Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 120-111

ابیات باہو 120-111

سلطان باہو
February 5th, 2008
1 / 5 (1 Votes)


111
سئے روزے سئے نفل نمازاں سئے سجدے کر تھکے ہُو
سئے واری مکے حج گزارن دل دی دوڑ نہ مکے ہُو
چلے چلیئہے جنگل بھونا گل نہ اس تھیں پکے ہُو
سبھے مطالب حاصل باہو پیر نظر اک تکے ہُو


اوکھے لفظاں دے معنے

سئے =کئی سو۔ سینکڑے (حدوں ودھ عبادت کرن والے نفل پڑھدے رہندے نیں )
حج گزارن=حج ادا کرن
دوڑ =حج گزارن ویلے مکےت دیاں دو پہاڑیاں صفاتے مردہ دے درمیان (
between) کیتی جان والی
نس بھج۔ سعی ۔ ایس عمل نال حضرت ہاجرہ علیہاالسلام دی پانی لبھن واسطے بے چینی دی یاد تازہ ہو جاندی اے
دل دی دوڑ ..........=مکے شریف وچ حج ویلے کیتی گئی سعی دلوں نہیں ایویں اتوں اتوں ای اے)
چلا=ٹ ک 44
گل پکنا=لوڑیندے معیار تے پرکھ تے پورا اترنا۔ درگاہ وچ مقبول منظور ہونا



112
سینے وچ مقام ہے کیں دا مرشد گل سجھائی ہُو
ایہو ساہ جو آوے جاوے ہور نہیں شے کائی ہُو
اس نوں اسم الاعظم آکھن ایہو سر الہی ہُو
ایہو موت حیاتی باہو ایہو بھیت الہی ہُو


اوکھے لفظاں دے معنے

کیں دا =کس دا
گل =بات (لفظ گل دے اچارن ویلے جے ـ"ل" نوں مشدد پڑھے تے گل دے مگروں اون والا
لفظ نرا سجھانی رہ جاندا اے
سجھائی =ذہن وچ پائی (سجھائی اصل وچ سوجھائی یعنی نظر وچ لیاندی ۔ وکھائی )
ہور نہیں ........=ایہو تے چور اے ایہنوں چنگی طرحاں سنجھان پچھان لؤ
ریح =ہوا۔ ریح تے روح دا مادہ اکو ای اے
اسم الاعظم =اللہ دا سب توں وڈنا نو جس نام دا باپ کر کے اوکھے مسئلے حل ہو جاندے نیں
سر الہی =اللہ دا بھیت ٹ ک اَلا نِسَانُ سَرِی (انسان میرا بھیت اے )
سر = بھیت ایہ بھیت مصرع 3 وچ آچکا اے
بھیت (سندھی )=کندھ ۔ مند۔ پشتہ۔ موت تے حیات وچکار عارضی کندھ



113
شریعت دے دروازے اچے راہ فقر دا موری ہُو
عالم فاضل لنگھ نہ دیندے جو لنگھدا سو چوری ہُو
پٹ پٹ اٹاں وٹے مارن دردمنداں دے کھوری ہُو
عاشق جانن راز باہو کیہ جانن لوک اتھوری ہُو



اوکھے لفظاں دے معنے

درواز ے اُچے =وڈے وڈے شہراں دوالے اک پکی کندھ (فصیل )ہوندی سی تے شہر وچ وڑن لئی کئی دروازے بنے ہوندے سن اوہ دروازے رات نوں بندہو جاندے سن اوہناں تے پ٠ہر یدار بہندے سن راجیاں مہارا جیاں دی سواری لئی وکھ وکھ دروازے سن کئیاں دروازیاں وچوں اٹھ یا ہاتھی تے چڑھیا آدمی وی لنگھ دا کدی سی۔ عام لوکاں واسطے دروازے اڈرے سن۔ پر شہر دے (شودر) اچھوت صفائی کرن والے گند مند ہو فجن والے لوکاں لئی کھڑکی ورگا اک چھوٹا جیہا دروازہ سب توں اڈرا سی۔ ایہدے وچوں نمانے لوک نیوں کے لنگھ جاندے سن۔ اجیہے کھڑکی ورگے دروازے نوں موری آکھیاں جاندا سی۔
لنگھ = راہ- گزگاہ۔ لنگھن دی اجازت (ٹ ک سندھی ڈکشنری ) پنجابی وچ لفظ لا نگھا موجود اے
ٹ ک =نہ راہ فرید نہ لانگھے ہے پندھ بہوں مشکل دا (خواجہ فرید )
درد منداں =ٹ ک 47
کھوری=دلوں ویر ورودھ نہ گنوان والے -ڈھڈوں دشمنی رکھن والے -عناد رکھن والے
اتھوری =تھوری ٹ ک پٹھے -اپٹھے ٹ ک 201
تھوری-سندھ دی ایک قدیم (آدی باسی ) قوم جس سے لوک مردار کھاندے نیں۔ گوشت بارے کسے حلال حرام دی تمیز نہیں کردے-ایس قوم دا ذکر ڈھیڈتے مڑیچہ نال آندا اے
ٹ ک اَلدُنیُا جِیفَتُہ وَطَالَبُہَا کَلابُ
ایتھے دی اتھوری جَیفَتُہ (مردار ) کھان والے نیں۔


114
شور شہر تے رحمت وسے جتھے باہو جالے ہُو
باغبان دے بوٹے وانگوں طالب نت سنبھالے ہُو
نال نظارے رحمت والے کھڑا حضوروں پالے ہُو
نام فقیر تنہاں دا باہُو گھر وچ یار وکھالے ہُو

اوکھے لفظاں دے معنے

شور شہر=شہر شور کوٹ
دسے = (1) وسدی اے (2) اللہ کر کے وسے
جالنا=ٹ ک 84
طالب =مرید ٹ ک 7
نت =ہمیشہ
سنبھالنا=ڈگے نوں سہارا دینا -چنگی دیکھ بھال کرنا
نال نظارے .....=رحمت دی تکنی نال تک کے -نظر کرم کر کے
کھڑا حضوروں =جناب رسول اللہ دی حاضری وچ کھلوتا ای -اپنے مریداں دل دھیان کرکے اوہناں دی روحانی پرورش کر رہیا اے
ایس بیت وچ حضرت سلطان العارفین اینے شہر شور کوٹ تے اللہ دی رحمت لئی دعا کر رہے نیں یاں اپنے ویلے دا حال حقیقت دس رہے منیں پئی شہر تے خدا دی رحمت وسدی اے ایس شہر دی فضیلت ایہ وے پئی اوہ اک ولی اللہ دا مسکن اے تے اپئتھے بہ کے اوہ اپنے طالباں دی روحانی پرورش ملیاں وانگوں کر رہے نیں تے کےی مریداں نوں اینھے بیٹھے ای یار دے دیدار دا شرف حاصل کرا چکے نیں۔ اپنے رسالہ روحانی وچ وی اوہ ایس شہر لئی اجیہ دعا منگ چکے نیں
فقیر باہو عرف اعوان ساکن قرب و جوار قلعہ شور حر سہا اللہ من الفتن والجور !!
دنیا باغ ولی وچ مالی آپ خدا وند رکھے
کدھرے کھڑی پینری لا وےکدھرے بوٹے پٹے
(میاں محمد)


115

صفت ثنائیں مول نہ پڑھدے جو جا پہنتے ذاتی ہُو
علموں عمل انہاں وچ جیہڑے اصلی تے اثباتی ہُو
نال محبت نفس کُٹّھو نیں گھن رضا دی کاتی ہُو
چوداں طبق دلے دے اندر باہو پا وچ جھاتی ہُو


اوکھے لفظاں دے معنے

جنا چربندہ تے خدا (عابد تے معبود ) وکھرے نیں۔ بندہ اپنے خدا دی حمد پڑھدا رہے گا پر جدوں وحدت الوجود تے کھلوت ہو جا سوتے اوس اک مک حالت وچ کو ن کسے دی صفت ثنا پڑھے ۔ وحدت اوجود دے عرفان مگروں حمدثنا پڑھنا اپنا وکھیواں جگان والی گل اے سو اوہ وارا ای نہیں کھاندی
علموں عمل=علم اُتے عمل ۔ علم دی رو نال عملہ عام بندے پہلاں علم حاصل کر دے نیں اپنے علم دی ہوند مندے نیں تے پھر اپنے علم تے عمل کرن دا دعوء کردے نیں۔ پر ایہ کم اوہ کردے نیں جہیڑے اصل وچ آپ وجود رکھدے ہوون۔ پر فقر تے اپنے ہوون توں ای انکاری اے۔ اوہ صرف حق دی ذات دی ہوند دا ای قائل اے۔ اپنی نفی کردا اے۔ ٹ ک - نونہیوں ہیں میں ناہیں وے سجنا (بلھے شاہ )
نفس=ٹ ک 10
گھن =لے کے
کاتی =چھری ٹ ک 106جیں تے برہوں وگائی کاتی (شاہ حسین)
(اوہ اپنی مرضی مار کے رب دی رضا من لیندے نیں )
چودہ طبق =ٹ ک 3
وچ =اپنے اندر۔ اندرونے


116
صورت نفس امارہ وی کوئی کتا گلر کالا ہُو
کھوہے نوکے لوہو پیوے منگے چرب نوالا ہُو
کھبے پاسیوں اندر بیٹھا دل دے نال سنبھالا ہُو
ایہہ بدبخت ہے بھکھا باہُو اللہ کرسی ٹالا ہُو

اوکھے لفظاں دے معنے

نفس امارہ=ٹ ک 94ٹ ک
لَاَنَّ النَّفسَ کَلبُ نَبَّاحُ وَامَسَاکُ الکَلبِ بَعد الرِّیَاضَیّتہِ مُبَاحُ کیوں جو نفس اک کتا اے بھونکن والا تے کتے نوں شکار دی سکھلائی کرن مگروں کول رکھ لینا مباح اے
لَاَنَّالنَّفسَ کَلَبُ بَاغِِ وَجَلدُالکَلبِ لَا بَطھُر اَلاّ بالدَّ بَاغِ کیوں جو نفس امارہ تے اک سر کش کتا اے تے کتے دا چمڑا رنگائی توں سوا پاک نہیں ہو سکداالکلام فی مجاہدۃ النفس (کشف المجوب )
گلر =کتے دا بچہ کتورا
کھوہنا=(1) دھکو دھکی اپنے قبضے وچ لے لینا جچیننا ۔ گھسنا
(2) پنجے تے دنداں نال وال یا پر کھمب پٹنا
نوکنا=نوچنا =نونہال نال کھرونڈے مارنا
چرب =چربی والا۔ تھندھا
نوالا= روٹی دی برکی
سنبھالا =ٹیک ۔ آسرا
support
نالا کرنا =بچانا۔ مصیبت دا تلیاں رہنا۔ نفس دے حملے توں بچا تد ہو وے گا۔ نفس دی گل نہ منی جاوے نفس تے غلبہ پایا جاوے اپنے نفس دا محاسبہ کیتا ونجے۔


117
ض۔ ضروری نفس کتے نو ں قیما قیم کچیوے ہُو
نال محبت ذکر الہ دا دم دم پیا پڑھیوے ہُو
ذکر کنوں رب حاصل تھیندا ذاتوں ذات دسیوے ہُو
جہان غلام تنہاں دے باہو جنہاں ذات لبھیوے ہُو


اوکھے لفظاں دے معنے

نفس کتے =ٹ ک 116,94ک الکلام فی مجاہدۃ النفس۔ کشف المجوب وچ شیخ ابو العباس اسقنی دا یان ۔ جنہاں نفس کتے نوں اپنی اکھیں ڈٹھا اے
قیما قیم کچیوے =بیرے بیرے کرنا۔ قیمہ کٹنا ۔ ایس طرح مار دینا کہ پھر زنداہ نہ ہو سکے تے دشمنی کرن جو گا نہ رہے۔ جے قیماقیم دی تھاں فہما فہم ہووے تاں مطلب ایہ ہوسی۔ نفس دی حقیقت سمجھ لئی جاوے تے اوہنوں سمجھا کے نتھ پاکے نفس مطمتہ بنا لیا جاوے۔
دم دم =ہر ساہ نال۔ ہر دم
ذکر =ٹ ک 60
کنوں =ٹ ک 96
تھیندا =ذات دسیوے =ٹ ک مَن عَرَفَ نَفَسَہُ فَقَد عَرَفَ رَبِّہُ (انسان اپنی پچھان کر اوے تے رب تعالی دی پچھان تھی ویندی اے )
جہان غلام =......جنہاں خدا دی ذات پا (پچھا ن کر ) لئی سارے جہاناں اندر اوھناں دی بادشاہی اے۔ لفظ تنہاں وچ ن دا اچارن ذرا پولا رکھو۔


118
طالب بن کے طالب ہوویں اوسے نوں پیا گانویں ہُو
سچا لڑ ہادی دا پھڑکے اوہو توں ہو جا ویں ہُو
کلمے دا توں ذکر کماویں کلمے نال نہاویں ہُو
اللہ پاک کریسی باہو ذاتی اسم کماویں ہُو

اوکھے لفظاں دے معنے

طالب =(1) صحیح معنیاں وچ لوڑ وند
طالب=(2) مرید - بیعت کرن والا
اوسے =مرشد پاک
گانویں =صفت ثنا کریں۔ سوہلے گانویں
ٹ ک =وارث شاہ چہیک جے نویں چوپیں سبھے بھل جانی جہڑیاں گانونا ایں ہ ۔ و بند 65
ہادی =گدایت دین والا۔ مرشد
لڑ پھڑنا =دامن نال لگنا۔ پناہ وچ آونا ۔ عقیدت نال پیردی کرنا۔
ذکر کماونا =(1) کسے خاص کلمے دا ورد اجن پکانا کہ اوہدے پورے مفہوم معنے وی ذہن وچ بہ جان تے اوہدے اتے عمل کردیاں ہویاں ذاکر وچ لوڑیندی تبدیلی آونجے (2) ذکر دا اثر تے انوار جھل کے ہر طرح دا فیض حاصل کرنا
نہاویں =تن تے من دی میل لاہیں
پاک کریسی =ٹ ک اللہ تعالی تنیوں امسانی بشری کمزوریوں ۔ نفس شیطان دی چکوں تے غیر اللہ دی محبت نوں پاک کریسی ۔۔۔۔۔ اسم ذات کماون نال بندہ فنانی اللہ تھی ویندا اے ۔


119
طالب غوث الاعظم والے کدے نہ ہوون ماندے ہُو
جیں دے اندر عشق دی رتی رہن سدا کر لاندے ہُو
جیں نوں شوق ملن دا ہووے لے خوشیاں نت آندے ہُو
جہان تنہاں دے باہو جہیڑے ذاتی اسم کماندے ہُو

اوکھے لفظاں دے معنے

طالب = ٹ ک
l
غوث الاعظم =حضرت سید عبداقادر جیلانی ۔ پیر پیرا ں۔ شاہ میراں ۔ یارہویں ولاے پیر۔
ماندے= بسترے تے ڈگے پئے ۔ بیمار۔ روگی ۔
رتی = (1) تھوڑا جیہا۔ (2) نشہ - چاٹ سواد۔ لگن ٹ ک 25
کرلانا=وچھوڑے پاروں حال پا رہیا کرنا۔ ملن دی سک نال ورلاپ کرنا ٹ ک =اک باز توں کانونے کونج ھوہی دیکھاں چپ ہے کہ کرلاوندا ای ہ ۔ و بند 390
جیں نوں =........جس مرید نوں حضور رسول کریم
ؐ دی زیارت دا شوق ہووے۔ حضرت غوث الاعظم اوہدے لئی حضور کولوں ملن دی رضا لے کے آجاندے نیں
خوشی لے آونا=اجازت۔ آگیا ۔ رضامندی ۔
Approval حاصل کر لینا۔ ٹ ک =جوگی ناتھ تھوں خوشی لے وداع ہویا چھٹا باز جیوں تیز طراریاں نوں ہ۔ و بند 287
وارث شاہ کوئی لے خوشی ساڈی ووھ پتراں دے نال سوترانی ۔ ہ ۔ و بند 289
جہان =دوئیں جہان ۔ کل جہان
ذاتی اسم کماونا=ٹ ک 118


120
ظاھر دیکھاں جانی تائیں نالے اندر سینے ہُو
برہوں ماری میں نت پہراں ہسن لوک نابینے ہُو
میں دل وچوں ہے شوہ پایا جاون لوک مدینے ہُو
کہے فقیر میراں دا باہو اندر دلاں خزینے ہُو

اوکھے لفظاں دے معنے

ظاہر دیکھاں =میں اوہنوں ظاہر بے حجاب ویکھ رہیاں
(2) مینوں اوہنوں ظاہر ویکھن دی سدھر اے
برہوں =(1) جدائی ۔ وچھوڑا (2) عشق نیہا۔ جدائی دی اگ ۔ ٹ ک 128
پہرنا=پہرہ دینا۔ جگراتے کٹنا
ٹ ک =کن پاڑ فقیر ہو جان راجے درد مند پہرن وچ بار دے نیں ہ۔ و بند 393
نابنیے= انھے ۔ ان سونہے ۔ حال دی حقیقت توں بے خبر
شوہ =شوہر۔ مالک (خدا )
میراں =ٹ ک 31
خزینے =خزانے


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels