Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> پورن بھگت پنجویں سہ حرفی بند 1-10

پورن بھگت پنجویں سہ حرفی بند 1-10

قادر یار
February 20th, 2008



1)

الف۔ آپ خدا ملایا ہے                         پُورن بارھیں ورھیں پھیر پیاں نوں
نالے ماتا نوں اکھیاں دتیاں سو                   نالے لال دِتا اکلاپیاں نوں
راجا رو کے جی اُٹھ گل ملیا                     پچھوتاوندا بچن الاپیاں نوں !
قادر یار کہندا پُورن بھگت اوہنوں           پچھوتاؤ نہ وقت دیہاپیاں نوں

2)

ب۔ بہت ہوئی پریشان لُونا                     پُورن ویکھدی نوں چڑھ تپ جائے
رؤسیا ہوئیا پڑدے جوت چلی                   زمین ویہل نہ دے سو چھپ جائے!
پُورن نظر کیتی لُونا کھلی پچھے                لوک پاس آون چڑھ دُھپ جائے
قادر یار جو جو متھا ٹیکدا ہے                 لُونا نال حیرانگی کھپ جائے !

3)

ت۔ توں نہ ہو غم ناک مائے               پُورن آکھدا لُونا نوں بال ہوئے
تیرے وس ناہیں سندا کول راجا            پچھلا رکھیں نہ خواب خیال کوئے !
دامن گیر میں اپنے باپ دا ہاں              جس پچھیا نہیں احوال کوئے
قادر یار جہی میرے باپ کیتی             ایسی کون کردا پُتر نال کوئے !

4)

ث۔ ثابتی اِک نہ گل چلے                         راجا گھٹ لتھا شرمیندگی توں
دِلوں جاندا میتھوں کیہ ورتیا سی                صاحب دِل ہویا ایہدی زندگی تھون
درگاہ وچ جواب کیہہ کراں گا میں               کم مول نہ ہویا پسندگی تھوں !
قادر یار سلواہن دا ات ویلے                         رنگ زرد ہویا شرمیندگی تھوں

سلواہن دا پُورن نوں راج بھاگ سنبھالن لئی کہنا

5)

ج۔ جاؤ وسو تُسیں گھر باریں                 پُورن آکھدا باپ نوں سنی راجا
کرے تاں دی سوپنا اوس ویلے                بانہوں پکڑ لے جا توں ہُنی راجا
نالے لُونا نوں جاننا اوسے طرح                سچو سچ نتار کے پُنی راجا
قادر یار اس روز دا ذکر کر کے                 قصہ جوڑ بنایا سی گُنی راجا

6)

ح۔ حکم کیتا راجے اوس ویلے               گھر چل میرے آکھے لگ پُتا
کُنجی پھڑ توں دست خزانیاں دی            پہن بیٹھ توں حکم دی پگ پُتا
تینوں ویکھ میرا من سادھ ہویا              دِلوں بُجھی ہے حرص دی اگ پُتا
قادر یار کردا سلواہن ترلے                      میں تاں سونترا سدیا جگ پُتا

7)

خ۔ خاہش جنجال دی نہیں مینوں               پُورن آکھدا بنھ کے رکھدے ہو
میرے ولوں تاں راج لُٹاء دیوو                    جے کر آپ کماء نہ سکدے ہو
جیہنوں درد میرا میں تاں سمجھ لیا             تُسیں ترلے کردے مارے نک دے ہو
قادر یار میں سر پر جاونا جے                     نہیں پاس رہنا جیہڑی تکدے ہو

8)

د۔ دے کے پھیر دُعا مونہوں                   پھیر ماپیاں نون اک بچن کہسی
تخت بہے گا ہور بھراء میرا                  جیہڑا ہو گو تُساں گھر راج بلیسی
مرد ہوگو راجا وڈے حوصلے دا              جِتھے پووے مُقدمہ فتح لیسی
قادر یار رسالُو نُوں بیٹا آکھیں                 پھیر راج راجا تیرا سُکھی رہسی
9)
ذ۔ ذرا نہ پؤ وے خیال میرے                 پھیر مائی اگے ہتھ بندیو سو
آکھے ماؤ نوں نگر نہ تھاؤں میرا             کیہا باپ دا سبھ چاء ردیو سو
آکھے جوگیاں نوں کرو کُوچ ڈیرا            بلا حِرص دا چاء اُلدیو سو !
قادر یار لگا اوتھوں تُرن پُورن                مائی اِچھراں نوں پھیر سدیو سو

10)

ر۔ روئے کے آکھدا ماں تائیں                   جیہڑا کرم لکھیا سوئی پالیا میں
اس شہر تھیں باپ تغیئر کر کے               کیہڑی پت دے نال نِکالیا میں
کیہنوں کھول کے دِلے دا حال دساں          جیہڑا جفر سریر تے جالیا میں
قادر یار میاں پورن بھگت آکھے                ونڈ لئے نیں اپنے طالع میں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels