Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 20-11

ابیات باہو 20-11

سلطان باہو
February 8th, 2008
5 / 5 (4 Votes)

 (11)
اندر بھی ہُو باہر بھی ہُو باہُو کِتھاں لبِھیُوے ہُو
سئے ریاضتاں کر کراہاں خُون جگر دا پیوے ہُو
لکھ ہزار کتاباں پڑھ کے دانشمند سَدیوے ہُو
نام فقیر تہیں دا باہُو قبر جنہاں دی جِیوے ہُو



 

اوکھے لفظاں دے معنے:

ھُو:ٹ ک لا معبود اِلاّ ھُو۔ھو :اوہ۔رب دی ذات اللہ دا اِسم ذات۔رب دا ناں
کِتھاں: کِتھے
باہُو کِتھاں۔۔!باہُو آپ کدھرے نظر نہیں آوندا حضرت سلطان صاحب نے اپنے
وجود دی نفی کر دتی اے
سئے:کئی سیکڑے
ریاضت:تپ۔تپسیا۔نفس دی پاکیزگی تے اخلاق نوں سوارن مِلکوتی گُن حاصل کرن
لئی کیتی گئی محنت مشقت۔مجاھدہ
کرکراہاں: کر کر کے.
خون جگر:سچے جذبے نال محبت کرے
دانشمند:سیانا۔حکیم۔عقلمند
سدیوے: لوکاں کولوں اکھوائے۔ریا کاری نال اعلیٰ خطاب حاصل کر لوے
تِہیں:اوہناں
قبر جیونا: ولی اللہ دے مزار توں رجوع کرن والے لوکاں دا اوسے طرح فیض حاصل
کرنا جس طرح اوہ مزار والے کولوں اوہناں دی حیاتی وچ کر دے سن


(12)
اندر کلمہ قُل قُل کردا عِشق سِکھایا کلمہ ہُو
چوداں طبق کلمے دے اندر قرآن کِتاباں عَلماں ہُو
کانے کَپ کے قلم بناون لِکھ نہ سَکن قَلماں ہُو
کلمہ پِیر پڑھایا باہُو ذرا نہ رہیاں اَلماں ہُو


اوکھے لفظاں دے معنے

اندر: بندے دے من وچ
قُل قُل: کہ دے،آکھ دے۔اے بندیا کلمے دی سچائی دا اعلان کیوں نہیں کردا
چوداں طبق:ٹ ک بیت نمبر3
عَلم:جھنڈا (ہر عَلم اک مکتبِ فکر دی نمائندگی کردا اے)
کانا:سرکنڈے دے بوٹے وچوں نکلیا لما باریک سوٹا جیہا جہدی قلم بندی اے
(قلم بناون دا فاعل عام لوک نیں جیہڑے کانے کَپ کے قلم بنا لیندے نیں پراوہ قلماں
چنگی طرحاں نہیں لکھ سکدیاں جِنا چِر اوہناں دے قط دے قط دے عین وچکار عشق دا چِیر نہ پایا
جاوے)
(آکھدے نیں پہلی دفعہ کلمہ شریف لکھن نال قلم دا جگر پاٹ گیا سی)
کلمہ:گل بات۔اک بامعنی لفظ۔کلمہ طیبہ
الماں:غم۔فکر۔اندیشہ


(13)
اندر وچ نماز اساڈی بِکسے جاء نَتِیؤے ہُو
نال قیام رکُوع سجُودے کر تکرار پڑھیؤے ہُو
ایہہ دِل ہِجر فراقوں سَڑیا ایہہ دَم مرے نہ جیوے ہُو
راہ محمد والا باہُو جَیں وچ رب لَبِھیؤے ہُو



اوکھے لفظاں دے معنے

اندر: دِل۔باطن
بِکسے جا:اکو ای تھاں تے
نتیوے:نیتی جاندی اے
قیام:نماز وچ بالکل سِدَھے کھلوون دی حالت
رکوع:نماز وچ گوڈیاں تے ہَتھ رکھ کے سامنے جھُکن دی حالت
سجود:نماز وچ سجدہ دین دی حالت
تکرار کرنا: نماز دا گھڑی مُڑی پڑھیا جانا۔نماز دا کئی وار پڑھیا جانا
ہِجر:وچھوڑا
فراق:جُدائی
دم:(1)حیاتی/روح (2) انسانی زندگی دا اک ساہ(3) اک ساہ لین دا سماں۔اک پل
مَرے نہ جِیوے:اَمر ہو چکا ہے مَرن جِیون دی قیدوں آزاد ہو کے نَروان حاصل کر چکا اے
جیس وچ: جہدے تے ٹُریاں


(14)
اندر ہُو' تے باہر ہُو دَم ہُو دے نال جلیندا ہُو
ہُو دا داغ محبت والا ہر دَم پیا سڑیندا ہُو
جِتھے ہُو کرے رُشنائی چھوڑ اندھیرا ویندا ہُو
دوہیں جہاں غُلام اس باہُو جو ہُو سہی کریندا ہُو


اوکھے لفظاں دے معنے

ہُو:ٹ /ک بیت نمبر11
دَم: ٹ/ک بیت نمبر13
جلیندا:رہندا۔وَسدا:گُزربسر کردا' جِیون بھوگدا،ٹ /ک بیت نمبر102
سڑِیندا: مینوں فراق وچ پیاساڑ دا اے
وَیندا: ٹُر جاندا اے۔چَلا جاندا اے
سَہی کرنا: ٹ/ک بیت نمبر 9



(15)
اوجھڑ جھل تے مارُو بیلا جِتھے جالن آئی ہُو
جِس کدھی نوں ڈھا ہمیشہ اج ڈھٹھی کَل ڈھائی ہُو
نَیں جِنہاں دے وہے سرباندی سُکھ نہیں سوندے راہی ہُو
ریت تے پانی جتھے باہو بَنّھی نہیں بجھدی کائی ہُو


اوکھے لفظاں دے معنے

اوجھڑ: سَنگھنے کانہہ۔کانے سرکڑا جنّھوں لانگھا بہت ای مشکل ہووے ٹرک97-136
جَھل:بے ترتیبی نال اُگے ہوئے سنگھنے رُکھ
مارُو:جتھے بندے نوں جان دا خطرہ ہووے جِتھے سَپ سُور چیتے ہوون
بیلا: سَرکڑا۔کاہی تے سنگھنے رُکھاں نال بھریا جنگل
جالن آئی: جِتھے میں جیون بھوگن تے مجبور ہاں
کدھی:دریا دا کنڈھا۔انسانی حیاتی۔بندے دی عمر
اج ڈھٹھی:دریا دا کنڈھا کسے ویلے وی دریا وچ ڈگ سکدا اے اج نہیں تے
کل۔پر اوہدا ڈِگنا لازمی امر اے
نَیں:دریا ۔ندی
وہے: وگے
سرھاندی:سرہانے دے وا۔سرہانے والے پاسے
سُکھ: آرام۔چین۔آنند۔سکُون
راہی: مُسافر۔پاندھی
بَنھی:چھونا بند۔پانی دا ویہن ڈکن والی چھوٹی جیہی کندھ
پانی اگے ریت دی بَنھی بجھ ای نہیں سکدی


(16)
ایمان سلامت ہر کوئی مَنگے،عشق سلامت کوئی ہُو
ایمان منگن شرماون عِشقوں دل نوں غیرت ہوئی ہُو
عِشق پُجاوے جِس منزل ایمانے خبر نہ کوئی ہُو
عِشق سلامت رکھیں بَاہُو ایمانوں دیاں دھروہی ہُو


اوکھے لفظاں دے معنے

ایمان (اِمان پڑھو) شک شُبے کڈھ کے دِل دی تصدیق نال کسے دلیلوں بغیر من لین دا کم
اجیہے ایمان نوںہر ویلے تازہ رکھن دی لوڑ ہوندی اے۔تاں جو بندہ بے ایمان نہ تھی
ونجے
عِشق:محبت دی اُتلی پوڑی۔کسے دے حُسن تے خوبی نوں ویکھ کے اوہدے ول
مقناطیسی کھِچ نال ودھنا۔ہر ویلے دِل وچ اوسے بارے سوچنا۔اوسے لئی بے چین
رہنا۔اوہدے نیڑے رہن دی خواہش کرنا تے اوہدے توں وِچھڑن نال دُکھ پانا۔اوہنوں
مِلن ویکھن توں نہ رَجنا۔اوہدے خیال اوہدی رضا وچ ای اپنی رضا اپنی ہستی نوں
اوہدی ہستی وچ گُم کر دینا۔
غیرت:اَنکھ۔شرم
غیرت ہوئی۔دل نے شرم محسوس کیتی دِل نے جھوٹھیاں کیتا پئی لوگ فقرتے عشق
اِلٰہی توں شرماندے کیوں نیں۔
جس منزل نوں۔۔۔عشق دی انتہا۔رب دی نیڑتا۔تے رب ذوالجلال دا دیدار اے
عشق سلامت رکھیں۔عشق تے قدم قائم رکھیں۔عشق توں نہ ڈولیں
دھروئی:ظلم دے خلاف فریاد
دھروئی دینا: پناہ منگنا۔ظلم دی فریاد لئی رولا پانا


(17)
ایہہ تَن رب سچے دا حجرہ پا فقیرا جَھاتی ہُو
نہ کر مِنت خواج خضر دی اندر آب حَیاتی ہُو
شوق دا دِیوا بال اَنھیرے لبھی وَست کھڑاتی ہُو
مرن تھیں اَگے مر رہے باہُو جنہاں رَمز پچھاتی ہُو


اوکھے لفظاں دے معنے

تَن:جسم دیہی۔خاکی پتلا۔بُت
حُجرہ: ٹرک:بیت نمبر 3
جَھاتی پانا: اندر دا حال معلوم کرن لئی بڑے غور نال اک وار ویکھنا
مِنت کرنا:ترلا پانا۔ہاڑاکیتا۔احسان مند ہونا
خواج خضر: خواجہ خضر جنہاں سکندر نوں آبِ حیات دی دس پائی سی پر پھیر اوہنوں
دھوکا دے کے بھل بھلیاں وچ پادتا سی
اندر:مَن دِل۔اندرونہ۔ضمیر
self ٹ ک: اپنے من وچ ڈوب کر پا جا سراغِ زندگی'
آب حیاتی:اَمرت جَل۔سدیواں جیون دین والا پانی۔پیون والے نوں امرکردین والا
پانی حضرت خضر علیہ السلام ایہہ پانی پی کے امر ہو چکے نیں۔
لِبھی: تینوں لبھے' شوق:عشق' انھیرے: کنڈ ظلمات ٹ/ک 157
کَھڑاتی وست:گواچی چیز۔بندے تے رب دی سانجھ دی رمز
مَرن تھیں اگے:جنہاں لوکاں بندے تے رب دی سانجھ دی رمز پچھان لئی اے
اوہ مرن تو پہلاں ای مر گئے نیں (اوہ اپنے نفس نوں مار لیندے نیں)
رَمز:بھید۔گُجا اشارہ



(18)
ایہہ تَن رب سچے دا حجرا کِھڑیا باغ بہاراں ہُو
وِچے کُوزے وچ مُصلےّ سجدے دیاں ہزاراں ہُو
وِچے کعبہ وِچے قِبلہ اِلاَّ اللہ پُکاراں ہُو
کامل مُرشد مِلیا باہُو آپے لَیسی ساراں ہُو


اوکھے لفظاں دے معنے


تَن:ٹ ک نمبر 17
حُجرہ: ٹ ک بیت نمبر 3
کُوزے:وضو کرن لئی پانی دا کُجا
مُصلے:(صلواۃ توں بنیا اے) نماز پڑھن والا پاک کپڑا
سَار لینا:خبر لینا۔حال چال پُچھنا۔روگ دی کاری کرن


(19)
ایہہ تَن میرا چشماں ہو وے مُرشد ویکھ نہ رَجّاں ہُو
لُوں لُوں دے مُڈھ لَکھ لَکھ چشماں ہِک کھولاں ہِک کجاں ہُو
اِتئیاں ڈِٹھیاں صبر نہ آوے ہور کِتے وَل بھَجّاں ہُو
مُرشد دا دیدار ہے باہُو لکھ کروڑاں حجّاں ہُو


اوکھے لفظاں دے معنے


تَن:ٹ ک نمبر 17 ایہ تن:میرا سارا ای جسم
چَشماں: اکھاں،رَجنا: جی بھر جانا۔چاہت نہ رہ جانا
لُوں لُوں: ہر اِک لُوں۔رُواں رُواں۔دیہی دا چھوٹے توں چھوٹا انگ
کجنا: بندکرنا۔ڈھک دینا
کِتے ول:کسے پاسے
دیدار:زیارت
مُرشد دا دیدار: میرے لئی مُرشد دا دیدار لکھ کروڑاں حجاں دے برابر اے
(لکھ نوں جے گنتی وچوں کڈھ دئیے تے دوجا امکان ایہ ہے)
لَکھنا:ویکھنا۔نظارہ کرنا۔لَکھ: ویکھ نظارہ کر ایس صورت وچ معنے اِنج ہوون گے
مُرشد دا دیدار کر کے کروڑاں حجاں دا نظارہ کر لے''


(20)
ایہہ دُنیا رن حیض پلیتی ہر گز پاک نہ تھیوے ہُو
جَیں فقر گھر دُنیا ہووے لعنت تِس دے جِیوے ہُو
حُب دنیا دی رب تھِیں موڑے ویلے فِکر کچِیوے ہُو
سہ طلاق دنیا نوں باہُو جے کر سچ پُچھیوے ہُو


اوکھے لفظاں دے معنے


دنیا:ٹ ک2 رَن:عورت۔تریمت رَن حیض پلیتی: تریمت دے ''کپڑے''
فقر:(ایس تھاں تے فقیر) جگ وچ کسے شے دی ملکیت دا دعوی نہ کرن والا
''بعض کے نزدیک فقیر وہ ہے جو سوائے خدا کے کسی کا محتاج نہ ہو اور بعض کے
نزدیک وہ خدا کا محتاج نہیں رہتا کیوں کہ احتیاج صفت موجود ہے حالانکہ فقیر بحر ہستی میں
غوطے لگاتا ہے اور اپنی ہستی سے گزر جاتا ہے۔جب ہستی ہی نہ رہی احتیاج کیسی۔اسی
معنی میں کہا گیا ہے۔
جیس فقر گھر: بابا فرید جی نے بلبن بادشاہ نوں جاگیرداری دا پروانہ موڑ گھلیا' پر
سِکیاں دی تھیلی رکھنی پروان کر لئی'خواجہ بدر دین اسحاق نوں حکم ہویا جو اوہ سِکےّ لوکاں
وچ ونڈ دین خواجہ نے سِکےّ اِک وڈے تھال وچ پائے تے لوکاں نوں ونڈن لگ پئے
شام ہو گئی ہوئی سی۔جدوں لوڑوند نہ رہیا تاں اوہناں تھال وچ ہتھ مار کے ڈٹھا اِک سکہّ
بچ گیا سی اوہناں سویرے ونڈن لئی اپنی پگ وچ کُنج لیا۔عشاء نوںجدوں بابافرید جی
نماز دی اگوائی لئی کھلوتے تاں نیت نہ بجھے۔خواجہ نوں سَد کے سِکیاں بابت پُچھیا بچے
ہوئے سِکے دا پتہ لگا تاں فرمایا میں وی آکھاں جو نیت کیوں نہیں بَجھ رہی۔پھیر اوہ سکہّ
خواجہ توں لے کے دُور وگاماریا تے ساری رات توبہ کر دے رہے۔ٹ ک۔(جواہر
فریدی)
لعنت :پھٹکار
جِیوے:جیون تے
حُب:اک پاسڑ محبت،گُوڑھا پیار۔آپ پیار کرنا بھانویں دُوجا نہ کرے
ویلے:ویلے سر۔ٹھیک سمے تے،فکر:سوچنا۔اُپا کرناعقلی تصور نال اصلی مقصد وَل
ودھنا
سِہ:تن 3
کچِیوے:کیتا جانا چاہیدا اے
سِہ طلاق:منکوحہ بیوی توں ہر لحاظ نال جُدا ہو جانا۔اک دو طلاق تک دوبارہ صُلح ہو
کے پھیر وسیبا ہوسکدا اے۔پر تریجی طلاق مگروں بیوی شرعی طور تے طلاق دین والے
سابق شوہر دے گھر نہیں رہ سکدی۔اوہدے تے حرام ہوجاندی اے ٹ ک/
ق م (2) 2/229 اُکا مُکا الگ ہو جانا۔لاٹنگ ہو جانا۔
ہور ٹ ک:بزم صوفیہ صفحہ 348,325,319,283,260,246,214,82


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels