Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 180-171

ابیات باہو 180-171

سلطان باہو
February 5th, 2008


171
مرشد اوہ سہیڑئیے جہیڑا دوجگ خوشی وکھاوے ہُو
پہلے غم ٹکڑے دا میٹے رب دا راہ سجھاوے ہُو
کلر والی کندھی نوں چا چاندی خاص بناوے ہُو
جس اِتھ کجھ نہ کیتا باہو کوڑے لارے لاوے ہُو

اوکھے لفظاں دے معنے
سہیڑنا=چوکھی کھوج بھال مگروں لبھ لیاونا تے اوہنوں اپنا بنا لینا ٹ ک ہ -و-بند 94,11
دوجگ =ایس دنیا وچ تے عاقبت وچ
ٹکڑے دا غم =روزی -روزگار دا مسئلہ
بجھاوے=دکھاوے (دوجے مصرعے وچ سمجھاوے دی تھاں سجھاوے دے امکان تے وی غور ہوسکدا اے )
کلر =شور
کلر والی کندھی =مٹی دا سریر
کندھی =چھوٹی جیہی کندھ ۔ ٹ ک کلر کیری کندھ جیوں ایہ نس کر ڈھیہ پاء (بابا فرید )
(کلر ہولی ہولی کندھ نوں کھاندا رہندا اے
ایہنوں فنا دے عمل وچوں لنکھاندا اے )
اتھ =ایتھے ایس جہان وچ
کوڑے =جھوٹھے
لارے =اگلے جہان پار اتارن دے جھوٹے وعدے


172
مرشد باجھوں فقر کماون وچ کفر دے بُڈے ہُو
ہو مشائخ بہندے حجرے غوث قطب بن اُڈّے ہُو
رات اندھاری مشکل پینڈا سئے سئے آون ٹُھڈے ہُو
تسبیحاں نپ بہن مسیتیں مُوش باہو جیوں کُھڈّے ہُو

اوکھے لفظاں دے معنے
مرشد =ٹ ک 7
فقر =ٹ ک 22
کفر=رب دی ذات دا انکار -اسلام دا انکاری ہوونا کسے حقیقت نوں اکھیں ویکھدیاں ہویاں وی اوہدا صاف انکاری ہونا
بڈنا =ڈبنا
مشائخ= ٹ ک 3
غوث =پورے صوبے دا روحانی حاکم
ٹ ک =باہیاںقطباں وچ ہے پیر کامل جیندی عاجزی زہد منظور ہے جی -
ہ -وبند 5
قطب دا اختیار ویکھن لئی -ٹ ک ۔ سلطان علاوالدین خلیجی دے ناں حضرت بو علی قلندر پانی پتی دا رقعہ علاؤالدین شحئہ دیلی را اعلام آنکہ خواجہ رسرائے یکے از درویشان مرا رنجایند عرش الرحمن رابلرزہ آورد۔ اگر اور ابہ سزا رسایندی بہتر الا بجائے تو سحنہ دیگر بد ہلی نشانیداہ خواہد شد (بزم صوفیہ ص 247
غوث قطب بن اڈے =بے شک اوہ اپنے غوث یا قطب ہوون دا دوعوی کرن یا اڈکے دوجے تھاں اپڑن دا وی دعوی کیوں نہ کرن اندھاری=انھیری
سئے سئے =کئی سینکڑے
ٹھڈے =تھیڈا ۔ راہ وچوں کسے شے نال وج کے پیراں نوں لگی ٹھوکر کراہے پین نال لگی سٹ
موش =چوہا
کھڈے=کھڈ وچ
ایس بیت وچ شیخ پیر مرشد دی اہمیت لوڑاتے چانن گھیتا گیا اے


173
مرشد مکہ طالب حاجی کعبہ عشق بنایا ہُو
وچ حضور سدا ہر ویلے کرئیے حج سوایا ہُو
ہک دم میتھوں جدا نہ ہووے دل ملنے تے آیا ہُو
مرشد عین حیاتی باہو لوں لوں وچ سمایا ہُو

اوکھے لفظاں دے معنے
مرشد =ٹ ک 7
طالب =ٹ ک 1
حضور =رسول کریم دی حاضری پیشی
ہک دم =اک لمحہ ۔ ساہ لین جنا سماں
جدا نہ ہووے=......اک دم لئی وی مرشد دا خیال یا تصور مینھوں وکھ ہو دکدا ۔ ہر ویلے میرے دل نوں ملن دی چاہت ہرندی اے ٹ ک 19
عین حیاتی =سگواں جیون اے -بالکل زندگی دے برابر اے -اوہدے باجھوں بے سوا دا جیون کاہدا جیون اے
لوں لوں =ٹ ک 19


174
مرشد میرا شہباز الہی رلیا سنگ حبیباں ہُو
تقدیر الہی چھکیاں ڈوراں ملسی نال نصیباں ہُو
کوہڑیاں دے دکھ دور کریندا کرے شفا غریباں ہُو
مرض دا دارو توں ہیں باہو گھتنائیں وس طبیباں ہُو

اوکھے لفظاں دے معنے
شہباز =ٹ ک 104
ونج رلیا=جا کے مل گیا اے
مرشد میرا =.......میرا مرشد اللہ دا شہباز اے
سنگ =صحبت سنگت وچ
جیباں =اللہ دے دوستاںرسول کریم دی صحبت مجلس وچ شامل ہوگیا اے -اوہدی ڈور الہی تقدیر دے ہتھ وس اے -مینوں ہن نصیباں نال ای ملے گا۔
کوہڑیاں دے =.......اوہ جزام -کوڑھ
Lepresy دے روگیاں نوں شفا بخشدا اے
غریب =پردیسی (مرن چھیج تے پیا دوجے دیس نوں ٹرن لئی تیار روگی )
دارو =علاج ۔ اپا میرے روگ دا دارو توں آپ ای ایں سانوں دوجے دید حکیم ڈاکڑاں دے وس کیوں پانا ایں ۔



175
مرشد مینوں حج مکے دا رحمت دا دروازہ ہُو
کراں طواف دوالے قبلے نت ہووے حج تازہ ہُو
کن فیکون جدوکا سنیا مرشد دا آوازہ ہُو
مرشد سدا حیاتی باہو اوہو خضر خوازہ ہُو

اوکھے لفظاں دے معنے
مرشد =ٹ ک 7
مینوں =میرے لئی
حج =ٹ ک 19
رحمت دا =.....اللہ دی رحمت میرے تائیں ایس دروازے وچوں لنگھ کے آدنی ایں
قبلے =1کعبہ دی سمت -2انتہائی تعظم دے قابل ہستی
کن فیکون=ٹ ک 158
جدو کا =جدوں دا
کن فیکون کدو کا =......ساڈے اتے تے کن فیکون اودوں دا واپریا اے جدوں دا اساں اپنے مرشد دا اوازہ (امر ) سنیا اے
سدا حیاتی ۔ حیات جا وداں =ہمیشہ دا جیون ۔ مینوں خواجہ خضر تے اوہدے آب حیات دی کوئی لوڑ نہیں اوہ آپ ای خواجہ خضر اے تے آب حیات پی کے امر ہو چکا اے-(خواجہ خضر دا کم بھلے نوں راہے پانا اے-یا آب حیات دا چشمہ وکھانا اے -ایہ دونویں کم میرا مرشد کر سکدا اے


176
مرشد وانگ سُنارے ہووے گھت کٹھالی گالے ہُو
پا کٹھالی باہر کڈھے بُندے گھڑے یا والے ہُو
کنیں خوباں تدوں سہاون کھٹے پا اجالے ہُو
نام فقیر تنہاں دا باہو جیہڑا دوست سمھالے ہُو

اوکھے لفظاں دے معنے
مرشد =ٹ ک 7
گھت=پاکے
کٹھالی =متی دی کجی جس وچ سنیارے سونا چاندی وغیرہ پاکے اگ دے سیک تے دھر کے گالدے نیں -سیک نال دھاتاں ٹھوس توں مائع ہو کے اپنی سختی چھڈ کے نرم ہو ویندیاں نیں تے نویں شکل قبول کرن لئی تیار ہو جاندیاں نیں-
بندے =کانٹیاں ورگا کناں دا گہنا
والے =بالے - کناں دا گہنا جو دائرے وانگوں گول (رنگ ) ہوندا اے -
بندے گھڑے =.......مرشد دی مرضی اے -مرید نوں جیہڑی من بھاوندی شکل وچ تبدیل کر لوے۔ ٹ ک گھاڑو 66
خوباں =محبوب -سوہنے
سہاون=سجن -زیب دین -پھبن
کھٹے =تیزاب کھٹائی دا محلول جہدے وچ میلے گہنے اجالن واسطے گھتے جاندے نیں
اُجالنا=اجلا کرنا۔ گند مند لاہ کے صاف کرنا -اصل رنگت وچ لیاونا -چمکدار بناونا
سمھالنا=سنبھالنا-کسے شے دی قدر -پچھان -اگھ اہمیت دے مطابق اوہنوں سانبھ کے رکھنا -جنی قیمتی سے ہووے گی اوہو جیہے تھاں سنبھالی جاوے گی -دوست محبوب خدا دا تھاں دل اے ۔ ٹ ک 84


177
مرشد وسّے
سئے کوہاں تے مینوں دسّے نیڑے ہُو
کیہ ہویا بت اوہلے ہویا وسّے اوہ وچ میرے ہُو
جنہاں ذات سہی چا کیتی رکھدے قدم اگیرے ہُو
نحنُ اَقرَبُ لبھیوسے باہو جھگڑے گل نبیڑے ہُو

اوکھے لفظاں دے معنے
مرشد =ت ک 7
سئے =سینکڑے
کوہ =ٹ ک 160
بت =جسم ٹ ک 158
سہی کرنا =ٹ ک 3
اگیرے=ہور انانہہ
نَحنُ اَقرَب =ٹ ک ق م 50/16
ٹ ک =
ہر کہ پیر و ذات حق را یک را یک نہ دید
نے مریدو نے مریدو نے مرید
(مولانا روم)


178
مرشد ہادی سبق پڑھایا پڑھیوں بنا پڑھیوے ہُو
انگلیاں وچ کناں دتیاں سُنیوں بنا سُنیوے ہُو
نین نیناں ول تر تر تکدے ڈٹھیوں بنا ڈسیوے ہُو
ہر خانے وچ وسدا باہُو کن سر اوہ رکھیوے ہُو

اوکھے لفظاں دے معنے
پڑھیوں بنا=قلب جاری ہو جاوے تے اللہ دا ذکر آپے ای جاری رہندا اے
نگلیاں وچ =.......ٹ ک ۔ انہدواجا-انہد مرلی
تر تر تکنا =ٹ ک 121
خانہ =دل ہر زنداہ شے دا مرکزی مقام ٹ ک محاورہ، میری تے خانیوں ای گئی قُلُوبُ المُومِنینَ عَرشِ اللہ تَعَالی قاضی عرش خدا دا دھاہ ناہیں -ہ -و بند 208
کن =کائنات دا چھوٹے توں چھوٹا حصہ -ذرہ-ایٹم
کن سر =کُن فَیَکُون دا پتہ خبر
سر رکھنا =پتہ سر رضا -پوری معلومات رکھنا
کن سر رکھنا = -1کناں نوں سنن واسطے صحیح رکھنا -2ٹھیک طرح نال ہر سر دا علم رکھنا -3سمیع و علیم ہونا۔


179
مُوتُوا والی موت نہ ملی جیں وچ عشق حیاتی ہُو
موت وصال تھیوسے ہکو اسم پڑھیوسے ذاتی ہُو
عین دے وچوں عین تھیوسے دور رہے قرباتی ہُو
ذکر ہمیش سڑیندا باہو دینہاں سکھ نہ راتی ہُو

اوکھے لفظاں دے معنے
موتوا والی موت =.......مُوتُوا قَبلَ اَن تَمُوتُوا دے مطابق مرن توں پہلاں دی موت
نہ ملی =اختیار نہ کیتی -قبول نہ کیتی -نہ دھاری
عشق حیاتی =ہمیشہ دی زندگی جیہڑی عشق دی وجہ توں نصیب ہو جاندی اے
ذاتی اسم =اسم ذات اللہ
پڑھیوسے =اساں پڑھیا اے
موت =اصلی موت توں پہلاں دی موت -موتوا والی موت
وصال =اللہ تعالی نال ملاپ
تھیوسے ہکا =اکو ای ہوگیا
عین دے وچوں =.......اسیں عین ذات وچوں ای نگلے ہوئے ہاں - تے اوسے وچ رل کے پھر عین ہاں ایس حالت وچ قرباتی دور دہ گئے نیں
قریات = خدا نوں بھاون والے نیک کم جیہڑے نبدے نوں خدا دے نیڑے کر دین
قرباتی=دھوڑی دے مشکیزیاں وچوں پانی دین والا-مدد گار -حمایتی - وسیلہ (ہو دا ذکر ہمیشہ منیوں اگ لائی رکھدا اے مینوں دن نوں سکھ اے نہ رات نوں )


180
میں شہباز کراں پروازاں وچ افلاک کرم دے ہُو
زباں تاں میری کن برابر موڑاں کم قلم دے ہُو
افلاطون ارسطو جیہے میں اگے کس کم دے ہُو
حاتم جیہے لکھ کروڑاں در باہو تے تھمدے ہُو


اوکھے لفظاں دے معنے
حضرت سلطان العارفین ایس بیت وچ اپنے اولی الامر دے مقام اتے فائز ہوون نوں ظاہر فرما دتا اے-آپ نے اپنی فارسی کتاب امیر اکونین وچ ایس مقام اتے چانن پایا اے اولی الامر اوہنوں آکھدے نیں جہد امر واپس نہ مٹرے -فقیراں دی زبان اللہ دی تلوار اے اوہدا امر کن جس چیز تے وی صادر ہو جائے اللہ دے حکم نال ہو جاندا اے -بھانویں چھیتی بھنویں دیر نال
ایس بیت وچ وجودی فلسفے دا وجدان نظر آرہیا اے -اپنے اپنے دور وچ حسین بن منصور حلاج تے حضرت بایزید مسطامی ہوراں وی ایس رنگ و لوج گج کے اشارے کیتے نیں ۔۔۔۔۔۔خوجہ غلام فرید ہوراں وی آکھ انا الحق تھی منصور آکھ کے ایس ےفلسفے دے قائل ہون دی شہادت دتی اے -
شہباز =ٹ ک 104
کراں پروازاں =اڈاریاں ماراں
کرم دے افلاک وچ =اللہ تعالی دے کرم دے آسمان وچ
زبان تاں میری =.........میرا آکھنا وی کن دے برابر ای اے
(میرا آکھیا رب العالمین لازمی طور تے من لیندا اے) ٹ ک -یَفعَل اللہُ مَا یَشَاء وَ بِحُکمِہِ مَا یَددُ
موڑاں =.........میں قلم دے لکھے ہوئے حکم بدلا دینا ہاں
افلاطون تے ارسطو=یونان دے مشہور سیانے فلا سفر حکیم سن
اگے =میرے سامنے میرے مقبلے وچ (مین اگے تے وی غور ہو سکدا اے )
اگھ =قیمت -نرخ-قدر - اہمیت
حاتم =حاتم طائی -مشہور سخی
تھمنا=(1) چوراں نوں پناہ دینا ۔ پڑپ کرنا -قابو کرنا۔ غبن کرنا سخی دی دت دات نوں جھوپ لینا


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels