Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ابیات سلطان باہو >> ابیات باہو 206-201

ابیات باہو 206-201

ساطان باہو
February 5th, 2008
3 / 5 (2 Votes)


201
ہِک جاگن ہِک جاگ نہ جانن جاگدیاں ہِک سُتّے ہُو
ہِک سُتیاں جا واصل ہُوئے جاگدیاں ہِک مُتّے ہُو
کے ہویا جے گُھگّو جاگے لیندا ساہ اُپتّے ہُو
قربان تنہاں توں باہو جِنہاں کُھوہ پریم دے جُتّے ہُو


اوکھے لفظاں دے معنے
اک تے وہ رب دے پیارے بھر پور ولی نیں ۔ جہیڑے اللہ دی ذات ذکر وچ جاگدے رہندے نیں اکناں نوں جاگن دی جاچ نہیں -اک ظاہر وچ تے جاگدے نیں پر اوہ ستیاں
ورگے ای نیں ......اک ستیاں ای ملاپ کرن وچ کامیاب ہوگئے نیں ۔ اک جاگدیاں ای شیطان وانگوں تیا گے چھڈ دتے گئے یا آزاد کر کے بھیج دتے گئے نیں ۔ جے کوئی الو راتیں جاگدا اے تے دکھ تکلیف مصیبت بھرے ساہ لیندا اے تاں ایہدے کوئی فائدہ نہیں ۔ اصل جاگن ت ےاوہ اے جیہدے وچ بندہ پریم دا کھوہ جوئی رکھے تے اوہنوں اک پل سی نہ کھلون دیوے۔ اجیہے جاگن والیاں لئی حضرت سلطان العارفین دے دل وچ بڑی قدر اے
جاگ نہ جانن =جاگنا نہیں جاندے -اوہنان نوں جاگن دی جاچ نہیں
واصل ہونا =محبوب نال ملاپ ہونا
مٹھے گئے =دھوکھے نال لٹے گئے
کیہ ہویا =کوئی فائدہ نہیں
گھگو =اُلو
لیندا ساہ اپٹھے =کئی فقیر ذکر وچ (مشق نال ) دم الٹا لیندے نیں (حبس دم )
پریم دا کھوہ جونا=ہر ویلے اللہ سی یاد یا ذکر وچ رہنا
متے=منجھن مصدرتوں ماضی مطلق اے
منجھن =تیا گنا -بے تعلق ہو جان -آواز کر کے چھڈ دینا کسے تھاں بھیج دینا
اپتے =ایت =آفت دی وگڑی شکل اے - ان ڈٹھی مصیبت - حادتہ- اچانک تکلیف ؟


202
ہِک دم سجّن لکھ دَم ویری دَم دے مارے مردے ہُو
ہِک دَم پِچھے جنم گوایا چور بنے گھر گھر دے ہُو
لائیاں دا اوہ قدر کیہ جانن مُحرم ناہیں سرّ دے ہُو
سو کیوں دھکے کھاون باہُو طالب سچے در دے ہُو


اوکھے لفظاں دے معنے
اک دم =ساہ -ساہ لین والا اک فرد
سجن =دوست جانی؟
لکھ د م =لکھ بندے
ویری=دشمن
دم دے مارے مردے =اوس سجن دے دم دی خاطر ای سیں اوکڑاں جھاک رہے ہاں
دم دے مارے =دم دی خاطر
جنم گوانا =ٹ ک 74
چور بنے گھر گھر دے=سارے گھراں دے بندیاں توں لک چھپ کے محبت کیتی -سارے پاسیوں
اپنے تے الزام لوائے -بدیاں لی
أاں
لائیاں دا =اکھیاں لائیاں دا محبت کرن دا
محرم =ا-1محبوب -2بھیتی -بھیت دا جانو جانی یار
محرم ناہیں سروے =جنہاں نوصں محبوب بنسن سی توفیق نہیں
سو =اوہ ای
سرنا =بچنا -طاقت توفیق وچ ہونا-کجھ دےت سکنا -دے سکن جوگا ہوونا (لگی والیاں لئی محرم رکھنا ضروری اے )
سو =اوہ ای
دھکے کھاون =مندے حال وچ ہونا
طالب =ٹ ک بیت 1
سچا در =سچی درگاہ-حضرت غوث لااعظم دا دربار صرف محبوب دا دم ای سجن اے باقی سارے لوک (لکھ دم ) دشمن نیں


203
بِکی پیڑ کُل عالم کُوکے عاشقاں لکھ سہیڑی ہُو
جتھے ڈھہن رُڑھن دا خطرہ کون چڑھے اُس بیڑی ہُو
عاشق نیک صلاحیں چڑھدے تار کَپّر وچ بھِیڑی ہُو
عشق پیا تُلدا رتیں باہو عاشقاں لذت نہ کِھیڑی ہُو


اوکھے لفظاں دے معنے
بکی پیڑ =دنیا داراں دا کوئی دکھ درد
کل عالم =ساری دنیا -سارا زمانہ -کل جگت
کوکے= چیک چلا رہی اے -فریاد کر رہی اے حال پارہیا کر رہی اے
سہیڑنا
سہیڑنا
=117
ڈھیہن =بیڑی توں ڈگ پین
رڑھن =کسے شے دا کسے ہور دے ہتھوں وسوں نکل کے پانی دے روڑھ نال وگ ٹرنا
نیک صلاحیں = عاشق عشق دیاں نیک صلاحاں نال ای اجیہی خطرناک بیڑی تے چڑھ بہندے نیں -اوہ انبھول نہیں پھسدے اوہ جان بجھ کے اجیہے خطرے مل لیندے نیں
تار =بیڑی تار کے =ٹھیلھ کے
کپر =(سندھی ) ٹ ک 108
بھیڑنا=نیڑے کرنا -مقابلہ
تلدا =رت نال سانویں تول آوندے اے جنی رت دیو اونا ای عشق خرید ا لود
رتیں =رت دے کے =جان دی قربانی کر کے
کھیڑی =(سندھی ) ڈھال -سپر
عا م رنیا دار کسے اک دکھ درد نال حال پارھیا کر رہے نیں -جدوں کہ عاشقاں نے تے لکھاں درد آپ سہیڑے نیں -عام دنیا دار سیانا بندہ اوس بیڑی نہیں چڑھدا جس توں ڈگن یار رڑھن دا کوئی خطرہ ہووے -پر عاشق عشق دے آکھے لگ کے اوہدی نیک صلاح نال جان بجھ کے اجیہی بیڑی تے چڑھدے نیں۔ اوہ بیڑی نوں تھیلھ کے آپ کپر دے نیڑے کر دیندے نیں دراصل عشق رت نال سانواں تول کے دتا جاندا اے -عاشق لوک اپنا بچا نہیں کر دے -ایس لئی اوہناں نوں ڈھال پھڑ کے سواد نہیں آوندا


204
ہور دوا نہ دِل دی کاری کلمہ دِل دی کاری ہُو
کلمہ دُور زنگار کرِیندا کلمے مَیل اُتاری ہُو
کلمہ ہیرے لعل جواہر کلمہ ہَٹ پَساری ہُو
اِتّھ اُتّھ دوہیں جہانیں باہُو کلمہ دولت ساری ہُو


اوکھے لفظاں دے معنے
کاری -1=علاج -2شافی دوا-3چھیتی اثر کرن والی دوا
کلمہ =کلمہ طیب بہیڑا سارے ذکراں توں افضل اے
زنگا ر =( ف ) زنگ -جنگال -لوہے اتے نمی دے اثر نال پیدا ہویا میل نفی اثبات تے کھلوت ہوون پاروں پچھلے کالے کاریاں دی ساری میل کلمے نال اتر گئی اے -میرے واسطے کلمہ ای سب توں مڈھلی شے ہے -میرے لئی کلمہ ای لعل جواہر نیں -کلمہ ای میرے لئی پساری دے ہٹ دیاں ساریاں دواواں دے برابر اے -(میں کجھ دی حاصل کرنا ہووے کلمے وی برکت نال ای کر لیناں پنساری کولوں دوا دارولین دی مینوں کوئی لوڑ نہیں فقیر واسطے دنیا تے عاقبت دی ساری دولت کلمہ شریف ای اے )


205
ہُو دا جامہ پہن کراہاں اسم کماون ذاتی ہُو
کُفر اسلام مقام نہ منزل نہ اِتھے موت حیاتی ہُو
نہ اُتّھے مشرق نہ اُتّھے مغرب نہ اُتھّے دینہ تے راتی ہُو
اوہ اَساں وچ اسِیں ُانہاں وچ دور باہو قرباتی ہُو

اوکھے لفظاں دے معنے
ہُو=اوہ اوہ آپ مراد اللہ تعالی
جامہ=کپڑا
پہن کراہاں =پہن کے ای
ذاتی اسم کماونا =اسم ذات دا وردتے ذکر
ٹ ک 60
انج کرنا کہ جیبھ نہ ھلے -ہوٹھ نہ پھڑکن بس اللہ رہ جائے ہور سب کجھ بھل جائے
اتھ=اوتھے
ہو دا جامہ پہننا =اللہ تعالی دے 99گناں دا چھوٹے پیمانے تے بندے وچ آ جانا بندے دا اوہنان صفتاں نوں اختیار کرکے جیون بھوگنا۔ مثال وجوں ایہہ گن ایہہ نیں :الستار الرزاق -بندہ وی دوجیاں دے پڑدے کجے تے دوجیاں نوں روٹی پانی پچھن وچ بخیلی نہ کرے۔
قرباتی =ٹ ک 179


206
یار یگانہ مِلسی تینوں سِر دی بازی لائیں ہُو
عشق اللہ وچ ہو مستانہ ہو ہو سدا الائیں ہُو
نال تصور اسم اللہ دے دم نوں قید لگائیں ہُو
ذاتے نال جاں ذاتی رلیا باہو نام سدائیں ہُو

 

اوکھے لفظاں دے معنے
پگانہ (ف) (1) بیگانہ دی ضد -ٹ ک 144
سر دھڑ دی بازی لانا=جان دی پلروانہ کردیاں ہویاں حکم تے عمل کرنا
ہو ہو =صرف اوہو ای ۔ ہور کجھ وی نہیں
الائیں =آکھدارہیں -آواز کڈھدا رہیں
دم نوں قید لگانا =ٹ ک 60
ذاتے =ذات -رب دی ذات
جاں =جدوں
ذاتی =ذات رکھن والا -وکھری ہستی رکھن والا -فرد
باہو =اس سے نال -حضرت سلطان العارفین ہوراں نے چوتھے مصرعے وچ اپنے مقام ول اشارہ کیتا اے تے باہو دی مکمل تشریح وی کر چھڈی اے ایہو جیہی بجھارت میاں محمد بخش اپنے لفظاں وچ انج پاندے نیں۔
بحر اندر جد قطرہ آوے وس اوہ کون کہاوے
جیں تے اپنا آپ گنواوے آپ اوہو بن جاوے
ایس تھاں بارے بھگت کبیر دی گواہی انج اے
تو تو کرتا تو بھیا مجھ میں رہیا نہ ہوں


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels