Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 130-121

ابیات باہو 130-121

سلطان باہو
February 5th, 2008
4 / 5 (1 Votes)

121
عاشق دی دل موم برابر معشوقاں ول کالھی ہُو
طعمہ ویکھے تر تر تکے جیون بازاں دی چالی ہُو
باز بے چارہ کیوں کر اڈے پیریں پیوس دوالی ہُو
عشق خرید نہ کیتا باہو گئے جہانوں خالی ہُو

اوکھے لفظاں دے معنے
موم برابر =پنگھرن دے معاملے وچ موم وانگوں (
Sensitive)
دل =مونث ورتیند اے ٹ ک 69
معشوقاں ول کالھی =معشوق ول جان لئی بے چین
کالھی =اوتاولا پب
طعمہ = بازنوں بھکھیاں رکھیا جاندا اے۔ پھیر اوہدی بھکھ نوں ہور چمکاون تے شکار واسطے تیار کرن لئی ماس دی اک بوٹی اوہنوں دوروں وکھائی جاندی اے۔ اجیہی بوٹی طعمہ ویکھن مگروں باز طعمے نوں چمبڑ جاندا اے۔ جے اوہدے پیراں توں دوالی لاہ دئے تے پھر اوہ کسے چڑی جنور تے جھپٹا مار دا اے۔ ٹ ک
باز توڑ کے طعمیوں لاہیو نیں معشوق دی دید ہٹا گیاں۔ ہ۔ و۔ بند 452
تر تر تکنا=مایوسی۔ بے آسی نال دوروں دوروں ویکھن۔حسرت بھریاں نظراں نال ویکھنا کسے مجبوری پاروں کول نہ اپڑ سکنا ۔ ٹ ک 178
چالی=ریت ۔ چال مریا دا ۔ ورتارا ۔ سبھا ۔ اصول طریقہ
ٹ ک =گوربانی۔ گر سکھ میت چلو گر چالی
دوالی =باز دے پیراں نوں بنھن والی دوال ( ف ) کھل۔ چمڑا
دوال =چمڑے دی ودھری

122
عاشق پڑھن نماز پرم دی جیں وچ حرف نہ کوئی ہُو
جیہا کیہا نیت نہ سکے درد منداں دل ڈھوئی ہُو
اکھیں نیراے خون جگر دا وضو پاک سزوئی ہُو
جیبھ نہ ھلے ہوٹھ نہ پھرکن باہُو نمازی سوئی ہُو

اوکھے لفظاں دے معنے
پرم =ٹ ک 24
جیہا کہیا=عام آدمی ۔ ایرا غیر انتھوخیر ا (جے....ہا کے ....ہا پڑھو)
دردمنداں =ٹ ک 47
ڈھوئی =ٹ ک 105(اوس نماز وچ درد منداں دے دل نوں ڈھوئی مل سکدی اے
نیر =پانی۔ ہنجھو۔ اتھرو۔ (اکھاں وچ جیہڑا نیراے اوہ اصل وچ میرے جگر دا خون اے)
وضو پاک سزوئی =پاک وضو سازیا گیا اے۔ ٹ ک وضو ساختن ٹ ک اٹھ فریدا وضو ساج صبح نماز گزار (شکوج فرید )
پھرکنا =آپ مہارے ہلنا
سوئی =سواری ۔ اوہ ای۔

123
عاشقاں ہکو وضو جو کیتا روز قیامت تائیں ہُو
وچ نماز رکوع سجودے رہندے سنجھ صباحیں ہُو
ایتھے اوتھے دوہیں جہانیں سبھ فقر دیاں جائیں ہُو
عرش کولوں سئے منزل اگے باہو کم تنہائیں ہُو

اوکھے لفظاں دے معنے
ہکو= اکو ای (اوہناں دا وضو ٹٹدا نہیں )
سنجھ=شام
صباحیں =صبح سویر ویلے
سنجھ صاحیں =صبح نوں شام تائیں (ایتھے مراش دن رات 24گھنٹے اے )
جائیں =مقامات
تھائیں =جگہاں
سئے =سو ۔ کئی سنیکڑے
پیا کم =......جنہاں نال ساڈا کم (واسطہ ) پیا اے اوہ عرش کولوں وی سو منزل اگے نیں
تنہائیں =اوہناں نال ۔ اجیلے لوکاں نال۔


124
عاشق راز ماہی دے کولوں کدی نہ تھیون واندے ہُو
نندر حرام تنہاں تے جیڑے ذاتی اسم کماندے ہُو
ہک پل مول آرام نہیں دینہ رات وتن کرلاندے ہُو
الف صحی کر پڑھیا باہو واہ نصیب تنہاں دے ہُو

اوکھے لفظاں دے معنے
ماہی=محبوب
نہ تھیون =نہیں ہو جاندے
واندے = الگ ۔ آزاد ۔ فارغ ۔ ویہلے (بھر پور تا دے احساس نال کدے واندے نہیں ہوندے )
ذاتی اسم =اسم ذات اللہ
اسم ذات کمانا= ٹ ک 118
مول =ہرگز ۔ بالکل
کرلاندے وتن =کرلاندے پھر دے نیں
سہی کرنا =ٹ ک 9
واہ نصیب =.......ٹ ک 72


125
عاشق سوئی حقیقی جیہڑا قتل معشوق دے منے ہُو
عشق نہ چھوڑے مکھ نہ موڑے سئے تلواراں کھنے ہُو
جت ول ویکھے راز ماہی دے لگے اوسے بنے ہُو
عشق حسین علی دا باہو سر دئے راز نہ بھنے ہُو

اوکھے لفظاں دے معنے
قتل معشوقاں دے معنے = جے اوہنوں معشوق اپنے ہتھ نال قتل کرنا چاہوے تے اوہ اپنی عین خوش قسمتی تے دل دی خوشی نال معشوق دے ایس ارادے نوں سر اکھاں تے جھل کے من لوے (مشوق پڑھو)
مکھ نہ موڑے =کسے وی اوکڑ توں ڈر کے دھیان دوجے پاسے نہ کر لوے
کھنے =کھنڈے کھنڈا= کھانڈا۔ سدھے پھل والی چد ھاری تلوار
سئے =کئی سو
سئے تلواراں =......بھانویں اوہنوں سو تلواراں کھنڈے وکھاوے جاون
ماہی =محبوب
بنے =پاسے
راز بھننا =بھیت دس دینا۔ راز فاش کر دینا ٹ ک 71


126
عاشق شہدے دل کھڑایا آپ دی نالے کھڑیا ہُو
کھڑیا کھڑیا ولیا ناہیں سنگ محبوباں رلیا ہُو
عقل فکر دیاں سب بھل گئیاں عشقے نال جاں ملھیا ہُو
قربان تنہاں نوں باہو جنہاں عشق جوانی چڑھیا ہُو

اوکھے لفظاں دے معنے
شہدا =وچارہ۔ ترس جوگی حالت والا
کھڑایا =گوادتا۔ گم کردتا۔
آپ وی =آپ وی نال ای گواچ گیا
ولنا=واپس مڑنا
کھڑیا=.......ولیا ناہیں =کھلا کھلوتا کدھرے گواچ گیا اے کہ واپس مڑ کے ای نہیں آیا
سنگ = ٹ ک 31
رلیا=اوہناں ورگا ہو گیا ۔ اوہناں وچ شامل تھی گیا بھل گئیاں (دا فاعل ) چالا کیاں ۔ گلاں
ملھنا=کھیڈنا۔ خوشی کرنا۔ چڑھنا ٹ ک چانمل ۔ چونپ
جوانی چڑھیا =اپنے عروج تے پجاتے
climax تے اپڑیا


127
عاشق عشق ماہی دے کولوں پھرن ہمیشہ کھیوے ہُو
جیندیاں جان ماہی نوں ڈتی دوہیں جہانیں جیوے ہُو
شمع چراغ جنھاں دل روشن اوہ کیوں بالن ڈیوے ہُو
عقل فکر دی پہنچ نہ باہو فانی فہم کچیوے ہُو

اوکھے لفظاں دے معنے

کولوں =( 1) پاروں۔ دی وجہ توں۔ دے کارن
(2) کول توں کول (ہ) =سوراخ کھڈ اکلوانجے ڈیرا خلوت خانہ مراد غار حرا جتھے صرف دوہاں یاراں دی سنگت سی ٹ ک 158
پھرن = واپس مڑدے نیں
کھیوے =مست۔ نشے٦ وچ مخمور ٹ ک 160
ماہی=حقییقی محبوب حق تعالی
جیندیاں جان =ٹ ک مُوتُو ا قَبلَ اَن تَمُوتُوا
جیوے =جیون پئے ۔ زندہ ہوگئے ۔ امر ہوگئے
روشن دل =روشن ضمیر دل دے چانن والے
پہنچ =ردائی ۔ سمجھ کے حقیقت پالین دی طاقت
شمع چراغ =......جنہاں دا دل موم بتی یا دیوے وانگوصں روشن اے ( میں تے انج وی دنیا ہویا اے چشم چراغ جنیاں دے دیدے )
فانی فہم =اوتھے فہم نوں فنا کر دینا چاہیدا اے ا۔ فانی کر دینا پیندا اے ۔


128
عاشق نیک صلاحیں لگدے کیوں اُجاڑ دے گھرنوں ہُو
بال مواتا برہوں والا لاندے جان جگر نوں ہُو؟
جان جہان سب بھل گیّو پئی لوٹی ہوش صبر نوں ہُو
قربان تنہاں توں باہو بخشیا خون جنہاں دلبر نوں ہُو

اوکھے لفظاں دے معنے
نیک صلاحیں =عقل مت دین والیاں سجھاواں تے مشفق ناصح دے مشوریاں تے نیک صلاح اک ٹچکر اے
لگدے =من لیندے ۔ عمل کر لیندے
مواتا =ککھاں کانیاں دا بجھا مٹھا جنھوں تیل وچ بھیوں کے اگ لائی جاندی اے
لاندے =اوہناں کدی دی نہیں سی لانا
لوٹی =لٹ ڈاکا
پئی لوٹی =.....ہوش صبر لٹے گئے
خون بخشیا=....جنہاں نوں محبوب دے ہتھوں قتل ہون دا چاء اے اوہ آپ اپنی خوشی نال اپنی جان دا نذرانہ پیش کردے نیں
دلبر= محبوب

129
عاشق ہوویں عشق کماویں دل رکھ وانگ پہاڑاں ہُو
لکھ بدیاں تے ہزار الاہمے جانیں باغ بہاراں ہُو
منصور جیہے چک سولی دتے واقف کل اسراراں ہُو
سجدیوں سر نہ چائیے باہو کافر کہن ہزاراں ہُو

اوکھے لفظاں دے معنے
وانگ پہاڑاں = پہاڑاں وانگوں اٹل تے مضبوط
عشق کماویں = ٹ ک63
بدی =تہمت۔ جھوٹا الازام ٹ ک 162
جانیں = توں جان لئیں
واقف=.....جیہڑے کل بھیتاں دے جانو سن
چائیے چکئے -اٹھائے
(چوتھے مصرعے دے لفظ باہو تے کافر دے درمیان توڑے بھانویں دا آپ مہارا مفہوم موجود اے
واقف کل اسراراں =بھیتاں دے جانو
کافر کہن .=.....بھانویں ہزاراں لوک کافر آکھن لگ پین
ٹ ک =بلھیا عاشق ہویوں رب دا ملامت ہوئی لاکھ
تینوں کافر کافر آکھدے توں آہو آہو آکھ
(بابا بلھے شاہ )
ہور ٹ ک - لکھ لکھ بدیاں تے سو طعنے سبھو سر تے سہینے (شاہ حسین )


130
عشق اسانوں لسیاں جاتا بیٹھا مار پتھلا ہُو
وچ جگر دے سنھ چا لائیں کیتس کم اولا ہُو
جاں وڑ اندر جھاتی پائی ڈٹھا یار اکلا ہُو
باجھوں مرشد کامل باہُو ہوندی نہیں تسلا ہُو

اوکھے لفظاں دے معنے
لسیاں =لسے ہوون دی حالت وچ
لساّ= لساّ ماڑا - کمزور-نربل - نمانا - ٹ ک 131
جاتا =جانیا -سمجھ لیا
پتھلا =دھرنا مار کے بہہ کے
سنھ =نقب -چوری کرن لئی کندھ پاڑ کے کیتا گیا مورا
لائیں =اوہنے لادتی سی
کیتس =اوہنے کر دتا سی
اولا=ٹ ک 1
جاں = جدوں
تسلا= تسلی-(پنجابی وچ تسلی نوں تسلا آکھدے تے مونث ورتدے نیں )


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels