Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پورن بھگت تیجی سہ حرفی بند 11- 20

قصہ پورن بھگت تیجی سہ حرفی بند 11- 20

قادر یار
February 20th, 2008

 

11)

ز۔زور بے زور ہو گُرو اگے                        پُورن آکے سیس نِواوندا اے
گُرو پکڑ کے سیس نوں لِٹ کُتری            کن پاڑ کے مُندراں پاوندا اے
گیری رنگ پوشاکیاں کھول بُچے            ہتھیں اپنی ناتھ پہناوندا اے
قادر یار گُرو سوا لکھ وچوں                    پُورن بھگت مہنت بناوندا اے

کوی اواچ

12)

س۔ سنو لوکو قصہ عاشقاں دا                   جنہاں رب دے نام توں جان واری
اوہناں جان توں موت قبول کیتی                پر ثابتی نہ دِلوں مُول ہاری
رب جد کد اوہناں نوں بخشدا ہے               دُکھ دے کے سُکھ دی کرے کاری
قادر یار جے اوس دے ہو رہئیے               اوہنوں پوندی ہے شرم دی لج ساری

پورن دا سندراں توں خیرلیاونا

13)

ش۔ شہر بھلا رانی سندراں دا                  پُورن چلیا خاک رمائے کے جی
جوگی آکھدا پُورنا اج جے توں                آویں سندراں توں فتح پائے کے جی
اگے کنی جوگی اوتھے ہو آئے                محلیں ہیٹھ اواز بُلائے کے جی
قادر یار تیری سانوں خبر ناہیں            زور کرے جے پُورنا جائے کے جی

14)

ص۔ صاحب دا نام وھیاء کے جی          پُورن آکھدا حکم دی ٹہل کائی
گُرو ناتھ پھڑا کے ہتھ لوٹا !                تھاپی پُشت پناہ دی مگر لائی
گُرو آکھدا بچہ جی مت ساڈی          ہر کسے نوں سمجھنا بہن مائی
قادر یار سمبھال کے ملک پھرنا !         مت داغ نہ صورت نوں لگ جائی

15)

ض ۔ ضرورت جے کسے دی ہوندی مینوں           کیوں اپنا آپ گنواوندا میں !
پہلاں لُونا دا آکھیا من لیندا !                            کھوہے پیندا کیوں دست وڈھاوندا میں
ہن پھیر رہے تُسیں آکھ مینوں                          حرص ہندی تے مُلکھ نوں جاوندا میں
قادر یار جے خوشی دی گل ہندی                       گھر سو ویاہ کراوندا میں ! !

16)

ط۔ طالع وند فقیر پُورن !                     پہلے روز گدائی نوں چلیا ای
رانی سُندراں دے محل جا وڑیا              بُوہا رنگ محل دا ملیا ای
محلاں ہیٹھ جاں پُورن آواز کیتی            رانی خیر گولی ہتھ گھلیا ای
قادر یار غلام بے ہوش ہوئی                  پورن ویکھ سینہ تھر تھلیا ای

17)

ظ۔ظاہرا گولی نوں کہے پُورن              گھل رانی نوں آکے خیر پائے
اسیں خیر لینا رانی سُندراں توں           تُساں گولیاں توں نہیں لین آئے
پُورن کیہا تاں گولی نہ عُذر کیتا          پچھاں پرت کے رانی دے کول جائے
قادر یار میاں رانی سندراں نوں             گولی جا طعنہ تن بیچ لائے


18)

ع۔ عرض من رانئیے کہے گولی              تینوں صورت دا وڈا مان موئیے
جیہڑا آیا اج فقیر سائیں                      میں وی ویکھ کے ہوئی حیران موئیے
تیرے کولوں ہے سوہنا دس حصے            بھاویں غیر تاں دِل وچ جان موئیے
قادر یار میتھوں نہیں خیر لیندا               تیرے ویکھنے نوں کھڑا آن موئیے

پُورن نوں ویکھدیاں ای سندراں دا وِک جانا

19)

غ۔ غصہ آیا رانی سندراں نوں                باری کھول جھروکے دے وِچ رانی
کر نظر فقیر دی طرف ڈٹھا                    صورت ویکھ کے اوس دی سِک دھانی
ۤآکھے گولئیے نی ایہنوں سد اندر           ایہدی صورت ہی میرے من بھائی
قادر یار گولی کہندی آؤ اندر                رانی سندراں دے دل مہربانی

20)

ف۔ فیر کیہا پُورن بھگت اگوں              اندر جان فقیراں دا کرم ناہیں
باہر آکے رانی توں خیر پائیں                  اسیں فقیر ہاں تے دِلوں نرم ناہیں
اسیں آئے ہاں طلب دیدار دی نوں           کوئی ہور ساڈے دِل بھرم ناہیں
قادر یار اصیلاں دے اسی جائے              کوئی جات کُجات بے دھرم ناہیں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels