Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 140-131

ابیات باہو 140-131

سلطان باہو
February 5th, 2008


131
عشق اسانوں لسیاں جاتا کر کر آوے دھائی ہُو
جت ول ویکھاں عشق دسیوے خالی جگہ نہ کائی ہُو
مرشد کامل ایسا ملیا دل دی تاکی لاہی ہُو
میں قربان اس مرشد باہو دسیا بھیت الہی ہُو

اوکھے لفظاں دے معنے
لسیاں = ٹ ک 130
جاتا=ٹ ک 130
کر کر آوے دھائی = حملے دی نیت نال بھج کے آندا اے
دھائی کرنا =دھاوا بولنا۔ بھج کے حملہ کرنا
تاکی =طاقی -لکڑی دی چھوٹی باری نکی کھڑکی
دل دی تاکی لاہی=دل نوں پاہر دی ساری دنیا دکھائی ضمیر نوں روشن کیتا سارے گجھے بھیت دس دتے ہر دے دے پٹ کھولے
ٹ ک = کھلے تنہاں دے باب قلوب اندر جنہاں کیاتا ہے عشق قبول میاں (ہ ۔ و۔ بند 1)


132
عشق اسانوں لسیاں جاتا لتھا مل مہاڑی ہُو
نہ سوویں نہ سوون دیوے جیویں بال ریہاڑی ہُو
پوہ مانگھیں خربوزے منگے کھتوں لیئساں واڑی ہُو
عقل فکر بھل گی
اں باہو عشق وجائی تاڑی ہُو

اوکھے لفظاں دے معنے
لسیاں =ٹ ک 131
جاتا =ٹ ک 131
لتھا=(لہنا دا ماضی مطلق ) آنزل ہویا - آن لتھا - آڈیرا لایا
آ نازل ہویا =آن اپڑیا
ملنا =زبردستی قبضہ کر کے بہ گیا اے۔
مہاڑی =دروازے دی دوہاں پاسیاں دی کندھ
مہاڑی ملنا =(1) بوہا مل کے بہہ جانا (2) پہاڑاں توں اتر کے میدانی علاقے و چ ڈیرا لاؤنا (میدانی آبادی دے بوہے آبہنا کہ اوہ باہر نہ نکل سکے )
ریہاڑی بال =مانگھ دے مہنیے وچ
لیئساں =میں لیاواں گا
واڑی =خربوزیاں دی پیلی
عقل فکر=..... عقل تے سوچ دیاں گلاں باتاں بھل گئیاں ۔
تاڑٰ وجاؤنا=پھکڑی لانا تہمت لانا-ملامت پاروں اوئے کرنا
عشق وجائی =....عقل فکر دی ناکامی اتے عشق نے خوش ہوکے تاڑی وجا دتی


133
عشق جنہاندے ہڈین رچیا رہندے چپ چپاتے ہُو
لوں لوں دے وچ لکھ زباناں پھردے گنگے باتے ہُو
کردے وضو اسم اعظم دا دریا وحدت نہاتے ہُو
تدوں قبول نمازاں باہو یاراں یار پچھاتے ہُو

اوکھے لفظاں دے معنے
ہڈیں رچیا=لوں لوں دے وچ رچ وس گیا ۔ پوری شخصیت وچ سرایت کر گیا
لوں لوں =ٹ ک 19
باتے =لکنت والے -تھتھے
کردے وضو=.....اسم اعظم پڑھ پڑھ کے پاک ہو جاندے نیں
اسم اعظم =ٹ ک 112
پچھاتے=پچھان لئے ٹ ک مَن عَرَفَ نَفَسَہُ فَقَد عَرَفَ رَبُّہُ
یاراں یار پچھاتے =بندے نے اپنے رب دی پچھان کر لئی وحدت الوجود من کے اک مک ہو گئے


134
عشق چلایا طرف اسماناں فرشوں عرش وکھایا ہُو
رہ نی دینا ٹھیک نہ سانوں اگے جی گھبرایا ہُو
اسیں پردیسی وطن دوراڈا کوڑا لالچ لایاہُو
مر گئے مرن تھیں پہلے باہو تنہاں رب نوں پایا ہُو

اوکھے لفظاں دے معنے
چلایا =ٹوریا -روانہ کر دتا
فرشوں = فرش توں لے جاکے -دھرتی توں عرش ول لے جا کے ( حضور دے معراج شریف ول اشارہ اے )
رہ نی دنیا =اے دنیا پر انہہ ہٹ جا دور ہو جا -اسیں تیرے نال تعلق توں باز آئے (دنیا ہمیشہ بندے نوں کرہے پاندی اے پورا پورا دنیا دار جدوں اپنے ضمیر دے خلاف کم کردا اے ۔تے اوہنوں انج محسوس ہوندا اے جیویں اوہ عرشوں فرش ول پندھ کر رہیا اے۔ اپنی اصل توں دو ریڈا ہو رہیا اے )
جی گھبرایا=روح بے چین اے
کوڑا =جھوٹھا
مرگئے مر ن تھیں پہلے =.....ٹ ک مُو تُو ا قَبلَ اَن تَمُوتُو ا


135
عشق حقیقی جنہاں پایا مونہوں نہ کجھ الاون ہُو
دم دم دے وچ آکھن مولا دم نوں قید لگاون ہُو
سروری ۔ قادری۔خقی۔ خفائی۔ سّری ذکر کماون ہُو
قربان تنہاں توں باہو جہیڑے ہک نگہ وچ آون ہُو

اوکھے لفظاں دے معنے
پایا =عشق دی اصل حقیقیت حاصل کر لئی -حقیقت سمجھ گئے
نہ کجھ الاون =مونہوں کجھ نہیں بولدے
دم دم =ہر ساہ نال
دم نوں قید لگاون =ٹ ک 60
سروری قادری = دریشاں دے خنوادیاں موجب اوہناں دے ذکر کرن دے طریقے
خفی - سری=ذکر کرن دے خاص طریقے ٹ ک 60- ٹ ک سر دلبراں
ہک نگہ وچ آون = حقیقی عشق پان والے -تے ذکر کماون والے درویشاں دا مرتبہ ایتھوں تائیں اپڑ جاندا اے کہ اوہ اک پلک جھمکن دے سمے وچ مدد لئی اپڑ جاندے نیں


136
عشق محبت دے دریا وچ تھی مردانے ترئیے ہُو
جتھے لہر غضب دیاں ٹھاٹھاں قدم اتھائیں دھریئے ہُو
اوجھڑ جھنگ بلائیں بیلے وِکّھو ویکھ نہ ڈریئے ہُو
نام فقیر تد تھیندا باہو وچ طلب جد مریئے ہُو

اوکھے لفظاں دے معنے
مردانے= ٹ ک 70
دریا(ف ) =سمندر
اتھائیں =ٹ ک 4
اوجھڑ =ٹ ک 15
جھنگ =دریا دے کنڈھے اگے رکھاں دا جھنڈ -جھنگی
بیلا =ٹ ک 15
وکھ=بچھو-زہریلے جانور (بش -بس =وکھ )
تدائیں =اوس صورت وچ ای
ٹھاٹھ =پانی دی زور دار لہر
تھیندا=بنیا جاندا اے ۔ ہویا جاندا اے (تد دی دال تولوں گھٹے گی )
طلب =منگ - چاہت - لوڑوندی - نیاز مندی


137
عشق دی بازی ہر جا کھیڈی شاہ گدا سلطاناں ہُو
عالم فاضل عاقل دانا کردا چا حیرانا ہُو
تنیو کھوڑ لتھا وچ دل دے جوڑیس خلوت خانہ ہُو
عشق امیر فقیر منیندے باہو کون بیگانہ ہُو

اوکھے لفظاں دے معنے
بازی=کھیڈ وچ کسے کھڈاری دی اک واری
ہر جا =ہر تھاں تے
عالم فاضل =.....عشق عالم فاضل سوجھو اناں دانشمنداں نوں عقل دانائی بھلا کے حیران کر دیندا اے۔
ٹ ک من میگل ساکت دیوانہ -بن کنڈ مایا موہ حیرانا ۔ گ ص -(آسا محلہ
I)
تنبو =خیمے ڈیرے
کھوڑ =گڈ کے
(ٹ ک سندھی مصدر کھوڑن ) گدنا -زمین وچ ھوبھ کے سدھا کھلا کرنا
لتھا =نازل ہویا -پڑاں تے اتریا -تنیواں دا ڈیرا لایا
جوڑئیں =اوہنے بنادتا - قائم کر دتا
خلوت خانہ =اکلو انجے ڈیرا
عشق امیر =.....فقیر لوک ای عشق نوں اپنا امیر سلطان اکو مندے نیں
حضرت باہو ایہناں نالوں وکھرے اڈرے نہیں اوہ دی فقیری دا بھیت جاندے نین تے عشق نوں اپنا امیر مندے نیں
امیر =حاکم سلطان ، صدر -پر دھان -آگو -قائد ٹ ک برہا تو سلطان (بابا فرید )
منیندے =مندے نیں
بیگانہ =ٹ ک 44

138
عشق دی بھاہ ہڈاں دا بالن عاشق بیٹھ سکیندے ہُو
گھت کے جان جگر وچ آرا ویکھ کباب تلیندے ہُو
سر گردان پھرن ہر ویلے خون جگر دا پیندے ہُو
ہوئے ہزاراں عاشق باہو عشق نصیب کہیں دے ہُو

اوکھے لفظاں دے معنے
بھاہ =اگ عاشق لوک بہ کے عشق وی اگ سیک رہے نیں ایس اگ وچ اوہناں دے اپنے ہڈاں دا بالن بل رہیا اے
جان جگر وچ آرا گھت کے =کباب تلن توں پہلاں گوشت وچ مرچ مصالحے چنگی طرحاں رچان لئی بوٹیاں وچ آرسوئے ورگی شے کھوبی جاندی اے۔ پھیر مرچ مصالحے دا مرکب بوٹیاں تے دھوڑ کے بوٹیاں نوں ہتھاں وچ ملیا جاندا اے۔ْ ایس عمل مگروں مصالحے گوشت دے چھوٹے توں چھوٹے بیرے تک دی پہنچ جاندے نیں تے کباب دا چھوٹے توں چھوٹا ٹکڑا وی سوادلا تھی ویندا اے۔ عاشق لوک وی اپبے جان جگر نال ایہو سلوک کر یرے نیں
(جے ترکھان والا آرا ہوندا تے پھیر جان جگر آرے بیٹھ یا آرے تھلے لکھیا جاندا ایس لئی
shoe maker knife دا زیادہ امکان
(ہندی وچ آدا ہری ادرک نوں آکھدے نیں کباب دی رعایت نال ایس دا وی امکان اے )
کہیں دے =کسے کسے دے۔ کسےورلے بندے دے
سر گرداں =حیران پریشان
عاشقی دا دعوی کرن ولاے تے ہزاراں بندے ہوئے نیں پر عشق کمانا کسے ورلے دے نصیباںوچ ہوندا اے۔ عشق کماون لئی ایہہ کجھ کرنا پیندا اے۔ جو ڈاہڈا اوکھا کم اے ۔ داہ دی کسی وی اوکڑ نوں نہ ڈولنا ۔ ہر کم محبوب دی رضا مطابق کرنا ........عاشق دا محبوب دی ذات وچ فنا ہو جاؤنا

139
ع۔ عشق دیاں گلاں اولڑیاں شرع تھیں دور ہٹاوے ہُو
قاضی چھوڑ قضائیں جاون جد طمانچہ لاوے ہُو
لوک ایانے متیں دیون عاشقاں مت نہ بھاوے ہُو
مڑن محال تنہاں نوں باہو جنہاں آپ بلاوے ہُو

اوکھے لفظاں دے معنے
اولڑیاں =عجیب زمانے دی عام چال توں ہٹویاں ستو پٹھیاں
شرع =(1) شریعت محمد (2) کھلا واضح رستہ (3) عادت (چالو ویہار)
قاضی=جج-نیانو کرن والے
قضائیں =قضاع مصنفی دا پیشہ -نیانو نبیٹرن دا کم
ٹ ک =حضرت قاضی حمید الدین ناگوری ہوراں 3سال تائےں ناگوری قضاء کیتی مگروں دنیا تے لت مار کے بغداد شریف وگ گئے تے اوتھے حضرتشہاب الدین سہرور دی دی بیعت کیتی ۔ پھر مرشد دی آگیا نال قاضی صاحب مدینہ منورہ آئے تے نبی کریم دے روضہ پاک دی جماوری کیتی (بزم صوفیاء )
طمانچہ =منہ تے زور دار تھپڑ -ہتھ دی سٹ
ایانے =انجان -بے وقوف
متیں دیون =پند نصیحت کرن -عشق توں ڈکن ( مورن -ہنکن -ہوڑن )
نہ بھاوے =چنگی نہیں لگدی۔ بری محسوس ہندی اے
مڑن =واپس آجاون - عشق توں باز آجاون
آپ =خود مالک (ایتھے مراد ) رب تعالی ٹ ک 156
محال =بہت مشکل - ناممکن

140
عشق سمندر چڑھ گیا فلکیں کت ول جہاز کِچیوے ہُو
عقل فکر دی ڈونڈی نوں چا پہلے پُور بُوڑِیوے ہُو
کڑکن کپر پون لہراں جد وحدت وچ وڑِیوے ہُو
مرنے تھیں خلقت ڈردی باہو عاشق مرے تاں جیوے ہُو

اوکھے لفظاں دے معنے
فلکیں = اسماناں تے
کت ول =کیہٹرے پاسے
جہاز = وڈا بھارا بیڑا
کچیوے = کیتا ونجے -کیتا جانا چاہیدا اے
ڈونڈی = چھوٹی جیہی بیڑی
پور= ٹ ک 103
کپر =ٹ ک 108
وحدت وچ =وحدت دے دریا وچ
وڑیوے =داخل ہووے
مرنا = موت دا وقوعہ
تاں جیوے = پھیر اوہ زندہ جاوید (امر ) ہو جاندا اے
بوڑیوے دا فاعل عشق اے تے وڑیوے دا فاعل رہا نے راہ دا پاندھی سالک اے )



 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels