Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 150-141

ابیات باہو 150-141

سلطان باہو
February 5th, 2008
5 / 5 (1 Votes)


141
عشق ماھی دے لائیاں اگیں لگیاں کون بجھاوے ہُو
میں کیہ جاناں ذات عشق دی در در جا جھکاوے ہُو
نہ سوویں نہ سوون دیوے ستیاں آن جگاوے ہُو
میں قربان تنہاں دے باہو وچھڑے یار ملاوے ہُو

اوکھے لفظاں دے معنے
ماہی=حقیقی محبوب
در در =بوہے بویے تھاں تھاں تے
چھکاوے =نیویاں کرے =ٹ ک جھک =نیوان-جھکا = نیواں
ستیاں آن =.......سگون ستیاں نوں آجگاندا اے ۔ آرام نہیں کرن دیندا
تنہاں = اوہناں
ملادے =جمع ملاوا دی -میل
وچھڑے یار ملاوے =جیہڑے وچھڑے یاراں دا ملاپ کراندے نیں (تنہاں جمع اے -ایس لئی ملادے دی جمع ای ورتیا گیا اے )


142
عشق مؤذن دتیاں بانگاں کنیں بلیل پیو سے ہُو
خون جگر دا کڈھ کراہاں وضو پاک سزیوسے ہُو
سن تکبیر فنائے والی مڑن محال تھیوسے ہُو
پڑھ تکبیر تھیوسے واصل باہو شکر کیتوسے ہُو

اوکھے لفظاں دے معنے
مؤذن = بانگا - اذان دین والا-بانگ نال نماز پڑھن لئی مسینے پلاون والا
کنیں بلیل پیوسے =ساڈے کناں وچ ہولی جیہی آواز آئی سی
کڈھ کراہاں = کڈھ کے ای
وضو پاک =سزیوسے = ٹ ک 122-اساں وضو پاک سازیا سی
تکبیر =اذان سے پہلے لفظ اللہ اکبر - اللہ اکبر آکھنا
مڑن محال تھیوسے =ساڈے لئی عشق دی نماز پڑھن تون باز رہنا مشکل ہوگیا ۔ تکبیر سن کےت عشق دی نماز نیتنا لازمی ہوگیا ۔
واصل تھیوسے =اسیں اللہ نال واصل ہوگئے
شکر کیتوسے =اساں اللہ پاک دا شکر کیتا


143
عقل فکر دی جاء نہ کائی وحدت سر سبحانی ہُو
نہ اُتھ ملاں پنڈت جوشی نہ اتھ علم قرآنی ہُو
احمد احد وکھالی ڈتا تاں کل ہوئے فانی ہُو
علم تمام کیتوسے باہو ٹھپ کتاب اسمانی ہُو

اوکھے لفظاں دے معنے
جا = تھاں
کائی = کوئی
سر =بھیت
جت وحدت سر سبحانی =جتھے اللہ سبحانہ و تعالی دی وحدت دا بھیت ہوندا اے
اتھ =اوتھے
جوشی= جوتشی =ستاریاں دے علم دا جانو۔ قسمت دا حال وسن والا برہمناں دی اک ذات
کل =ملاں پنڈت جوشی (سنے اپنے سارے علم دے)
تمام کرنا =پورا کرنا -مکادینا -کجھ باقی نہ چھڈنا
کتیوے =کیتا جاندا اے
ٹھپ =ٹھپ کے بناں پڑھیاں
اسمانی کتاباں = قرآن شریف-توریت -زبور انجیل -ایہہ ساریاں کتاباں اسم اللہ دی تشریح دسدیاں نیں ۔ جدون اسم اللہ اسم ذات دا عرفان حاصل ہو جاندا اے تے ہور کسے تشریح دی لوڑ نہں رہ جاندی


144
ع۔ علموں کوئی فقر کماوے کافر مرے دیوانہ ہُو
سئے ورھیاں وی کرے عبادت اللہ کنوں بیگانہ ہُو
غفلت کنوں نہ کھلیس پردے دل جاہل بت خانہ ہُو
قربان تنہاں تون باہو جناں ملیا یار یگانہ ہُو

اوکھے لفظاں دے معنے
علمے =علم (ایس علاقے دی پنجانی بولی وچ وادھو "ے" دیاں کئی مثالاں ملدیاں نیں -منہے بیت 4، سجودے بیت 13دلے - بیت نمبر 78,161 ربے بیت 90
فقر =ٹ ک 22
سئے ورہیاں = کئی سینکڑے سال
بیگانہ =(1) اپنائیت نوں وانججھیا ہویا۔ دوریڈا ۔ وکھرا۔ اڈرا جس مال دل دا بھیت سانجھانہ کیتا جاسکے (2) فقر تے عشق توں نامحرم
کنوں =(1) کولوں ۔ توں (2) پاروں ۔ دی وجہ توں
نہ کھلیس پردے =......اوہدے پردے نہیں کھلے ۔ حجاب دور نہیں ہوئے
بت خانہ = غیر اللہ دی عبادت دا گھر
دل جاہل بت خانہ = جاہل بت خانے دی صفت نہیں سگوں دل دی اے یعنی جاہل دل یا جاہل دا دل
یگانہ =(1) اجیہا اک جیہدے نال دا کوئی دوجانہ ہووے اکو ای ۔ واحد بے نظیر اپنی مثال آپ منفرد۔ لاثانی ۔ ٹ ک 206(2) اپنا۔ نیڑے دا ۔ سکا ۔ محبوب حقیقی


145
غوث قطب ہن اُرے اُریرے عاشق جان اگیرے ہُو
جیہڑی منزل عاشق پہنچن غوث نہ پاون پھیرے ہُو
عاشق وچ وصال دے رہندے لامکانیں ڈیرے ہُو
قربان تنہاں توں باہو جنہاں ذاتو ذات بسیرے ہُو

اوکھے لفظاں دے معنے
اُرے اُریرے=اُرانہہ ای بالکل ای نیڑے عاشقں توں بہت ای پچھاانہہ
غوث قطب =.........عاشق دی پہنچ رسائی -ڈھوئی پرواز غوث قطب نالو دی اگے ہوندی اے ، ٹ ک 172
اگیرے=ٹ ک 50
وصال =ملاپ ۔ اک ہک ہوون دی حالت
لامکانی = ٹ ک 4
ذاتو ذات بسیرے = جہیڑے فنا فی اللہ تھی گئے نیںَ غیر اللہ مٹ گیا اے۔ رب نال اک ہک ہو گئے نیں



146

فجری ویلے وقت سویلے آن کرن مزدوری ہُو
کانواں ہِلاں ہکسے گلاں ترِیجی رلی چندُوڑی ہُو
گھر سوارن کرن مشقت پُٹ پُٹ سٹن انگُوری ہُو
عُمر پٹیندیاں گذری باہُو کدی نہ پئی آ پُوری ہو


اوکھے لفظاں دے معنے

فجری ویلے=فجر ویلے -علی الصبح (مقامی بولی پاروں "ی"وادھواے )
سویلا=چنگا ویلا- سویرا
مزدوری =اللہ دی حب عشق وچ اللہ نوں یار کرن دا سوادتے طریقہ ہور اے۔ تے ذاتی غرضاں واسطے اگلے پاسیوں جزا دی آس تے عبادت کرن دا عمل تے طریقہ مزدوری گانل رلدا ملدا اے ایس بیت وچ سویرے سویرے عبادت کرن والے انساناں نوں تناں پنچھیاں نال تشبیہ دتی گئی اے
-1کاں جو چوکھا رولا پاندا اے حرام حلال دی کوئی تمیز نہیں کردا
-2ہلاں =الاں -چیلاں ، ایہہ مردار کھاون اولا اک پنچھی اے۔ جو باز وانگوں آپ شکار نہیں کردا سگوں مردار ڈھور ڈنگراں دا ماس کھان واسطے ساریاں الاں اکٹھیاں ہو جاندیاں نیں
-3چنڈوری یا چنڈول اک اجہیا پنکھی اے جہیڑا کساناں دی کیتی کتری گواندا اے تے
انگوری (نویں اگی فصل دے بی وچوں نکلے سلو جہیڑے دھرتی دا سینہ پاڑ کے باہر آوندے نیں )
پٹ پٹ کے باہر سٹ دیندا اے تہ زمین وچوں نکلے سلودے مڈھوں گلے ہوئے نرم بی نوں کھاندا اے۔ سو سویر ویلے چوکھا رولا پاکے وکھاوے دی عبادت کرن والے ظاہر پرست لوگ ایہناں تناں پنچھیاں وچوں کسے اگ نال ملدے جلدے کردار ہوندے نیں اجہیے لوکاں دی ساری حیاتی ایسے طرحاں دے ورلے تے دکھاوے دی عبادت وچ لنگھ وی جاوے تاں وی اوہناں دی عبادت دا کوئی سٹا نہیں ٹکدا ۔ اوہناں دی پوری نہیں پیندی اوہ ہمیشہ گھاٹے وچ رہندے نیں تے اتوں توں اوہ کجھ لوکاں وچ مقبول دی ہو جاندے نیں پر اوہناں دے اپنے دل دا کھوٹ اوہناں نوں دلی سکون نصیب نہیں ہوون دیندا


147
فکر کنوں کرذکر ہمیشہ ایہہ تکھا تلواروں ہُو
ذاکر سوئی ذکر کماون -پلک نہ فارغ یاروں ہُو
عشق دا پٹیا کوئی نہ چھٹیا پٹیا مڈھ پہاڑوں ہُو
حق دا کلمہ عاشق پڑھدے باہو فقر دے پاروں ہُو

اوکھے لفظاں دے معنے
ایس بیت دا مقابلہ بیت 96نال کر لیا جاوے
اوہدے وچ ذکر نالوں پہلے نمبر تے منھیا گیا اے۔ جدوں کہ ایس بیت وچ پھیر ذکر نوں ای اولیت دتی گئی اے۔ میرا خیال اے کہ ذکر تے فکر نوں وکھ وکھ کیتا ای نہیں جا سکدا ۔ ذکر فکر باجھوں بے جان اے تے کلا فکر دی دراصل گجھا ذکر ای اے
فقر دے پاروں= فقر دی وجہ نوں۔ فقر دے کرم نال ای


148
قلب تاں ہلیا کیا ہویا کیا ہویا ذکر زبانی ہُو
قلبی روحی ۔ خفی۔ سرّی سبھے راہ حیرانی ہُو
شہ رگ توں نزدیک جلیندا یار نہ ملیوس جانی ہُو
نام فقیر تنہاں دا باہو وسدے لا مکانیں ہُو

اوکھے لفظاں دے معنے
ذکر کرن لگیاں فقراں دا قلب جاری ہو جاندا اے تے ذکر وچ شامل ہو جاندا ےا سلطان العارفین فرمندے نیں کہ عشق باجھوں قلب ہلن تے زبانی کلامی ذکر کرن دا فقر دی دینا وچ کوئی فائدہ نہیں
قلبی روحی .........ٹ ک 60(انج دے سارے ذکر حیرانی دی راہ نیں
حیرانی =حیرت ۔ حقیقت دا چانن ہوون تے ہکا بکا رہ جانا۔
شہ رک =گردن دی رگ ۔ خون دی وڈی نالی جہدے اُتے زندگی دا دا رومدار اے
ٹ ک نَحنُ اقَرَبُ اَلیَہِ مَن حَبلِ الوَرِیدِ ٹ ک ق م 50/16
جلیندا =ٹ ک 14
جانی =ٹ ک 94
لامکانیں =لا مکان وچ ٹ ک 4

149
کامل مرشد ہووے جیہڑا دھوبی وانگوں چھٹے ہُو
نال نگاہ دے پاک کرے سجی صابون نہ گھتے ہُو
میلیاں نوں کر دیوے چٹا ذرّہ میل نہ رکّھے ہُو
مرشد ہووے باہو جیہڑا لوں لوں دے وچ وسے ہُو

اوکھے لفظاں دے معنے
چھٹنا =پٹٹرے اُتے مار مار کے کپڑے دے انگ انگ وچوں میل کڈھنا
سجی =کھار -لانے دے بوٹے دی سواہ
صبون = کپڑے دھون والا صابن
میلے = گناہ گار ۔ کھوٹی نیت والے ۔ پاپی
لوں لوںوچ وسنا =مرید دی پوری شخصیت کہنی تے کرنی اُتے چھا جاونا۔ پیر مرشد دا کدے اوہلے نہ ہونا۔


150
کر محنت کجھ حاصل ہووی عمرا چار دیہاڑے ہُو
تھی سوداگر کر لے سودا جاں جاں ہٹ نہ تاڑے ہُو
مت جانیں دل ذوق منیسی موت مریندی دھاڑے ہُو
چوراں سادھاں پور بھریا باہو رب سلامت چاڑھے ہُو

اوکھے لفظاں دے معنے
محنت =ریاضت ۔ تپسیا ۔ جان نوں اوکھیائی دے کے چنگے نتیجے واسطے کیتا گیا کوئی کم
حاصل =کھیتی توں اکٹھی کیتی گئی جنس ۔ پھل ۔ نتیجہ
تھی سوداگر =صیحح معنیاں دا بیوپاری بن جا
جاں جاں =جنا چرتائیں
ہٹ نہ تاڑے =دکاندار اپنی دکان مند نہیں کر لیندا
مت =1. نہ -2شائد خدا کرے -3متاں ۔ مبادا
ذوق ماننا=زہد چھڈ کے جیون دے سواد انند لینا ۔ عیش عشرت ۔ والا جیون بھوگنا
مت جانیں ..........کدھرے ایہ نہ جان لیس پئی میرا دل ذوق دا آنند ماں لے گا
دھاڑے =ڈاکے
چوراں سادھاں =اک دوجے دے الت سوچ رکھن ولاے جنہاں دے راہ کھرے وکھرے نیں۔
بندے دے دل اندروں رحمانی تے شیطانی دونویںطرحاں دے خیال اٹھ سکدے نیں نفس امارہ تے روح دے تقاضے اک دوجے توں الٹ نیں
ر=ت ک 103
رب سلامت =........جدوں بیڑی دے پور وچ سواریاں بیڑی نوں اپنی اپنی اڈو اڈری منزل ول ھریک رہیاں ہون تے بیڑی دارب ای راکھا ہوندا اے


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels