Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 60-51

ابیات باہو 60-51

سلطان باہو
February 5th, 2008


51
ثابت عشق تنہاں لدھا جہناں ترٹی چوڑ چا کیتی ہو
نہ اوہ صوفی نہ صافی نہ سجدہ کرن مسیتی ہو!
خالص نیل پرانے تے نہیں چڑھدا رنگ مجیٹھی ہو!
قاضی آن شرع ول باہو عشق نماز نہ نیتی ہو!


اوکھے لفظاں دے معنے

ثابت عشق :پورا نیہنہ
لدھا: لبھیا حاصل کر لیا
ترٹی چوڑ کرنا : ٹ ک 69
صافی: پرہیز گار-متقی-
صافی : بے ریا دل نوں غیر اللہ نوں صاف رکھن والا - رب دے سچے عاشق خلقت کولوں صوفی صافی تے نمازی پرہیز گار اکھواکے اپنے نفس نوں موٹا نہیں کر دے نام خماری پاروں اوہناں نوں
اجیہے لقب نہیں پوہندے
مجیٹھ: اک ول جس دی ڈنڈی وچون لال تے پکا رنگ نکل دا اے -
L RubiaCordifolia
کائیا رنگن جے تھیے پیارے پائیے ناؤ مجیٹھ
رنگن وال جے رنگے صاحب ایسا رنگ نہ ڈیٹھ
محلہ
I- راگ تلنگ (گرنتھ صاحب)
جھنڈا سیاہ سفیدی دی عشق والا اوہ گھٹ مجیٹھ غم لال کیتو - ہ-و نبد 465
ہیڑا ضلے مجیٹھ جہوں اوپر انگیاراں (بابا فرید) اندر رچے سچ رنگ جہو مجیٹھے لال:گ ص:(ملار کی وار گور وامر واس محلہ 3)
آن: مصدر آننا- لے آونا - لیانا
اینھے شرح تے شرع دوہاں لفظاں دا وکھرا وکھرا چس مانو
قاضی آن شرح۔۔۔۔= باہو قاضی صاحب نوں شرح صدر ول لے آ۔ اوہنے کدے عشق دی نماز نہیں نیتی جدوں اوہدا سینہ کھلے گا اوہنوں اللہ دی ہدایت آوے گی تاں کدھرے جاکے اوہ عشق دی نماز نیتے گا۔
شرح۔ شرح صدر۔ سینے دی کُھل ۔ اللہ تعالیٰ نے ہدایت دا دارومدار شرح صدر تے رکھیا اے۔
شرع۔ سدھا تے واضح راستہ
قاضی آن شرع ول۔۔۔= قاضی صاحب نوں سدھے تے واضح رستے ول لے آؤ اوہنے عشق نماز کدے نہیں نیتی یا قاضی نوں شرع ول لیا کے دسو پئی عشق نے کدے نماز نہیں نیتی کیوں جو نماز پڑھن والا تے جہدی نماز پڑھی جانی اے وحدت وچ اوہ دونویں اک نیں۔


(52)
جال جلیندیاں جنگل بھوندیاں ہکا گل نہ پکی ہو
چلے چلیہے حج گزاریاں دل دی دوڑ نہ ڈکی ہو
تریہے روزے پنج نماشاں ایہہ بھی پڑھ پڑھ تھکی ہو
سبھے مراداں حاصل باہونظر مہر دی تکی ہو


اوکھے لفظاں دے معنے

جال: 1-جہون دا ورتارا جیون گزارن دا ڈھنگ -ڈیرا-بسیرا-ٹ ک 162
ٹ ک= آئی روہاں جبلاں جال تیری
2=ون پیلو سا رکھ (
salvadora oleoides)فقیر لوک ون دےاں پیلو تے کریر تے ڈیلے کھاندے رہے نیں -تھئی آبادی (خواجہ فرید)
جیندیاں=جیون بیتاندیاں گزارا کر دیاں -جالدیاں
جنگل=پہلے زمانے وچ بستی آبادی چھڈ کے جنگل واسا کرن دا عام زکر ملدا اے
ہکا گل=ہک گل اتے پکی طرحاں عمل نہیں ہو دکیا- کلمہ طیبہ دے لا تے عمل نہیں ہو سکیا
چلے =ٹ ک44: چالیہ دن تائیں خوراک گھٹان تے عبادت ودھان دا عمل آخری دناں وچ
جواں دا اک دانہ روز دی خوراک بن جاندی اے جسمانی طاقت گھٹدی تے روحانی طاقت ودھدی اے
حج گزاریاں = جمع حج گزاری دی -ٹیکس گزاری کئی وار حج ادا کرن دا عمل ٹ ک 19
دل دی دوڑ=دل دی ایدھر اودھر دی دوڑ -حرص طمع ہود دی دوڑ
باہو=اینھے مراد مرشد کامل اے-
مہرو=مہربانی -کرم -ترس -پیار-ٹ ک
جہیڑے پیر دی مہر منظور ہوئے گھر تنہاں دے پیریاں میریاں نی ہ وبند4


53
ج -جاں ذات نہ تھیوے باہو تاں کم ذات سدیوے ہو
ذاتی نال صفاتی ناہیں تاں تاں حق لبھیوے ہو
اندر بھی ہو باہر بھی ہو باہو کتھ لبھیوے ہو
جیں اندر حب دنیا باہو مول فقیر نہ تھیوے ہو


اوکھے لفظاں دے معنے
جاں=جس ویلے تائیں
ذات نہ تھیوے=فنانی اللہ نہ ہو جائے
سدیوے=سدیا بلایا جاندا اے -لوک اوہنوں کم ذات آکھدے نیں
کم ذات=گھٹیا ذات سا -غیر
أ اصل توں اڈ کوئی وکھری شے
(مثال) گو ہے لکڑاں تھاپیاں جے اگ وچ دڑ کے اپنے آپ نوں فنا کر دیون تے اوہناں سبھناں دی ذات اگ ہو جاسی -اہتھوں تائیں کہ لوہادی اگ وچ پے کے لال سوہا ہو جاسی تے اوہدے اندر دی اگ دا رنگ تے دوجیاں صفتاں پیدا ہو جا سن جناں چر ایہہ چیزاں اگ اندر اپنے آپ نوں فنا نہیں کر دیندیاں ایہناں دا اپنا وکھر اناں لوہا لکڑ تھاپی گوہا (کم ذات ) ای پوباس تے نشانیاں اوہدے اندر پیدا ہو جا سن -تے اوہدی پہلی ہستی دیاں دادیاں نشانیاں ختم تھی ولیسن تے سمجھو اک مک ہو گئے فنا مکمل تھئی
جدوں بندے دے اندروں کم ذات والیاں داریاں صفتاں مک جاون تے سمجھو پاک صاف ہو گیا پھر حق لدھا دیسی
تاں تاں=اوس صورت وچ ای
ہو= اوہوای -رب
حب=ٹ-ک 20
دینا=ٹ ک = 2


54
جب لگ خودی کریں خود نفسوں تب لگ رب نہ پاویں ہو
شرط فنا نوں جانیں ناہیں نام فقیر رکھاویں ہو
موئے باجھ نہ سوہندی الفی ایویں گل وچ پاویں ہو
نام فقیر تد سوہندا باہو جیوندیاں مرجاویں ہو



اوکھے لفظاں دے معنے


جب لگ=جدوں تائیں
خودی کریں خود نفسوں :نفس شیطان مگر لگ کے اپنی وڈوں تے مان کریں گا یا تکبر غرور گھمنڈ کریں گا
تب لگ=اودون تائیں
شرگ فنانوں .....آپا مارن دیاں شرطاں نوں
فقیر=ٹ ک 22-20
نہ سوہندی= سوہنی نہیں لگدی ۔ بندی پھبدی تے سجدی نہیں
الفی=ٹ ک کفن 31
سوہندا =ٹ ک سوہندی
جیوندیاں مر جاویں ....: مو ـ'توا قبل اَن تَمو'تّموا تے عمل کریں


55
جتھے رتی عشق وکاوے مناں ایمان دویوے ہو
کتب کتاباں ورد وظیفے اوتر چا کچیوے ہو
باجھوں مرشد کجھ نہ حاصل راتیں جاگ پڑھیوے ہو
مرئیے مرن تھیں اگے باہو تاں رب حاصل تھیوے ہو


اوکھے لفظاں دے معنے

رتی=ٹ ک 25
وکاوے=وکاؤ ہووے مل لدا ہووے
مناں=کئی من
من=چالیہ دیر بھار دا وٹا
دویوے =ستا جاوے دے دینا چاہیدا اے (جتھے عشق دی اک رتی وکدی ہووے اوہنوں خریدن لئی کئی من ایمان اوہدے بدلے دینا پئے تے دے دینا چاہیدا اے )
کتب (کتب نہیں ) لکھتاں ۔ ہتھ دیاں لکھیاں ضروری یا دواشتان ۔ نوٹ بکاں
کتاباں : چھپیاں یا ان جھپیان مکمل پستکاں
اوتر=اپھل ۔ بے نتیجہ
اوتر چا کچیوے=اوتر کر دینیاں چاہیدیاں نیں ۔ فضول تے بے نتیجہ سمجھ کے ایہناں دی اہمیت توں انکاری ہو جانا چاہیدا اے تجے مصرعے وچ توڑے پا بھانویں دا مفہوم موجود اے


56
جد دا مرشد کاسہ دتڑا تد دی بے پروائی ہو
کیہ ہویا جے راتیں جاگے مرشد جاگ نہ لائی ہو
راتیں جاگیں کریں عبادت نندیا ڈینہ پرائی ہو
کوڑا تخت دنیا دا باہو فقر سچی بادشاہی ہو


اوکھے لفظاں دے معنے


کاسہ =پیالہ (گدا کرن منگ کے کھان دا امر۔ توکل دا سبق)
کیہ ہو یا =کجھ فائدہ نہیں ۔ ایہدی کوئی عبادت واسطے جاگدے رہے
جاگ لان= مرشد دا اپنے مرید دی کایا پلٹ دینا۔ ڈنگراں تے پاڑویشواں دیاں وادیاں چھڈوا کے
نند یا کرنا=چغلی غیبت کرنا ۔ گلہ کرنا ۔ لنڈ پچھے بریاپاں کرنا۔ کسے پارے نند وچار کرنا
پرائی= بیگانی۔ کسے دوجے بندے دی
کوڑا=جھوٹھا ۔ عارضی ۔ ہمیشہ قائم نہ رہن والا۔ سچے دا الٹ
فقر=ٹ ک 22
سچی=امر۔ لافانی ۔ لازوال ۔ خراج د ی گدا توں پاک


57
جس دل اسم اللہ دا چمکے عشق بھی کردا ہلے ہو
بھر کستوری چھپدے ناہیں دے رکھیے سے پلے ہو
انگلیں پچھے دینہ نہیں چھپدے دریا نہ رہندے ٹھلہے ہو
اسیں اوسے وچ اوہ اساں وچ باہو یار سولے ہو


اوکھے لفظاں دے معنے

بلہ کرنا=حملہ کرنا۔ ہے اللہ کرکے پئے جانا
بھر=بھار۔ کسے دیہتریا اوٹھ تے لدیا یا تھلے لاہیا ہو یا بوریاں چھٹان دی شکل وچ بوجھ
ٹ ک=پتھر کی بیڑی جے چڑھے بھر نال بڈاوے (بابا نانک)
پلے دے کے رکھنا: لکان واسطے کسے کپڑے نال کج کے رکھنا
انگلیں=انگلیاں
سینہ=سورج
ٹھہلے نہیں رہندے :روکیاں رکدے نہین۔ وگن توں ہیکے موڑے نہیں جا سکدے
سوتے=: بالکل ای نیڑے (س +ول ) سستے
(جیہڑے اصلون نیڑے ہووے اوہدا ملنا سوکھاتےسستا ہوندا اے )


58
جنگل دے وچ شیر م
ریلا باز پوے وچ گھر دے ہو
عشق جیہا صراف نہ کوئی کج نہ چھوڑے زر دے ہو
عاشقاں نیندر بھکھ نہ کائی عاشق مول نہ مردے ہو
عاشق جیندے تداں باہو جد صاحب اگے سردھر دے ہو


اوکھے لفظاں دے معنے

مریلا=تتل ۔ مارو۔ ٹ ک 80
(عشق سے دو نویں روپ دسے گئے جیویں جنگل دا شیر یا گھر سا پالیاباز سونویں اپنے شکار نوں معاف میں کردے۔)
صراف=صیرفی۔ پرکھن والا۔ کھرے کھوٹے دی پرکھ کرن والا
کج=ٹیڈھ۔ گھاٹ۔ کمی۔ کھوٹ سلا۔ وگاڑ ۔ نقص ۔ دوش
زر= سونا۔ سھن ۔ دولت
مول=ہرگز۔ باکل
تداں : تدے ای ۔ اوسے صورت وچ ای۔

59
جنہاں شوہ الف تھیں پایا پھول قرآن نہ پڑھدے ہو
مارن دم محبت والا دور ہویو نیں پردے ہو
دوزخ بہشت غلام تنہاں دے چاکیتونیں بردے ہو
قربان تنہاں دے باہو جہیڑے وحدت دے وچ وڑدے ہو


اوکھے لفظاں دے معنے

شوہ =حقیقی محبوب۔ حقیقت دا بھیت
الف= اسم ذات اللہ دا پہلا حرف۔ اللہ
مارن دم.....اوہ واقعی صیحح طور تے الہی محبت دا دعوی کردے نیں۔ اوہناں دے دل توں سارے حجاب (پردے) دور ہوگئے نین ۔۔۔۔۔ اجیہے لوکاں دے دوزخ تے بہشت دو وین غلام ای نہیں بنائے گئے سگون اوہنان دے بردے کیتے گئے نیں
ٹ ک۔ مَن لَہ المَوتَی فَلَہ الـکَل' جہدا مولا اے اوہدا ہر کوئی اے جدوں عارف تے سارے قرانی علماں دا چانن ہو جاندا اے۔ حقیقت پاکے ظاہری ورقے پھولن توں چھٹکارا پا جاندا اے
غلام=نوجوان ملازم۔ نوکر منڈا
بردہ=مل خریدیا غلام ۔ وکدے وکاندے غلام ۔ بانے ۔ ڈھک ۔ گولے
وحدت وچ دڑنا: وحدت دے دریا وچ غرق ہو جانا۔ خدا دی ہستی وچ فنا ہو جانا دوئی رور کر کے غیر دا وجود نہ مننا۔


60
جنہاں عشق حقیقی پایا مونہوں نہ کجھ الاون ہو
ذکر فکر وچ رہن ہمیشہ د م نوں قید لگاون ہو
نفسی قلبی روحی سری اخفی خفی کماون ہو
قربان تنہاں توں باہو جہیڑے اکس نگاہ جگاون ہو


اوکھے لفظاں دے معنے

الاونا =آواز کڈھنا ۔ کونا۔بولنا۔ ٹ ک 206,235
ذکر=سارے غیر اللہ نوں سل وچوں کڈھ کے اپنے آپ نوں رب دے حضور حاضری وچ سمجھن دی حالت پاون دا جتن کرنا ذکر اے۔ ایہدے وچ رب دی یاد لئی رب دا کوئی ناں۔ رب دی خوشنودی لئی کوئی کم۔ کلمہ۔ نماز قرآن پاک دی تلاوت۔ درود شریف یا کوئی دعا وسیلہ بن سکدی اے۔ اجیہے وسیلے طالب تے مطلوب وچ رابطہ پیدا کر دیندے نیں۔
فکر=عقلی تصور ولوں اصلی مقصود دل ودھنا مثال وجوں بندہ اپنی دیہی دے سارے انگاں دے کماں جسم دی بناوٹ تن تے من دے تعلق بارے سوچے انت وچ ایہ سوچ خالق دے ویہڑے واڑ دیندی اے۔ اوتھے بندہ حیرت وچ ڈب جاندا اے تے اپنی عاجزی دا اقرار کردا اے (ایس عاجز دے خیال موجب اوہدی ڈاچی دے کھرے دے مگر مگر جان نوں ای فکر آکھدے ہن۔)
دم نوں قید.....کئی واری فقیر حبس دم کردے نیں کجھ چرتائیں اپنے اندر داہ ڈک چھڈدے نیں ایس حالت وچ اوہ ہمیشہ ذکر تے فکر وچ ای رہندے نیں۔
کتاب تحفہ سعدیہ دے صفحہ 255تے نفسی قلبی-سری-خفی-اخفی سب ذکراں دا تذکرہ موجود اے-ایس لئی وزن تول پاروں کسے اک نوں وی مصرعے وچوں نہیں کڈھیا جا سکدا (صرف پڑھن دا طریقہ مناسب کرن دی لوڑ اے) سلسلہ قادریہ نقشبندیہ دے ذکر اذکار تے لطائف وچ ایہناں ساریاں لطیفیاں-لطافتاں دا ذکر اے-ذکراں دی مرتبے وار ترتیب انج اے۔
1- نفسی یا جلی 2- قلبی 3- روحی 4- سری5- خفی 6- اخفی
ٹ ک 148 -ٹ ک سرد لبراں صفحہ 169ہور ٹ ک بزم صوفیہ ص 392
کمان :=کسے عمل دی مشق کر لین 2- بار بار کسے عمل وچوں لنگھ کے اوہدا نتیجہ پالین
اکس = اکو ای
جگاون = فواون - مردہ دل بندیاں نوں زندہ کر دین- اوہناں اندر لطیف جزبے جگا دین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels