Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 190-181

ابیات باہو 190-181

سلطان باہو
February 5th, 2008


181
میں کوجھی میرا دلبر سوہنا کیونکر اس نوں بھاواں ہُو
ویہڑے ساڈے وڑدا ناہیں لکھ وسیلے پاواں ہُو
نہ سوہنی نہ دولت پلے کیونکر یار مناواں ہُو
ایہ دکھ ہر دم رہسی باہو روندڑی ہی مر جاواں ہُو ؟

اوکھے لفظاں دے معنے
کوجھی =سوہنی دے الٹ -بد نما -بدشکل -بھیڑ منہی بد عمل۔ بھیڑیاں کرتوتاں والی ٹ ک ز شتی 183
بھاونا =چنگا لگنا-پسند آونا
دلبر=دل بر -دل کھس لیجاون والا
وسیلہ =وچولا تریا کل صلح صفائی کران والا ۔ ثالث (
go. between )
دولت=نیک عملاں دی دولت
دکھ =یار نوں منان دی حسرت دا روگ
ایہ دکھ=......کیہ ایہ دکھ ہمیشہ انج ای رہے گا۔ کتے مین ایس حالت وچ ای روندی نہ مرجاواں۔


182
نال کسنگی سنگ نہ کرئیے کُل نو نلاج نہ لائیے ہُو
تمے تربز مول نہ ہوندے توڑ مکے لے جایئے ہُو
کانو دے بچے ہنس نہ تھیندے موتی چوگ چگایئے ہُو
کھوہ نہ مٹھے ہوندے باہو سئے مناں کھنڈ پایئے ہُو

اوکھے لفظاں دے معنے
کسنگی =(1) سنگ توڑن والا -دوستی نہ نبھاون والا -بے وفا-بد اصل بھیڑی فطرت والا۔
سنگ =ٹ ک 31
کل=خاندان -وڈکیاں دی لڑی -اصل -نسل -نام نسب
لاج=بدنامی دا داغ -نک نموج ونجاون والا۔ کوئی کم جوننگ شرم دا کارن ہووے
تما=اک کوڑا پھل -اندرائن - ہدوانا
مول =نہ ہوندے =ہرگز نہیں ہوندے -اصلوں نہیں ہوندے -بالکل نہیں ہوندے
توڑ =(1) توڑ کے (2) تک -تائیں -وچلے وسیلے چھڈ کے اصل تھاں تائیں ورتوں انج اے ، توڑ اپڑائیں ۔ راہ وچ نہ رکھیں (دھر مکے شریف تائیں ) (3) توڑے دا چھوٹیرا روپ بھانویں
کانو=نگد مند کھاون والا-کالے رنگ دا پنچھی -دنیا دار۔لالچی ۔ حرام خور
ہنس =بطخ ورگا چٹے رنگ دا اک پکھی جو عام دانے دی تھاں صرف مردا رید موتی چگدا اے ایتھے مراد دھرم ایمان مریا دانوں قائم رکھن والی روحانی ہستی
چوگ =پکھی دی خوراک -ٹ ک۔ اکھان جیں چخج دتی اے چوگ وی دلیسیں
کوڑے کھوہ=کھارے پانی ولاے کھوہ (فطرت ولوں گھتے گئے گن بدلے نہیں جا سکدے )
سے مناں =کئی سومن


183
نت اساڈے کھلے کھاندی ایہا دنیا زشتی ہُو
جیں دے کارن بیھ بیھ روون شیخ مشائخ چشتی ہُو
جنھاں اندر حب دنیا دی بڈی اوہناں دی کشتی ہُو
ترک دنیا تھیں کیتی باہو خاصہ راہ بہشتی ہُو


اوکھے لفظاں دے معنے
کھلے کھانا= جتیاں کھانا -بے عزتی کروانا (فقیردی دنیا ولوں پوری بے نیازی پوری دینا نون کھلے مارن دے برابر اے )
دنیا =ٹ ک 2,ایہا=اہو ای جنھوں اسیں چنگی طرح پچھان گئے ہاں
زشتی =فارسی وچ زشت اسم صفت اے جہیدامطلب اے کوھی بھیڑ مونہ -مونہی - بھیانک مکروہ - ڈراؤنی کھروی -گستاض -کٹر ۔ کٹھور -تکھی -کوڑی -بے لحاظ ۔ طندی فاحشہ -(زشتی نکوئی دی ضداے)
سو ، زشتی ، زشت وچ شامل ساریاں بدیاں دا مجسمہ یا مجسم پرائی اے )
دینا زشتی =دنیا جہیڑی مجسم برائی اے
کارن =واسطے وجہ توں -خاطر
شیخ=پیر -بزرگ -گدی نشین
مشایخ-مشیخت دی جمع وڈیاں کدیاں دے مالک جنہاں دی پیری بزرگی منی ہووے
چشتی =سلطان العارفین کسے اک سلسلے دی نندیا کرنا نہیں چاہندے مشائخ دے سلسلیاں وچوں کسے اک دا ذکر کرکے اوہ ساریاں ول دھیان دوانا چاہندے نیں -اوہناں دا اشارہ اجہیاں ساریاں بزرگاں ول اے جنہاں درویشی چھڈ کے دنیا داری مل لئی اے تے نرے اپنے طریقتی سلسلیاں تے مان کردے نیں
حب =ٹ ک 20
بڈی =ٹ ک 20
کشتی=بیڑی
ترک =دنیا =ٹ ک 2
خاصہ =ٹ ک 101,42
سلطان العارفین فرمندے نیں کہ باہونے ای دنیا نوں مگروں لاہیا اے ۔، ایہو ای اللہ تعالی دے خواص گان دا بہشتی رستہ اے۔


184
نفل نمازاں کم زنانہ روزے صرفہ روٹی ہُو
مکے دے ول سوئی جاندے جنہاں گھروں تروٹی ہُو
اُچیاں بانگاں سوئی دیون نیت جنہان دی کھوٹی ہُو
کیہ پروا تنہاں نوں باہو جنہاں گھر وچ بوہٹی ہُو

اوکھے لفظاں دے معنے
زنانہ =مرانہ دے مقبلے وچ ورتیا گیا اے ٹ ک 136,70کمزورراں کم دلیان مردانگی توں وانجھے لوکاں دا کم
صرفہ=بچت خرچ وچ کم ۔ ت۔ ک۔ صرفہ کرکے ستی تے آٹا کھا گئی کتی
گھر =دل -من خانہ - اندرونہ۔ ٹ ۔ ک 193
گھروں =گھردے پاسیوں۔ گھر ولوں
تروٹی =گھاٹا -خسارہ -گھاٹ -کمی
سوئی =سوای-اوہ ای
نیت=نیت
لدھی =لبھی -حاصل کرلئی ٹ ک لدھا 197
بوہٹی=جان دی راکھی کرن والا چھوٹا جہیا تویت جو بانھ نال بنھیا جاندا اے


185
نہ اوہ ہندو نہ مومن نہ سجدہ دین مسیتی ہُو
دم دم دے وچ ویکھن مولا جنہاں قضا نہ کیتی ہُو
آہے دانے بنے دیوانے ذات سہی ونج کیتی ہُو
قُربان تِنّہاں توں باہو جِنّہاں عشق بازی چُن لیتی ہُو

اوکھے لفظاں دے معنے
ایس بیت وچ اللہ دی ذات پچھان کر لین والے۔ اللہ دے عاشقاں دے مذہب بارےکجھ دس پائی گئی اے۔ اوہناں وچ کسے طرحاں دا مذاہبی کٹٹر پن نہیں ہوندا اوہ کسے اک مذہبی دائرے وچ قید نہیں ہوندے ۔ اوہناں نوں ہر انسان و چ مولا نظر آوندا اے
دم دم =(1) ہر متنفس ساہ لین ولا فرد (2) ہر ریلے /نہ قضا ء کرنا -نمازویلے سر ادا کرنا ( اجیہے عاشق ہر ویلے عشق دی نماز ویلے سر پڑھدے نیں -خدا دی پچھان کرن والے انھ تے سیانے دانا
ہوندے نیں پر دیوانے بنے رہندے نیں
سلطان العارفین اجیہے عاشقاں دی دلوں قدر کر دے نیں جنہاں دوہاں جہاناں دے فائدے چھڈ کے ربی وحدت دے عشق نوں چن

لیا اے۔


186
نہ رب عرش معلّٰے اتے نہ رب خانے کعبے ہُو
نہ رب علم کتابیں لبھا نہ رب وچ محرابے ہُو
گنگا تیر تھیں مول نہ ملیا پینڈے بے حسابے ہُو
جد دا مرشد پھڑیا باہو چھٹے سب عذابے ہُو

اوکھے لفظاں دے معنے
ایس بیت وچ رب دا پتا ٹکانا لبھن والیاں واسطے کجھ اشارے دتے گئے نین۔ لوکائی وچ کجھ مشہور ٹکانیاں بارے بھلیکھا دور کردیاں آکھیاں گیا اے کہ رب ایتھے نہیں رہندا کیوں جو اوہنوں کسے اک تھاں تے من لئے تے لامکاں والی صفت بارے سولا اٹھدے اے چوتھے مصرعے وچ گنجھاں نوں کھولن لئی اک ہور بجھارت پا دتی گئی اے۔ (مرشد نال ذاتی اخلاص پاروں جو فیض حاصل ہوندا ےا اوہدے ول اشارہ اے ) وحدت الوجود دے جنو ایس بجھارت نو ںبجھ دکدے نیں
محرابے =محراب =مسیت وچ امام صاحب دے سجدے لئی بنی تھاں۔ ایہہ قبلہ رخ والی کندھ توں تھوڑی جہیی باہر نوں کب وانگوں نکلی ہوندی اے
تیرتھ=ہندواں دا کوئی پوتر استھان جتھوں دی یا ترا کرکے اوہ اپنے من نوں دھیرج بنھاندے نیں۔ پنجاب تون گنگاتے دوجے تیرتھ اوس ویلے دے پندھ وسیلیاں موجب بہت دوڑیدے سن تے بے حسابا پینڈاسی
گنگا=ہندوواں دا مشہور مقدس دریا جس دے کنڈے اتے بہت سارے تیرتھ نیں جنہاں وچوں ہر دوار پڑا مشہور اے۔ ( تیر =دریا دا کنڈھا ) ( ارتھ =مذہبی (مقصد -معنی )


187
نہ کوئی طالب نہ کوئی مرشد سب دلاسے مُٹّھے ہُو
راہ فقر دا پرے پریرے حرص دنیا دے کُٹّھے ہُو
شوق الہی غالب ہویا جند مرنے تے اُٹّھے ہُو
جیں تن بھاہ برہوں دی باہو مرن تہانے گُھٹّھے ہُو

اوکھے لفظاں دے معنے
طالب =ٹ ک 1
مرشد =ہدایت دا راہ دکھان ولا -شیخ -پیر -پیشوا
مٹھے =ٹ ک 32
فقر =ٹ ک 22
کھٹے =ٹ ک 106-32
پرے پریرے =لالچ۔ مل مارن دی خواہش
شوق الہی =رب دا عشق
جند مرنے تے اٹھے = جند مرن لئی بالکل تیار-مرن تے راضی -موت تے آمادہ
برہوں دی بھاہ =جدائی دی اگ
تہاں =اوتھے
تہانے =اوتھے ای تھاں تے ای
گھٹھٹے-گھوٹھے -گھٹے وٹے -چپ چپینے -خاموش


188
نہ میں جوگی نہ میں جنگم نہ میں چِلا کمایا ہُو
نہ میں بَھج مسیتیں وڑیا نہ تَسبحہ کھڑکایا ہُو
جو دم غافل سو دم کافر مرشد ایہہ فرمایا ہُو
مُرشد سوہنی کیتی باہُو پل وچ جا پُہنچایا ہُو


اوکھے لفظاں دے معنے
جوگی =جگت تیاگن والا ہندو فقیر
جنگم=سیلانی سادھو جہیڑے کسے تھاں تے پکا ڈیرانہ لاون رمتے جوگی جیہڑے ڈیرا کوچ کرن دا اعلان کرن والا ٹل ہمیشہ گل یا لک نال ببھی پھر دے نیں۔ تے پتلی جیہی زنجیر پیرا ں وچ پہندے نیں۔
چلا=ٹ ک 44
تسبحہ =کھڑکانا =لوکاں نوں وکھا سنا کے تسبیح دے دانے پھیرنا
دم =اک ساہ لین وچ لگدا سماں
جو دم غافل سو دم کافر =ٹ کی 63
سوہنی کیتی =میرے نال بہت چنگا سلوک کیتا - احسان کر چھڈیا


189
نہ میں سیر نہ پاء چھٹاکی نہ پوری سرساہی ہُو
نہ میں تولہ نہ میں ماشہ گل رتیاں تے آئی ہُو
رتّی ہُوواں ونج رتّیاں تُلّاں اوہ بھی پوری ناہی ہُو
تُول پورا ونج ہوسی باہو جداں فضل الہی ہُو


اوکھے لفظاں دے معنے
سیر=من دا چالہیاں حصہ
پا =سیر دا چوتھا حصہ
چھٹا کی =سیر دا سولھواں حصہ
سرساہی =چھٹاکی دا چوتھا حصہ
تولا=چھٹاکی دا پنجواں حصہ
ماسا=تولے دا بارہواں حصہ
رتی =(1) ماسے دا اٹھواں حصہ (2) کام دیو دی گھر والی (3) خوشی مسرت محبت لگن جنسی جذبہ
رتی ہوواں =خوش قسمت ہوواں -خوشحال ہوواں -مرشد دے رنگ رنگی ہوواں ٹ ک /لف
اللہ دل رتا میرا (بلھے شاہ)
پورا ونج ہوسی =اوتھے جاکے پ٠ورا ہوے گا
ناہی =ناہیں - نہیں۔


190
نہ میں سنی نہ میں شیعہ دوہاں توں دل سڑیا ہُو
مُک گئے سب خشکی پینڈے دریا رحمت وڑیا ہُو
کئی من تارے تَر تَر ہارے کئی کنارے چَڑھیا ہُو
صحیح سلامت چڑھ گئے باہو مرشد دا لڑ پھڑیا ہُو


اوکھے لفظاں دے معنے
سنی =اہل سنت والجماعت -حضور
ؐ دے چونہہ یاراں پھر پور عقیدت رکھن والے مسلمان
شیعہ=صرف حضرت علی کرم اللہ وجہ نوںای خلاقت دا حق دار سمجھن والے تے باراں اماماں نوں منن والے مسلمان
دل سڑیا=........رج گیا ہاں -سخت ناراض ہاں - ڈھڈوں میں ایہناں تے خوش نہیں
من تارے =ترن نہ جانن والے
کوئی کنارے چڑھیا=کوئی وی کنڈھے تائیں پار نہیں اپڑیا
خشکی پینڈے =شیعہ سنی والے فرقہ وارانہ وتکرے خشکی تے سفر کرن وانگوں نیں۔ جدوں کہ فقر اختیار کرنا رحمت دے دریا وچ وڑن دے برابر اے -ایس دریا دی اکو چھل منزل تیک پہنچا سکدی اے۔

 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels