Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پورن بھگت تیجی سہ حرفی بند 21-30

قصہ پورن بھگت تیجی سہ حرفی بند 21-30

قادر یار
February 20th, 2008




21)

ق۔ قُفل صدوق دا کھول رانی                  بھری بوری اُلٹ کے ڈھیر کر دی
ہیرے لال جواہر ہور پائے                       بھر تھال لیاوندی پُور زری دی
رانی سُندراں مُکھ توں لاہ پردا                   چرن چُم کے پیر تے سیس دھردی
قادر یار کہے کھڑے ہو رہو ایتھے             روز رہاں گی ہو غلام بردی

22)

ک۔کرم کرو وسو پاس میرے                        کھلی اک میں عرض گزارنی ہاں
اندر چلو تاں رنگ محل تائیں                      توشک فرش وچھا بہاونی ہاں
کراں ٹہل جو تُساں دی خوشی ہو وے        بھوجن کھاؤ تاں تُرت پکاونی ہاں
قادر یار رانی کھڑی عرض کردی                  گھڑی رہو تاں جیوکا پاونی ہاں

23)

ل۔ لیائیے بھچھِیا کہے پُورن                      اندر واڑ بناؤ نہ چور سانوں
اگے اک پھاہی چوں لنگھ آئے                  ہن قضئیے پاؤ نہ ہور سانوں
محلاں وچ سیاونے تُسیں راجے                اسیں جانڈرے بھلے ہاں ٹور سانوں
قادر یار پھر بھوجن دی بھکھ ناہیں            سوا پہر دہ واٹ نہ موڑ سانوں

24)

م۔ منتاں کرے نہ رہے پُورن                    لے کے بھچیا گُرو دے کول آیا
ہتھ جوڑ کہندا گُرو ناتھ اگے               میں تاں رُر بُرو جا کے خیر لیایا
گُرو ناتھ تے ویکھ حیران ہویا              ہیرے لال جواہراں کِس پایا
قادر کہندا رانی سندراں نے                  ایہہ خیر تُساں ول ای گھلایا

ُپُورن دا ہیرے جواہر موڑن آونا

25)

ن۔ نہیں ایہہ دولتاں کم ساڈے             گُرو آکھدا موڑے جاء پُوتا
مایا لوبھ فقیراں دا کم نائیں !                بھکھیا بھوجن منگ لے آء پُوتا
فقر جہی نہ دولت ہور کوئی                سانوں دِتی ہے آپ اِلہ پُوتا
قادر یار جواہراں نوں روڑ جانوں             ایہہ دولت دنیا ہواء پُوتا

26)

و۔ ونجھن لگا اگلے بھلک پُورن               موتی موڑنے نوں شہر ول اُتے
رانی سندراں اوس دا راہ تکے                  کھڑی ویکھدی رنگ محل اُتے
جانی جان فقیراں دا رب والی                  پورن جاء وڑیا گھڑی وقت اُتے
قادر یار پُورن اوس دا گاہک ناہیں         رانی لوڑ دی سی جیہڑی گل اوتھے

27)

ھ۔ ہس کے آ سلام کر دی                  رانی سُندراں پورن بھگت تائیں
پورن بھگت اُلٹ کے آکھیا سو              موتی سانبھ رانی ساڈے کم ناہیں
پکے بھوجن دی دل نوں چاء ہیگی        اِچھیا ہے تاں تُرت پکاء لیا ہیں
قادر یار میرا گُرو خفے ہندا !               لال موتیِاں ہیرے نہ چِت لائیں

28)

ل۔ لیائے کے ہیرے جواہراں نوں             پُورن سندراں دے پلے پاوندا ای
رانی سندراں ویکھ بیتاب ہوئی              پُورن دے موتی ترت جاوندا ای
رانی سُندراں بھوجن پکان لگی              پورن گرو جی دے پاس آوندا ای
قادر یار پُورن جاء گُرو اگے                   ہتھ بنھ کے سیس نواوندا ای

کوی اوواچ
29)
الف۔ آکھدے صورت ہے رزق ادھا               جے کر آپ کسے نوں رب دیوے
صورت وند جے کسے دے ول ویکھے            سب کوئی بلاوندا ہس کے وفعے
مار صورتاں دے مر گئے عاشق                   نہیں حسن دا درد فراق ایویں
قادر یار پروا کیہہ سوہنیاں نوں                  جیہنے حسن دی منگی مراد لیوے

رانی سندراں دا گرو گورکھ کول جانا

30)

ی۔ یاد کیتی کھول چیز ساری               پُورن آکھدا گرو جی آوندی اے
رانی سندراں مُکھ توں لاہ پڑدا                   ہتھ بنھ کے سیس نیواوندی اے
چھیتی بھوجن گُرو دے رکھ اگے               عاجز ہوء اِرجاف رُماوندی اے
قادر یار اسیں کھڑے ویکھنے نوں             رانی کیہہ انعام لے آوندی اے










Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels