Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 70-61

ابیات باہو 70-61

سلطان باہو
February 5th, 2008


61
جو پاکی بن پاک ماہی دے پاکی جان پلیتی ہو
ہک بت خانے واصل ہوئے ہک خالی رہے مسیتی ہو
عشق دی بازی لئی جنہاں سر دیندیاں ڈھل نہ کیتی ہو
دوست نہ ملدا باہو جنہاں ترٹی چوڑ نہ کیتی ہو


اوکھے لفظاں دے معنے

پاکی : 1- پاکیزگی - دل دی صفائی 2- لوکاں دے دلاں وچ کسے ہستی دے پاک ہون بارے خیال
بن پاک =رسول پاک
ؐ دی حضوری یا وسیلے باجھوں
پاک ماہی=رسول پاک
ؐ
بت خانے =بت خانے اندر رہندیاں ای- اہنھے بت خانے توں مراد واقعی کوئی بت کدہ - مندر نہیں سگوں اک واحد ہستی دا پجاری (عاشق ) اے جہدی ظاہری زندگی غیر شرعی نظر آوندی اے۔ ٹ ک

وفاداری بشرط استواری اصل ایماں ہے
مرے بت خانے میں تو کعبے میں گاڑو برہمن کو
مسیتی=مسیت وچ ای مسیت: اینھے مراد ظاہری زندگی شرع دے مطابق گزارن دا ماحول اے ( اصل مسئلہ عشق دی پکڑ وچ ّآون یا عشق توں وانجھے رہن دا اے)
ٹ ک حسن زبصرہ بلال از جبش صہیب از روم
ز خاک مکہ اپو جہل ایں چہ بوا تعجبی است
بازی لئی=بازی جت لئی
سر دتیاں ڈھل نہ کیتی: جان قربان کرن توں دریغ نہ کیتا
ترٹی چوڑ کرنا : ٹ ک 69


62
جو دل منگے تھیوے کتھوں تھیون رہیا پریرے ہو
دوست نہ دیوے دل دا دارو عشق نہ واگاں پھیر ے ہُو
اس میدان محبت دے وچ ملسن تاء تکھیرے ہُو
قربان تنہاں توں باہُو جنہاں رکھیا قدم اگیرے ہُو


اوکھے لفظاں دے معنے

تھیوے کتھوں: انج ہو نہیں سکدا
پریرے=ہوروی پرانہہ - ہور دوریڈا (بہت مشکل )
دل دا دارو=دل دے سکون چین لئی لوڑ یندا اُپاء علاج
واگاں پھیرنا= پرت کے واپس آجانا۔ گھر ول مڑ آونا
ملسن=ملن گے (پہلاں ای چتاؤنی دتی گئی اے )
تاء=دکھ
۱ تکلیفاں 2- سیک
تکھیرے= ہور دی تکھے ۔ ہوردی تیز
اگیرے=ٹ ک 50(دوست دا اچارن دوس کرو )


63
جو دم غافل سو دم کافر مرشد ایہہ پڑھایا ہُو
سنیا سخن گئیاں کھلھ اکھیں چت مولا ول لایا ہُو
کیتی جان حوالے رب دے ایسا عشق کمایا ہُو
مرن تھیں اگے مرگئے باہُو تاں مطلب نوں پایا ہُو


اوکھے لفظاں دے معنے

دم=ساہ- اک ساہ لین تے لگا سماں ٹ ک ق م 18/84+ٹ ک
فوائد حضرت علامہ مولینا شبیر احمد عثمانی
ہر نفسیکہ فرر ود ممد حیات است /وچوں پرمی آید مفرح ذات پس در ہر نفسے دو نعمت موجود است و در ہر نعمتے شکر ے واجب (مکتوبات امام ربانی)
دلے کو غافل از دے یک زمان است
درآں دم کافر است اما نہاں است
(شیخ سعدیْ)

ٹ -ک ۔فَاَذ کُرُوُنَی اُزکُرُو کُم
کُلُ نَفَسِ یَخرِجُ بِغَیرِذَکرِ اللہ ِفَھُومَیِتُ(حدیث)
ِٹ ک ابیات باہو صفحہ 244مصنفہ پروفیسر سلطان الطاف علی
سخن=گل بات (ٹ ک ق م 59/18
چت=دل -خیال
عشق کمانا =عشق دیاں ساریاں شرطاں پوریاں کرنا تے عشق دے ہر امتحان تے پورا اترنا۔ ٹ ک 129
مرن توں .....ٹ ک مُوُتُو ا قَبلَ اَن مَمُوتُوا


64
جے توں چاہیں وحدت رب دی مل مرشد دیاں تلیاں ہُو
مرشد لطفوں کرے نظارہ گل تھیون سب کلیاں ہُو
گلاں وچوں ہک لالہ ہوسی گل نازک گل پھلیاں ہُو
دوہیں جہانیں مٹھے باہو جنہاں سنگ دو ڈلیاں ہُو


اوکھے لفظاں دے معنے

وحدت=رب تعالی دی وحدت دا بھیت
تلیاں=پوملنارے خلوص نال سیوا کرنا (گرمی وچ پیراں دیاں تلیاں تے کدو جھسیا جاندا اے -یا پیراں دیاں مل مل کے میل لاہ کے ادب ستکار لئی اوہ میلا پانی پیتا جاندا سی۔
لطفوں=مہربانی کر کے۔
نظارہ کرے =مہر دی نظر کر کے دیکھے
گل تھیون : اوہدے ویکھن نال ای سب کلیاں کھڑ کے پھل تھی ونجن (ناقص مرید کامل مرد بن ونجن تربیت دا اثر پورا ہو جاوے ٹ ک ّآناں کہ خاک را بہ نظر کیمیا کنند
گلاُں= پھلاُں
ہک لالہ ....:پوست دا پھل -جہدیاں پتیاں دا رنگ سوہا پتی وچ اک کلا داغ ہوندا اے جنھوں درد عشق دی علامت دسیا جاندا اے
ٹ ک داغ سے کوئی دل نہیں خالی
کیا کوئی لالہ زار ہے دنیا
اینہاں پھلاں وچوں اک لالہ ہوسہ اوہدے اندر عشق دا درد وہوسی
پھلیاں= بیج -بی - دراصل سارے بی اندر وی نازک گل ہوندے نیں بہناں اگے جا کے پھیر پھل بن جانا ہوندا اے
مٹھے= ساتھ -ٹ ک 31
سنگ=ساتھ -جماعت - سنگت
دوڈلیاں=دو ٹوٹے


65
جے رب نہاتیاں دھوتیاں ملدا ملدا ڈڈواں مچھیاں ہو
جے رب ملدا مون منایاں ملدا بھیڈاں سسیاں ہو
جے رب جتیاں ستیاں ملدا ملدا ڈانڈاں خصیاں ہو
رب اوہناں نوں ملدا باہو نیتاں جنہاں اچھیاں ہو


اوکھے لفظاں دے معنے

نہاتیاں= ہندو عقیدے سیتی گنگا دریا وچ اشنان کرن نال پاپیاں دے پاب جھڑ جاندے نیں۔ ایس لئی کئی پوترا ستھاناں (تیر تھاں ) تے جا کے نہاتیاں من پوتر ہو جاندا اے
مون منایاں .....:ہندو جوگی سر دے دارے وال منا کے ٹنڈ کروا لیندے نیں
سیاں=بھیڈاں : جیہڑی بھیڈ پہلی وار منی جاوے اوہدی ان لمی تے ملائم ہوندی اے جدوں اوہ اپنی اُن لہاندی اے تے اوہ سب توں زیادہ قربانی کر دہی ہوندی اے
جتی=سفنے وچ وی عورت دا خیال نہ لیاون والا
ستی=بیگانی تریمت ول دھیان نہ کرن والے سنیہ وان
ڈانڈ=ڈھگا
خصی=جس نردے ٹٹے پھر دتے جاون اوس وچ اپنی مادہ ول دھیان کرن دی اچھیا نہیں رہندی ۔ کام وادشنا مک جاندی اے۔ تے ہور جسمانی طاقت قائم رہندی اے۔


66
ج۔ جس الف مطالعہ کیتا ب دا باب نہ پڑھدا ہو
چھوڑ صفاتی لدھس ذاتی عامی دور چا کردا ہو
نفس امارہ کتڑا جانے ناز نیاز نہ دھر دا ہو
کیا پروا تنہاں باہو جنّھ گھاڑو لدھا گھر دا ہو


اوکھے لفظاں دے معنے

الف=ٹ ک 29 =ٹ ک 29ٹ ک : الف اللہ دل رتا میرا مینوں ب دی صخبر نہ کائی (بلھے شاہ)
ب =ٹ ک 29
باب=کتاب دا کوئی حصہ
چھوڑ صفاتی .....: اوہ خدا خدا نوں قدر تاں توں نہیں سنجھاندا د سگوں اوہنے ذاتی (آپ قدر تاں والا ای
لبھ لیا ہو یا اے
ٹ ک=میری نوائے شوق سے شور حریم ذات میں
غلغلہ ہائے الاماں بتکدۃ صفات میں

مرد مونن در نسازد باصفات
مصطفے راضی نہ شد الا بہ ذات
موسی زہوش رفت بیک پر تو صفات
تو عین ذات می نگری و در تبسمی
لڈھس=اوہنے لبھ لیا ہو یا اے
عامی=جہالت دے انھیرے وچ رہن والا گمراہ - دل دا اتھا۔ ٹ ک رعربی مادہ ع م ی ت ک ق م 17/72
نفس=اوہ اپنے کراہے پان والے نفس نوں معمولی کتا جاندا اے تے اوہدے نازنیاز نوں اپنے دل وچ کوئی تھاں نہیں دیندا
گھاڑو= گھڑن والا۔ ٹ ک 176(بندے گھڑے یا والے ہو )
خاص شکل دین والا جویں سنیارا گھمیار ترکھان - اینھے مراد جانور نوں انسان بنان والا مرشد پاک اے۔


67
ج - جے دین علم وچ ہوندا سر نیزے کیوں چڑھدے ہو
اٹھاراں ہزار جو عالم آہا اگے حسین دے مر دے ہو
جے کر بیعت رسولی مندے پانی کیوں بند کر دے ہو
صادق دین تنہاں باہو جو سِر قربانی کر دے ہو



اوکھے لفظاں دے معنے

دین: اسلام دا دین (بہیدا مقصد ایہہ دے پئی جھوٹھے معبوداں اگے سر نہیں نوانا پاویں سر لتھ ای جاوے)
علم=ظاہری علم نری جانکاری-عشق توں وانجھیا ہو یا علم
سر....شہید کربلا حضرت امام حسین تے اوہناں دے ساتھیاں دے سر جہڑے یزیدی ظالماں نے اٹھارہ ہزار .....ٹ ک بیت 151مصرع دوجا
اگے=حضرت امام حسین دا بچا کردیاں ہویاں-
ٹ ک=شاہ حسین شہادت پائین -جو مرن متراں دے اگے ۔ (شاہ حسین )
جے کر .....: اوہناں جس رسول دا کلمہ پڑھیا سی اوسے دے دوہتریاں تے فرات دا پانی بند کر دتاسی-صادق: سچا
بیعت: کسے روحانی آگو پیر خلیفہ دے ہتھاں وچ ہتھ دے کے وفاداری دا عہد کرنا
شاہ است حسین بادشاہ است حسین
دین است حسین دین پناہ است حسین سردادنہ داد دست در دست یزید
حقا کہ بنائے لا الہ است حسین

68
جیں دل عشق خرید نہ کیتا سو دل بخت نبختی ہو
اُستاد ازل دے سبق ُپڑھایا ہتھ دتس دل تختی ہو
پر سر آیاں دم نہ ماریں جاں سر آوے سختی ہو
ُپڑھ توحید تھیوسے باہو سبق پڑھیوے وقتی ہو


اوکھے لفظاں دے معنے

جیں دل ....: جس دل نے ایس جگ وچ آکے عشق دا سودا نہیں کیتا اوس دل دے بھاگاں وچ بڑی بدنصیبی اے
بخت =بھاگ -نصیب -فسمت نبختی : بد نصیبی دلڑی بڑی نبختی اے
استاد ازل....ازل دے استاد نے مینوں عشق دا سبق پڑھا دتا سی اوہنے میرے ہتھ وچ دل دی تختی دتی دی تاں جو میں عشق دا پڑھایا ہو یا سبق دل دی تختی تے لکھ لکھ کے چنگی طرحاں پکاواں (عشق دا سبق دل والے لوک ای پڑھ سکدے نیں )
برسر آیاں : عشق دا سبق پڑھان والے استاد نےنال ای ایہہ پکی وی کیتی ّآہی پئی جے کدے تینون کوئی عہدہ مل جاوے۔ توں اوس مقام تے کوئی وڈی شیخی یا اُچا دعوی نہ کر بہیں۔ متاں رب ولوں کوئی آزمائش تیرے سرتے آونجے
جان : متاں
پڑھ توحید ....: توں توحید دا سبق پڑھ تاں جو رب نوں مل سکیں - پھر ای تیرے کولوں موجودہ وقت دا سبق پڑھیا جاسی
وقتی سبق: انسان تے جو حالت کسے خاص سمے وچ طاری اے اوہو ای اوہدا وقت اے۔ دنیا دے جھنجٹاں وچ پیا اے۔ اگے دا فکر سو-خوشی وچ اے غمی وچ اے اکو ویلے سمے نعنی کسے گھڑی پل منٹ سیکنڈ لمحے وچ ۔ وکھو وکھ بندیاں دے سرتے گزرن والا وقت وکھراتے اڈرا ہوندا اے۔ آپریشن کرن والا ڈاکٹر تے روگی اکو سمے وچ وکھ وکھ حالت وچ نیں ۔ کسے دا گھر لٹن والا ڈاکو تے لٹسیجن والا شہدا اکو سمے دا وکھ وکھ سواد چھک رہے نیو۔ بیتیا سماں ہتھوں نکل گیا اے اوہدے تے ہتھ ملن دا کہیہ لابھ اے۔ آون والا سماں ساڈے ہتھ توں دور اے۔ اصل ویلاتے سماں تے صرف ہن دا سماں اے اہنوں گھٹ کے پھڑ اوہ بھی تہاڈے ہتھاں وچ ای نہ بیت جاوے حال ای تہاڈی مٹھ وچ اے ایہو اصلی وقت اے جہڑا بجلی دی چمک وانگوں اکھ دے پلکارے وچ ای لنگھ جاندا اے
ٹ ک =اَلَوَقَتُ سَیَفُ قَاطِعُ سو وقت دا تقاضا ای وقت دا سبق اے جیہڑا توحید دے وچ ای پڑھیا جا سکدا اے۔ وقت دا تقاضا ایہہ دے پئی جو دم غافل سو دم کافر۔ تھیوے سے باہو وچ باہو نوں اسم معرفہ نہ سمجھیا جاوے۔ سگوں ایہہ لفظ اپنے اندر خاص معنیاں وچ ورتیا گیا اے ۔ ٹ ک 206 واصل دا مفہوم دی ایہدے اندر ای جذب اے۔


69

جیں دل عشق خرید نہ کیتا سو دل درد نہ پُھٹی ہُو
اُس دل تھیں سنگ پتھر چنگے جو دل غفلت اَٹی ہُو
جیں دل عشق حضور نہ منگیا سو در گاہوں سُٹی ہُو
ملیا دوست نہ باہُو جنہاں چوڑ نہ کیتی ترُٹی ہُو


اوکھے لفظاں دے معنے

دل=دلڑی ٹ ک کیوں دلڑی اداس گھیڑی اے (حضرت پیر مہر علی شاہ گولڑی )
(پرانی پنجابی تے سندھی وچ دل مونث ور تیندا اے - ٹ ک 12,1
جیں دل =ٹ ک 68
سو دل درد....=اوس دلڑی نوں دل دے درد دا پھٹ نہیں لگے گا۔ ایس لئی اوہ دلڑی درد دے احساس توں وانجھی رہسی کسے دے دکھ درد دا اثر نہ قبولسی ۔
سنگ =پتھر
جو دل ....جیہڑی دلڑی غفلت نال بھر ہوئی اے اوہدے اتے غفلت چنگی طرحاں چھائی ہوئی اے۔ اوس دلڑی نالوں تے پتھر ای افضل نیں۔
غفلت =(عیں فرض ولوں مکھ موڑنا جان بجھ کے دھیان نہ دینا ان گہلی - لاپرواہی
عشق حضور =عشق دے دربار دی حاضری - حضور دا عشق
درگاہوں=اللہ دی درگاہ توں
سٹی =نظراں توں وی تھلے ڈیگی گئی ۔ درگاہوں دھکے دے کے کڈھی گئی ۔ شیطان وانگوں راندہ درگاہ ہوگئی
دوست =رب اللہ تعالی-ترٹی =سر کی چک -پردہ - اوٹ
چوڑ کرنا=خراب برباد کرنا - وگاڑ دینا
ترٹی چوڑ =(جدوں ترٹی چوڑ ہو جائے تے بندہ بےپردہ تھی دیندا اے)
سب حجاب دور کرنا- سارے وسیلے خرچ کر دینا - اپنا سب کجھ پرباد کر دینا کسے وی قربانی توں دریغ نہ کرنا


70
جیں دل عشق خرید نہ کیتا سو دل درد نادانے ہُو
خنثے خسرے ہر کوئی آ کھے کون آکھے مردانے ہُو
گلیاں دے وچ پھرن ہر ویلے جنگل ڈھور دیوانے ہُو
مرداں دی کل پوسی باہُو عاشق بنھسن گانے ہُو


اوکھے لفظاں دے معنے

جیں دل =ٹ ک 68
عشق=الہی عشق
عشق =الہی عشق
درد نادانے =.....درد توں ناواقف
خنثی=محنث -خواجہ درا-خسرا
خسرے = محنث مردانے گناں توں وانجھے ہوئے شخص
مردانے=مرداں والے گن دکھن والے بندے -مرداں وانگوں ہوکے- بہادری نال (عشق مال جان دی قربانی منگدا اے ایس لئی عشق کرنا مرداں بہادراں دا ای کم اے)
کون آکھے =....عشدق توں وانجھیاں لوکاں نوں مردانے کوئی نہیں آکھ سکدا
ڈھور=ڈنگر -پشو-مویشی
دیوانہ=مت بدھ تے عقل توں وانجھیا ہویا -دیوانے صحرا دل بھجدے نیں
کل (سندھی) =خبر -علم آگاہی
کل پینا=پتا لگنا -جوہر کھلنا -حقیقت کھلنا- ٹ ک 152


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels