Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پورن بھگت چوتھی سہ حرفی بند 11- 20

قصہ پورن بھگت چوتھی سہ حرفی بند 11- 20

قادر یار
February 20th, 2008
5 / 5 (1 Votes)



11)

ز۔ زور نہ سی سوہنے نال تیرے              کھڑے دست پُکار دی دَل سو ہی
پُورن نظر نہ آوندا سندراں نوں                 رانی رنگ محل توں تُٹ موئی
دھپے عشق دے مار حیران کیتی             پاٹے نین نکوں چلی رت سوہی
قادر یار جا لوک حیران ہوئے                اج باز تے چڑی اَسوار ہوئی

12)

س۔ سندراں دے سواس مُکت ہوئے               پُورن نس کے گرو دے پاس پُنا
گُرو آکھیا سی کر قہر آئیوں                        تیرے کارنے ہویا ہے اج خونا
پُورن پرت ڈٹھا گرو خفا دِسے                      بھر نین گیڑ اونے تدے رُنا
قادر یار گُرو کیہا جا گولا ! !                      مِل ماپیاں نوں پوی ٹھنڈ اوہناں

13)

ش۔ شہر سلکوٹ دی طرف بنے                گُرو وِداع کِیتا مہربان ہو کے
باغ اپنے وِچ آسن آن لایا بارھیں                  ورھیں راجے نگہواں ہوکے
لوک آکھدے مویا ہے خصم ایہدا              تخت اُجڑے تدوں ویران ہو کے
قادر یار ترونکیا جا پانی !                        داکھاں پکیاں نی سوا دھان ہو کے

14)

ص۔ صفت سُن کے کرامات ظاہرا                سارا شہر ہما کے آوندا ای
باراں برس گُزرے لکھے کون کوئی               پڑدا پاء کے مُکھ چھپاوندا ای
جے کوئی پاس آوے اوہ مُراد پاوے              نام رب دے آس پچاوندا ای
قادر یار جاندے دُکھ دُکھیاندے                    پُورن اَنھیاں نین دیواوندا ای

15)

ض۔ ضرب چلاوندا جوت ایسی             راجا سنے رانی چل آئیا ای
اگے اگے سلواہن تے پچھے لُونا              رب دونہاں نوں باغ لیایا ای
پورن جانیا ماتا تے پِتا آئے                     جہناں مار کھوہے گھتوایا ای !
قادر یار میاں اگوں اُٹھ پُورن                   چُم چرن تے سیس نیوائیا ای

16)

ط۔ طرف تیری متھا ٹیکنے نوں               راجا کہے اسیں سیوادار آئے
اگوں اُٹھ کے تدھ فقیر سائیں                  وڈا بھار ساڈے سِر چاڑھیا اے
میرے بھانے تے راجیا رب تینوں              کر گُراں دے رُوپ اوتاریا اے
قادر یار توں دیش دا مل خاوند               تاں میں اینتا بچن پُکاریا اے

17)

ظ۔ ظاہر حقیقتاں کریں راجا                    کیوں کر چل کے آئیوں استھان میرے
راجا آکھدا سچ فقیر سائیں                    گھر نہیں ہوندی سنتان میرے
آنگن دِسے نہ کھیڈ دا بال مینوں               سُنجے پئے نی محل ویران میرے
قادر یار میاں چووی برس گُزرے              گھر دِسدا ای نہیں نِشان میرے

18)

ع۔ عقل ساڈی اندر آوندا اے               اِک پُتر تیرے گھر ہویا ہے
اوہنو جا کے وِچ اُجاڑ دے جی               وانگوں بکرے دے کسے کوھیا ہے
اوہدی وارتا راجیا دس مینوں                کس دُکھ عذاب نال مویا ہے
قادر یار سلواہن نوں یاد آیا                   دُکھ پتر دے نین بھر رویا ہے

19)

غ۔ غبر گئے جدوں برس چووی               راجا آکھدا سد فقیر سائیں
بیٹا اِک میرے گھر جمیا سی                 رانی اِچھراں دے سی شِکم تائیں
ماتر ماں نوں ویکھ کُدھرم ہویا                 سن ماریا اوس دی داد خواہیں
قادر یار کہندا پُورن بھگت اگوں               راجا مائی جھوٹھی پتر دوش ناہیں

20)

پھ۔ پھول کے وارتا دس مینوں                 پُورن آکھدا پتر دی گل ساری
گھر ہو گو اولاد جو تد تیرے               جو کجھ ورتی زبان تھیں دس ساری
سچو سچ نتار کے دس مینوں                  جھوٹھی گل نہ کرنی توں ذرا کائی
قادر یار اولاد دی سک مندی                    لُونا کھول کے درد سبھ دسیا ای


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels