Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پورن بھگت چوتھی سہ حرفی 1-10

قصہ پورن بھگت چوتھی سہ حرفی 1-10

قادر یار
February 20th, 2008



1)

الف۔ آیا جوگی سبھے ویکھ اوہنوں            چاروں طرف چوفیروں گھت گھیرا
رانی سندراں مکھ توں لاہ پرڈا                      سبھناں ول دیدار دا دے پھیرا
گرو ناتھ تے پورن رہے ثابت                       ہور ڈولیا سِدھاں دا سبھ ڈیرا
قادر یار گُرو ترس وان ہویا                        مونہوں منگ رانی جو کجھ جیو تیرا

2)

ب۔ بہت ہے گُرو جی یاد تیری             رانی آکھدی کجھ اٹکا ناہیں
ہیرے لال جواہر سورَن موتی                گھر میوندے مال متاع ناہیں
اگے گولیاں باندیاں دانیاں نیں               ہور کاسے دی کجھ پروا ناہیں
قادر یار دیدار نوں اَسیں آئے                   ہور منگنے دی دِل چاہ ناہیں

3)

ت۔تٹھا ہاں رانئیے منگ میتھوں               دوجی وار کہندا گُرو ایہو ویلا !
رنگ رنگ دی باغ بہار ہوئی                   سبھ آیا ہے گُرو دے ویکھ میلا
رانی سُندراں پھیر کے نظر کیتی                  پُورن بھگت ہے امرت پھل کیلا
قادر یار جے تٹھا ہیں بخش مینوں             رانی آکھدی پُورن بھگت چیلا

پُورن چلیا رانی دے ڈھک ہو کے

4)

ث۔ ثابتی نال بچن بیٹھا                        دل کھسدے گُرو نے ٹوریا ای
پُورن چلیا رانی دے ڈھک ہو کے             حکم گُرو دا اوس نہ موڑیا ای
رانی سندراں کرے دلیل دل دی               سوئی کرم پایا جو میں لوڑیا ای
قادر یار میاں واٹے جاء پُورن                   رانی گُرو دا سنگ وچھوڑیا ای

5)

ج۔جدوں لے سندراں تُری پوُرن                   کہندی اج چڑھی چلے راج دے جی
خوشی وچ نہ میوندی چولڑی دے             بند ٹٹ گئے پشواز دے جی
جیسا لال میں اج خرید آندا                     ایسا ہور نہ کوئی ویہاج دے جی
قادر یار جاں اپنے شہر وڑدی                      کم ویکھ غریب نواز دے جی

پُورن دا بہانے نال نس جانا

6)

ھ۔ ہوش کیتی پُورن بھگت اوتھے                     بیٹھ حال احوال پرانیا ای
جیہناں گلاں توں رب جی سنگدا ساں                کیہا رانی نے مینوں رنجانیا ای
اوتھے آکھدا میں دِشا بیٹھ آواں                         دِلوں سمجھ کے بول وکھانیا ای
قادر یار کھڑو کے سندراں نوں                           پورن آکھدا وانگ انجانیاں ای

7)

خ۔ خبر نہ سی رانی سندراں نوں                 بُورن دے دغا تُر جاوندا ای
میں تاں جاندی سی میرے حسن متا             جیہڑے ایہے ارجاف رُماوند ای
اوہنوں گولیاں باندیاں نال دِتیاں                   آکھے پھیر دِشا پار آوندا ای
قادر یار میاں واٹے جاء پُورن                          ٹلے بال دا راہ پچھاندا ای

8)

د۔ دسیا آ کے گولیاں نے                              پُورن رانئیے دھروہ کما گیا
اسیں گُرو دے واسطے پاء رہیاں                    ہتھیں پے کنی چھڈوا گیا
رانی سندراں سن بیتاب ہوئی                      سسی وانگ مینوں بِرہوں لاء گیا
قادر یار کھلو کے پُچھیا سو                         دسو گولیو نی کیہڑے راہ گیا

9)

ذ۔ ذرا نہ طاقت رہی تن وچ                     کمبلی سندراں غماں دے گیت لوکو
میں تاں بھلی تساں نہ بھلو کوئی                 لاوو جوگیاں نال پریِت لوکو
جنگل گئے نہ بوہڑے سندراں نوں              جوگی ہین اگے کیہدے میت لوکو
قادر یار پچھا کھڑی ویکھدی ساں             خوش وقت دی ہویا بتیت لوکو

10)

ر۔ رنگ محل تے چڑھی رانی                     رو آکھدی پُورنا لُٹ گئیوں
باغ ہرس دا پک تیار ہویا                          ہتھیں لا کے بوُٹیاں پُٹ گئیوں
گھڑی بیٹھ نہ کیِتِیاں رج گلاں                    جھوٹھی پریِت لگا کے اُٹھ گئیوں
قادر یار میاں سسی وانگ مینوں                  تھلاں وِچ کُوکیندی نوں سُٹ گئیوں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels