Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پورن بھگت پنجویں سہ حرفی 11- 20

قصہ پورن بھگت پنجویں سہ حرفی 11- 20

قادر یار
February 20th, 2008



11)

ز۔ زندگانی تد ہوگ میری !
                   آکھے لگ میرے گھر چل پُتا
چوی(٤٢) برس گُزرے آہیں ماردی نوں       تیرے نال نہ کیتی ہے گل پُتا
دور گیاں دے درد فِراق بُرے سینے              ریہندے نے سجرے سَل پُتا
قادر یار کر کے ہتھیں کال میرا                  ایتھوں پھیر جائیں کِتے دُور پُتا

پُورن دا وِداع ہونا

12)

س۔ سمجھ ماتا توں تاں بھولئے نی                پُورن بھگت کھلو کے دے متیں
گوپی چند دی ماں سلاھیئے نی !                 جس توریا پُتر فِقر ہتھیں
توں بھی ٹور ماتا راضی ہو کے نی                مینوں جان دے پھاہی نہ مول گھتیں
قادر یار فقیر دا رہن ناہیں !                       رو رو کے میرے نہ مگر وتیں

13)

ش۔شِیر خوار میتھوں جدا ہویوں               مساں مساں میں ڈٹھا ہے مُکھ تیرا
چووی برس گُزرے نعرے ماردی نوں           اجے پھول نہ پُچھیا دُکھ تیرا !
دسیں پُورنا وے ہوئی پھیر کیکر                  لگو مر حیاتی دا رکھ جیرا !
قادر یار میں نِت چتار دی ساں                    خواب وچ سنیہڑا سُکھ تیرا

14)

ص۔ صاحب دِتی جند جان میری             کیہہ توں لگی ہیں سچ پچھان مائے
گُرؤ ناتھ جی کڈھیا کھوہ وِچوں                  رب دِتے نی نین پران مائے
مت خفا ہووے کرے کال میرا                 اوھدے کول دیوو مینوں جان مائے
قادر یار زبان تھیں قول کیتا                      پھیر مِلاں گا میں تینوں آن مائے

15)

ض۔ ضامنی گُراں دی وچ لے کے                  ماتا ٹوریا اَت قرار لوکو !!
دِلوں سمجھیا رب دا بھلا ہووے                   سانجھ رکھی سو وِچ سنسار لوکو
ڈگے لال ہتھاں وِچوں لبھدے نہیں                 کرماں والیاں نوں دوجی وار لوکو
پُورن ہو ٹریا وِداع اِچھراں توں                      قصہ جوڑیا سی قادر یار لوکو !!

16)

ط۔ طرف تُریا گُرو اپنے دے                        جاکے چرناں تے سیس نیواوندا ای
پہلاں جا پردکھنا تِن کر دا !                          مُکھوں آد الکھ جگاوندا ای
سارے سنتاں پھیر ڈنڈوت کر کے                   آسن لا دُھواں پھیر پاوندا ای
قادر یار پھیر پُچھیا گُرو پُورے                      مائی باپ دا حال سناوندا ای

گورکھ نوں سیالکوٹ دا حال دسنا

17)

ظ۔ظُہروں پہلوں اوتھے جا وڑیا                  ڈٹھا باغ اوجاڑ ویران ہویا ! !
اِک بِرچھ دے ہیٹھ میں جائے بیٹھا             پر اوبھی سی ناتھ جی سُکا ہویا
نام سمر کے آب دا چھٹا دِتا                      جڑاں سیتی او گُرو جی ہرا ہویا
قادر یار سبھ باغ گلزار ہویا !                  دُھمی خلق تے شہر وہیر ہویا

18)

ع۔ عام اوتھے لوک عرض کردے               لگے اپنے ارتھ سناونے نوں
مہربانگی آپ دی نال سائیاں                   ارتھی ارتھ لگے تدوں پاونے نوں
سُنیا راجے تے رانی دے ہت آیا                دِلوں لوچے مراد دے پاونے نوں
قادر یار میں ادب تاں بہت کیتا                 پِتا جان کے جیو ڈراونے نوں

19)

غ۔ غم دے نال مونہوں بولیا ای                   سلواہن راجا شرماء کے جی
اسیں لوک سنساری ہاں دُکھاں بھرے              تُسیں سادھ تپسی پربِت بھاء کے جی
اسیں آکھیا ارتھ کہو اپنا تُوں                        راجا رویا درد سُناء کے جی
قادر یار بُلا کے آکھیا میں                             اِک پتر ہوسی گھر آئیکے جی

20)

ف۔ فیر رانی مویہوں سچ کیہا                   پُورن پتر ایہدے گھر جمیا سی
نال تہمتاں میں مروا دِتا ! !                          راجا سن کے گل نوں کنبیا سی
پھیر کیہا میں راجیا بخش ایہنوں              گھر پتر ہو گو راجا تھمیا سی
قادر یار تدوں رانی اِچھراں دا                     درس کیتا جیہدا جیو گُمیا سی


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels