Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 200-191

ابیات باہو 200-191

سلطان باہو
February 5th, 2008
4 / 5 (1 Votes)


191
نہ میں عالم نہ میں فاضل نہ مفتی نہ قاضی ہُو
نہ دل میرا دوزخ منگے نہ بہشتیں راضی ہُو
نہ میں تریہے روزے رکھے نہ میں پاک نمازی ہُو
باجھ وصال اللہ دے باہو دنیا کوڑی بازی ہُو

اوکھے لفظاں دے معنے
عالم =دین اسلام دے علم دا چانن کھنڈاون والا
فاضل =دین اسلام بارے عالماں نالوں کئی گنا ودھ علم رکھن والا
مفتی =دینی مئسلیاں بارے فتوی دے کے اپنا فیصلہ سناون والا ۔ ایہ وی بہوں ودا فاضل ہوندا ے
قاضی=دین اسلام دے شرعی فقہی نظام دے چانن وچ ہر قدم دے دینی تے رنیاوی جھگڑیاں بارے نیا نو نبیڑن والا
دوزخ =صفات نفسانی -احکام کثرت تجلی جلال (سردلبراں )
بہشت =صفت روحانی مظہر مطلق رضائے الہی کا محل ۔ خوشنودی پرور دگار پر انعامات ٹ ک۔ دوزخ جنت کے بارے حضرت رابعہ بصری کا بیان ۔
ایس بیت وچ فقر دے مقام اتے چانن پایا گیا اے۔ ہوسکداے فقیر دا علم کسے عالم فاضل مفتی قاضی نالوں گھٹ نہ ہووے پراوہ ایہناں مرتبیاں دا دعوی تے حق نہیں جتاندا
practice نہیں کردا سگوں لوکاں نوں عالماں فاضلاں مفتیاں قاضیاں ول رجوع کرن دی ترغیب دیندا اے نہ ای اوہ وکھاوے واسطے اپنی نماز روزے دا اعلان کردا پھردا اے -اوہدے سامنے اک تیچا اے اللہ نال وصال دا جے اوہ نہیں لدھا تے ایہہ دنیا تے مداری دا اک جھوٹھا کھیڈا ے نظراں دا اک دھوکھا اے


192
نہیں فقیری جلیاں مارن سُتیاں لوک جگاون ہُو
نہیں فقیری وہندیاں ندیاں سُکیاں پار لنگھاون ہُو
نہیں فقیری پا مصلے وچ ہوا ٹھہروان ہُو
نام فقیر تنہاں دا باہو دل وچ دوست ٹکاون ہُو

اوکھے لفظاں دے معنے
جلی مارنا =جلی پاؤنا ۔ فقیراں دا وجدا وچ آکے جلالی رقص ۔ جس وچ اوہ جچن دے نال نال اُچی اُچی ذکر الل ہوی کردے نیں
ٹ ک =ذکر خفی ۔ ذکر جلی
ویہندیاں -چلدے پانی نال بھریاں ہوئیاں
ایس بیت وچ فقر دے مقام دل اشارے کینے گئے نیں۔ فقیر اللہ تعالی دا خاص دوست اے۔ اوہدے سینے وچ اللہ دی یاد اپنا ڈیرا لائی بیٹھی اے۔ اوہ لوکاں تے اپنی عبادت تے ذکر دا اثر نہیں پانا چاہندا۔ تے نہ ای لوکاں نوں کسے قسم دا عبدہ کرشمہ دکھاکے اپنے مگر لانا چاہندا اے اوہنے تے دنیا ترک کیتی اے ۔اوہ دینا والیاں نوں اپنی فقیری منوان دا کوئی جتن کیوں کرے۔ اوہنوں تے یاد اللہ توں ای ویہل نہیں ملدی (چوتھے مصرعے وچ دوست دا اچارن دوس رہے گا )


193
نیڑے وَسّن دُور وسِیون ویہڑے ناہیں وڑ دے ہُو
اندر ڈھونڈن وَل نہ آیا باہر ڈھونڈن چڑھدے ہُو
دور گیاں کجھ حاصل ناہیں شوہ لبھے وچ گھر دے ہُو
دل کر شیشے وانگوں باہو دور تھیون کُل پردے ہُو

اوکھے لفظاں دے معنے
حقیقی محبوب بندے دی شاہ رگ توں وی نیڑے وسدا اے پر بے پچھانیاں نوں دور دسدا اے اور بے پچھانیاں دے دل دے وہڑے وچ قدم نہیں دھردا -اجیہے انھے لوکاں نوں اپنے اندروں لبھن دی جاچ نہیں آئی اوہ باہر ڈھونڈن نکل ٹرے نیں
گھر=دل -من
شوہ=شوہر-مالک -خدا تعالی
شیشے دے گن=(1) شیشے تے کوئی غبار مٹی گھٹاپے جاوے تے جھاڑ پونجھ نال صاف ہو سکدا اے(2) شیشے وچ اپنی شکل پچھانی جاندی اے۔ اپنا کروپ دسدا اے۔ چہرے دے داغ دھبے دسدت نیں
(3) شیشے کسے شے نوں لکاندا نہیں اوہدے اندر پئی ہر شے نظر آسکدی اے سودل وچ کدورت نہ رکھو۔ دل ، ضمیر دی آواز سنو تے اپنی اصلاح کر لؤ حق سچ دا اعلان کری جاؤ
پردے =حجاب -بندے تے خدا دے وچکار ڈکے پاون والیاں رکاوٹاں
دل نوں شیشے وانگوں کریاں سارے حجاب تے اوہلے ہٹ جاون گے تے تسی روشن ضمیر ہو جاؤ گے۔


194
وحدت دے دریا اُچھلّے جل تھل جنگل رِینے ہُو
عشق دی ذات منیندے ناہن سانگاں جھل پتِینے ہُو
انگ بھبھوت ملِیندے ڈِٹھے سئے جوان لکھِینے ہُو
قربان تنہاں توں باہو جیہڑے ہُوندی ہمت ہِینے ہُو


اوکھے لفظاں دے معنے
جل =تری -پانی نال بھرے علاقے-سمندر دریا ندی نالے
تھل = صحرا -ریتلے علاقے
جنگل =رکھاں بوٹیاں والے علاقے جھنگ -بیلے
رینے =قرضائی -احسانمند -شکر گزار
عشق دی ذات =اللہ تعالی دی ذات پاک
منیندے ناہیں =مندے نہیں سن
سانگ =بھالا -نیزہ
جھل =جھل کے ، برداشت کر کے
پتینے=پتیائے گئے نیں۔ پریت وچ لیاندے گئی نیں ٹ ک 44
انگ =جسم دے حصے
بھبھوت =سواہ -کولیاں دی چٹی سواہ
سئے=سینکڑے
لکھینے =(1) لکھاں وچو ں اک (2) لکھن ویکھن جوگے
ٹ ک =دکھی جیو وکھانہ بھاگ بھریئے سوئن چڑی تے کونج لکھینے نی -ہ-و 329
ہمت = کسے کم کرن دا پکا اراداہ تے بل
بینے=ٹ ک 106
وحدت دے دریا اچھلے پئے رہے نہیں چل تھل جنگل پانی نال سیراب ہوون پاروں شکر گزار نیں شق ہوریں میری محبت نوں مندے نہیں سن عشق دے رستے وچ دردناک تکلیفاں جھل کے اوہنوں پریت وچ لیا ندا گیا اے۔ عشق وچ رانجھے ورگے سینکڑے لکھینے جوان انگ بھبھوت مل کے جوگی ہوندے دیکھے نیں ۔ سلطان العارفین اجیہے فقیراں نوں عقیدت دی نظر نال ویکھدے نیں جہیڑے طاقت ہمت رکھدیاں ہویاں دی عاجز مسکین بنے رہندے نیں ٹ ک 110
مصرعہ 4-3


195
وحدت دے دریا اُچھلّے ہِک دل سہی نہ کِیتی ہُو
ہک بت خانے واصل تھیے ہک پڑھ پڑھ رہے مسِیتی ہُو
فاضل چھڈ فضیلت بیٹھے عشق بازی جاں لیتی ہُو
رب نہ ملدا باہو جنہاں ترٹی چوڑ نہ کیتی ہُو

اوکھے لفظاں دے معنے
ہک دل =کسے دل نے وی
سہی کرنا =ٹ ک 9
واصل ہوئے =اوہناں نوں وصل نصیب ہوگیا اے۔
رہے=محروم رہ گئے وانجھے رہ گئے ۔ پچھاں رہ گئے ۔ اوہناں ڈھوئی نہ ملی
فضیلت چھڈیا =ٹ ک 34
عشق بازی لینا =(1) عشق دا خطر ناک کھیڈ اختیار کرنا (2) عشق دی بازی جت لینا
ترٹی چوڑ کرنا =ٹ ک 69
وحدت دے دریا وچ اچھلے پئے رہے نیں۔ دریا جوش نال اچھل کے کنڈھیاں توں باہر وی آرہیا اے۔ پر کسے دل نے اوہدی پچھان نہیں کیتی ۔


196
وحدت دا دریا الہی عاشق لیندے تاری ہُو
مارن ٹُبیاں کڈھن موتی آپو اپنی واری ہُو
در یتیم چ لئے لشکارے جیوں چن لاٹاں ماری ہُو
کیوں نہیں حاصل بھر دے باہو نوکر نیں سرکاری ہُو

اوکھے لفظاں دے معنے
وحدت =دا دریا الہی =الہی وحدت دا سمندر
تاری لیندے =تاری لاندے نیں -رچ کے نہاندے نیں
سارے سمندر دی سونہہ سنجھان رکھدے نیں۔ ایس سمندر دے تارو نیں۔
نبی مارنا =غوطہ لا کے سمندر دی تہ تھلے اپڑنا در یتیم =سارے جگ توں نویکلا موتی -بے مثال بے نظیر موتی ایتھے مراد اے جناب محمد مصطفی
ؐ خاتم انبین اے
حاصل =محصول معاملہ -لگان - فصل وچوں سرکار دے حصے دی جنس
حاصل بھرنا=سرکار ولوں مقرر محصول معاملہ اسا کرنا ٹ ک 46(حقوق اللہ ادا اکرنا)
نوکر =بندے -غلام (عبد)
سرکاری=اللہ تعالی دے
جنہاں اللہ تعالی دی بندگی دا اقرار کر لیا اے اوہ پھیر حقوق اللہ ادا کرن توں پچھانہہ کیوں ہٹدے نیں۔ حیلے بہانے کیوں کردے نیں
دوجا مطلب ایہہ ہے کہ جیہڑے فنا فی اللہ باقی با اللہ لوک نیں اوہناں دا ہر ساہ اللہ نال ای گنیا نیں۔ جاندا اے اوہ گنی متھی عبادت توں آزاد نیں۔ اوہ ہر ویلے ای حاصل بھر رہے ہوندے نیں۔ ٹ ک 102مصرعہ4


197
ونجن سر پر فرض ہے مینوں قول بلٰی دا کرکے ہُو
لوک جانے متفکر ہوئیاں وچ وحدت دے وڑ کے ہُو
شوہ دیاں ماراں شوہ ونج لیساں عشق تُلھا سر دھر کے ہُو
جیوندیاں شوہ کسے نہ پایا باہو لدھا مر کے ہُو

اوکھے لفظاں دے معنے
ونجن =جاون (اصل ول واپس مڑن )
سر پر =لازمی طور تے-ضروری
قول بلی دا =اَلسَستُ بَربِکُم دے جواب وچ ہاں -ٹ ک 6ک ق م 71/72
متفکر =فکر مند -سوچیں ڈبیا
ہوئیاں=میں ہوئی آں
شوہ (پہلا +تیجا) شوہر ، مالک ، خدا تعالی
شوہ (دوجا ) سمندر
ماراں =تھپیڑے -سٹاں ۔ (ایتھے ساراں دا امکان وی جاپدا اے )
ماراں =خبر۔ علم -آگاہی
شوہ ونج لیساں =سمندر وچ و
ؑکے ای لا ں گی
تلھا=ٹ ک 46
عشق تلہا=عشق تے توکل عشق دا وسیلہ
سر =بعض سیلے لفظ سر سارے جسم تے جان لئی ورتیا جاندا اے
جویں سر فروش، سردا دیری
لدھیا =لبھیا -پایا
کیوں جو بلی آکھیا ہویا اے ایس لئی میرا واپس اوہدے ول مڑنا میرے تے لازمی قرض اے۔ لوک غلط سمجھدے نیں پئی وحدت وچ وڑ کے سوچیں ڈب گئی ہاں مین اپنے حقیقی مالک دیاں ساراں وحدت دے سمندر وچ ورکے ای لان گی۔ ایس لئی منیوں عشق دے توکل تے سر دھرنا پوے گا۔ جنہے وی ماہی دا بیت پایا اے مرن تون پہلے مر کے ای اپایا اے۔


198
وَیہہ وَیہہ ندیاں تارُو ہُوئیاں بمبل چھوڑے کاہاں ہُو
یار اساڈا رنگ محلیں در تے کھلے سکاہاں ہُو
نہ کوئی آوے نہ کوئی جاوے کیں ہتھ لکھ مُنجھاہاں ہُو
خبر جانی دی آوے باہو کلیوں پُھل تھواہاں ہُو


اوکھے لفظاں دے معنے
ویہہ ویہہ =وگ وگ کے
تارو= اینی ڈوہنگھیائی والی ندی جیہدے وچوں تریاں باجھوں پار لنکھنا ناممکن ہووے
بمبل چھوڈے =کانیاں (سر کنڈے ) دے بوٹے نوں نرم نازک چٹے چٹے پھل یا پھل لگ گئے نیں-سر کنڈے دے بوٹے دی جونی تے پر پھلتا دی آخری حد بمبل لگنا اے۔
رنگ محلیس=رنگ محل وچ ۔ رنگ محل عشرت کدہ ۔ رونق میلے۔ جیون سواد لئی اساریا گیا محل (ایتھے مراد اے کہ مرشد پاک حضور اکرم
ؐ دی حاضری وچ نیں تے حاضری دا روحانی سرور لے رہے نیں۔
ٹ ک =کوئی پلنگھ اتے ناگر ویل پیاں رنگ محل وچ رانیان نی (ہ ۔ و بند 336)
در =دروازہ
سکاہاں =مین یاردی سک اڈیک بھوگ رہیان
کیں=کدھے
لکھ=لکھت -تحریر
لکھ=کوئی نشانی جنھوں ویکھ کے بھیجن والے دا سارا مقصد سمجھ وچ آونچے ای٠ہ نشانی یا تے پہلاں کوڈ وانگوں مقر ہوندی سی یا نشانی وصولن والا اپنی عقل سیتی ایہدے مطلب آپ کڈھ لیندا سی
لکھ=( سندھی )=خبر۔ پتا ۔ سراغ
منجھاہاں =میں بھیجاں
میں گھلاں
جانی =
99
پھل تواہان =پھل تھی ونجاں -کامیابی دی خوشی وچ کھڑ جاواں -ایس بیت وچ حضرت سلطان باہو
ہوراں اپنے مرشد دی بے نیازی تے اپنی نیاز مندی دا نقشہ کھچیا اے


199
ہر دم شرم دی تند تُروڑے جاں ایہہ چُھوڈگ بُلّے ہُو
کچرک بالاں عقل دا دیوا برہوں انھیری جُھلّے ہُو
اجڑ گئیاں دے بھیت نیارے لعل جواہر رُلّے ہُو
دھوتیاں داغ نہ لہندے باہو رنگ مجیٹھی ڈُلّھے ہُو


اوکھے لفظاں دے معنے
جدوں عشق اپنی تیز ہوا دے بلے چھڈ دا اے تے ہر ویلے شرم دی کچی تند ترور جاندا اے ۔ برہون انھیری اگے میں عقل دا دیوا کنا کو چر بالان عشق وچ اجڑ گئیاں دے بھیت کوئی نہیں پا سکدا۔ اوہنان دے سامنے لعل تے جواہر رلدے رہن ۔ تاں وی اوہ اوہناں نوں چھڈکے یار ڑے دی کلی وچ جاونا اپنا سبھاگ سمجھدیاں نیں عشق مجیٹھ دے ڈلھے ہوئے رنگ دے داغ کسے طرحاں دھوتیاں وی نہیں لہندے
دم =ساہ -یا ساہ لین وچ لگدا سمان
شرم دی تند تروڑنا =بے شرمی دا مظاہرہ کرنا
چھوڈگ بلے =بلے چھڈے گا ، جھمکھڑا انھیری
کچرک =کنا کو چر-کنی دیر تائیں
برہوں =عشق -فراق -جدائی -وچھوڑا
نیارے=جگ نالوں وکھرے عجیب
رلنا=کسے شے دا اینی مقدار وچ ہونا یا وادھو پیا ہونا کہ کوئی وی اوہدی پروانہ کرے مثال وبہون لوہے دے کار خانے وچ چھوٹی موٹی پتری -تار۔ کل رلدے رہندے نیں۔
مجیٹھی رنگ =لال سرخ رنگ ۔ محبت دارنگ عشق دار نگ صبغتہ اللہ دارنگ ۔ ٹ ک 51



200
ہسن دے کے روون لیوئی دتا کس دلاسا ہُو
عُمر بندے دی اِویں وہانی پانی جویں پتاسا ہُو
سُوڑی سامی سُٹ گُھٹِیسن پلٹ نہ سکسیں پاسا ہُو
صاحب لیکھا منگسی باہو رتی گٹ نہ ماسا ہُو

اوکھے لفظاں دے معنے
ہسن =عاقبت دا آنند بھریا جیون -جنت دا دائمی سکھ
روون=کمینی دنیا تے نفس مگر لگ کے دکھاں بھریا جیون -جھنجھٹاں تے بھریا جیون-دوزخی زندگی
دلاسا=حوصلہ تسلی
وہانی -1=گزر گئی -2گزر جائے گی -لنگھ جائے گی
پانی وچ پتاسا=عارضی -بہت گھٹ سمے لئی (پانی وچ پتاسا کھرن لئی لگا سماں بہت تھوڑا ہوندا اے )
سوڑی =بہت گھٹ چوڑی -تنگ -بھیڑی
سامی =قبر -لحد -ٹ ک 167
گھئیسن =دبا دین گے -گھٹ کے نپ دین گے
پلٹ نہ سکسیں =پاسانہ پرت سکوگے
لیکھا=حساب -ٹ ک /ق م 99/7
رتی =ٹ ک 189/25
ماسا=ماشا ، تولے دا بارھواں حصہ


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels