدائی غضب عذاب پوے
توڑے=بھاوَیں
زار رویندی=عاشقاں اگے رو دھو کے۔ترس جوگ حالت بنا کے اوہناں دا دھیان اپنے
ول کر لیندی اے
نوٹ=حضرت سُلطان باہو ہوراں دے علاقے وچ روندی دی تھاں رویندی۔کُوکدی
دی تھاں کُوکیندی۔مردی دی تھاں مریندی ورتیا جاندا اے


(7)
الف۔اللہ چنبے دی بوٹی من وچ مرشد لاندا ہُو
جس گت اُتّے سوہنا راضی اوہو گت سکھاندا ہُو
ہر دم یار رکھے ہر ویلے سوہنا اُٹھدا بہندا ہُو
آپ سمجھ سمجھیندا باہو ۔ ''آپ'' آپے بن جاندا ہُو



اوکھے لفظاں دے معنے

''ساڈاچڑیاں دا چنبا وے بابل اساں اڈ جانا وچ چڑیاں دے پیراں دا پنجا مراد اے۔
بُوٹی=پودا
من=دل
مُرشد= شیخ۔پیر،پیشوا۔جس دی بیعت مُرید کردا اے ھدایت دین والی ہستی۔صراط
مستقیم ول پریرن تے اگوائی کرن والی ہستی
گت=چال۔حرکت / سوہنا=ابنھے:مراد اللہ تعالیٰ اے
سوہنا=مُرشد پاک
ہر دم یاد رکھے=مُرشد مرید نوں ہر ویلے اپنی نگاہ تے چیتے وچ رکھدا اے تے مُرید وی
تربیت واسطے ہر اوکڑ ویلے اوہدے خیال توں سدھے راہے پاکے اگوائی کردیندا اے
تے کُرا ہے نہیں پین دیندا
اُٹھدا بہندا=ہر کم کردیاں/ہر ویلے
سمجھ=عقل۔ سیانپ
سمجھیندا=سمجھاندا
''آپ''=ایہدا مطلب تہانوں آپے بوجھنا پوسی۔
چنبا=چنبیلی دا پھل
(2)اِسم ذات(اللہ) دی خوشبو
(3)پنجا=چنبیلی دے پھل دیاں پتیاں دی شکل انسانی ہتھ دے پنجے ورگی ہوندی ا


(
8)
الف۔ اللہ چنبے دی بُوٹی من وچ مُرشد لائی ہُو
نفی اثبات دا پانی مِلیُس ہر رَگے ہرجائی ہُو
اندر بُوٹی مُشک مچایا جاں پھُلاں پر آئی ہُو
چِر جُُگ جیوے مُرشد باہو جیں بُوٹی من لائی ہُو



اوکھے لفظاں دے معنے

چنبا=ٹ ۔ک بیت7
نفی =لاَ اِلہٰ آکھنا تے ایہدے اُتے اپنی کھلوت رکھنا
اثبات=الاَّ اللہ آکھنا تے اوہدے اُتے عمل کرنا
ٹ ک چو گویم مسلمانم ہلرزم کہ وانم مُشکلات لاَ اِلہٰ را سارا کلمہ طیبہ پڑھن تے اوہدے
اُتے عمل کرن وچ ای نفی اثبات دا عمل شامل اے
مِلیُس= اوہنوں پانی ملیا سی۔چنبے دی بوٹی دی پرورش نفی اثبات دے عمل نال ہوئی
ہر رَگے= بوٹی دے ہر رگ ریشے تائیں پانی اپڑیا
رگ=پھُل یا پتی دا ریشہ
ہرجائی=بُوٹی دی تھان تے
اندر=بندے دے من دے اندر
مُشک مچایا= خوشبو کھنڈا دتی
پھلاں پر=جدوں بوٹی نوں پھل لگے تے سَالک دی ذات اُتے نفی اثبات دا اثر ہویا۔
کلمے دی مہک تے مست ہویا تے غیر اللہ ولوں منہ موڑ گیا۔
چِر جُگ= جگاں تائیں۔جُگ چارنیں۔ست جُگ1,728000سالاں دا،تریتا جُگ
1,296000 سالاں دواپُرجُگ86400 سالاں دا تے کل جُگ432,000 سالاں دا اے۔
جِیوے=اللہ کر کے جیوندا رہے۔
اَبیاتِ سُلطان باہو



(9)
الف اللہ جاں سہی کیتو سے چمکیا عشق اگوہاں ہُو
راتیں وِینہاں تا تکھیرے کرے اگوہاں سُونہاں ہُو
اندر بھاہیں اندر بالن اندر دے وچ دُھوہاں ہُو
شاہ رگ تھیں رب نیڑے باہو عشق کیتو سے سُونہا ہُو



اوکھے لفظاں دے معنے

سہی کرنا: ٹ/ک ثابت کرنا۔وجود وچ لیاونا پروان کرنا۔کسے شے نوں قیاسی دی
تھاں حقیقی سمجھ کے ایمان لے آونا۔پچھان لیتا
کیتو سے: اساں کیتا
اگوہاں:اگلے پاسے دا۔اگے لے جان والا۔اگیرے ودھان والا
دیہاں: دن نوں
اگوھاں سُونہا: پہلے ےوں ای سادوھان۔اگے دا جانو
تائ: تپا۔سیک۔سیک
تکھیرے: چوکھے تِکھے۔ہور وی تِکھے
سُونہہ: خبر۔اطلاع
سُونہا: راہبر۔باخبر۔قائد۔رستے توں واقف۔بھیتی۔سُونہہ رکھن والا۔مُخبر۔جاسوس
بھاہیں:اگاں
دُھوہاں: دل دی بھڑاس
شوہ۔مالک ۔محبوب
لدھیو سے۔سانوں لبھا۔اساں پا لیا اے



(10)
اللہ پڑھیوں حافظ ہویوں نہ گیا حجابوں پردہ ہُو
پڑھ پڑھ عالم فاضل ہویوں بھی' طالب ہویوں زَر دا ہُو
سَے ہزار کتاباں پڑھیاں' ظالم نفس نہ مَردا ہُو
باجھ فقیراں کسے نہ ماریا باہو چور اندر دا ہُو


اوکھے لفظاں دے معنے

اللہ پڑھائیوں: تینوں خدا نے ای علم سکھن دی توفیق دتی اے
حافظ ہویوں: قرآن مجید کیتوئی
حجابوں پردہ: حجاب دا پردہ۔حجاب دی وجہ توں پردہ
حِجاب: کسے حق وچ توں سمجھن تے اپناون وچ روک۔آڑ۔ہراوہ شِے حِجاب اے جیہڑی بندے تے خدا وچ ڈکا پائی بیٹھی اے
طالب:ریجھوان۔لوڑوند ٹ/ک بیت نمبر1
زر: دنیا دی دولت مایا۔ جگ دے پدارتھ۔سرمایہ
سَے: کئی سیکڑے
نفس:وچلا نفس امارہ۔بھیڑے کماں دی چاہت دا جذبہ۔ جیہڑا منکھ نوں تُنب کے اپنے اڈے لائی رکھدا اے۔ حیوانی۔ شہوانی خیالاں داغلبہ
اندر دا چور: نفس امارہ


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels