Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پُورن بھگت تیجی سہ حرفی بند 1-10

قصہ پُورن بھگت تیجی سہ حرفی بند 1-10

قادر یار
February 20th, 2008



پُورن دا گُرو گورکھ ناتھ نوں اپنا حال دسنا

1)

الف۔ آکھ سناوندا گُرو تائیں              قصہ حال حقیقتاں کھول کے جی
نیکی مائی تے باپ دی یاد کر کے         سب دسدا اوس نوں پھول کے جی
گُرو ناتھ جا اُس دے درد رُنا                ہنجو رت دیاں اکھیں ڈولھ کے جی
قادر یار سناوندا گل سبھو                سُخن درد فِراق دے بول کے جی

2)

ب۔ بوہت ساں لاڈلا جمیا میں                گھت دھولریں پالیا باپ مینوں
باریں ورہیں میں گُرو جی باہر آیا             جدوں حکم کیتا بابل آپ مینوں
لاگی سد کے کرن ویاہ لگے                     چڑھ گیا سی غم دا تاپ مینوں
قادر یار میں آکھیا باپ نوں جی                نہیں بھاوندی ایہہ گل آپ مینوں

3)

ت۔ تک ڈٹھا بابل ول میرے                 دِلوں سمجھیا میں ہوئی قہر وانی
کیویں رب کرایا تے آکھیو سو              کر حکم زبان تھیں مہر بانی
جا پُورنا مائی نوں ٹیک متھا                 گل سمجھے گُرو جی ہوء دانی
قادر یار میں جاء جاں محل وڑیا              ویکھ ہویا سی لُونا دا صِدق فانی

4)

ث۔ ثابتی رہی نہ وِچ اُسدے                      مینوں پکڑ کے پاس جہان لگی
گُرو ناتھ جی گل نوں سمجھیا جے              کُرہ زمین اسمان دا ڈھان لگی
کنی کھچِ کے اندروں باہر آیا                       جداَدھرم ڈٹھا جند جان لگی
قادر یار جاں رات نوں آیا راجا                   اوہنوں نالشاں نال سکھان لگی

5)

ج۔ جدوں سنی راجے گل اوہدی                 اوسے وقت مینوں سدواء کے جی
قہروان ہوئے باپ دے نین خونی                دھپا ماریا پاس بٹھلاء کے جی
اوسے وقت جلاداں نوں آکھیو سو              کھوہے وچ پاؤ ایہنوں جاء کے جی
قادر یار میاں ایسے کھوہے اندر                  کر گئے داخل مینوں آء کے جی

6)

ح۔ حال سناوندا گُرو تائیں                     کیہا ورتیا ایہہ نزول مینوں
میرے مائی تے باپ دے وس ناہیں            سبھے رب وکھاوندا سول مینوں
کرو کرم جی رب دا واسطہ جے                ہوون نین پران وصُول مینوں
قادر یار سناوندا گرو تائیں                      پچھا دے نہ جاوسو مُول مینوں

7)

خ۔ خوشی ہوئی گُرو ناتھ تھائیں                جل پاکے پُوریا تُرت میتا
ہتھیں اپنے اوس دے مونہہ لایا                     پردے گھل گئے جدوں گھٹ پیتا
پھیر بے پرواہ گرو ناتھ ہوریں                       پُوراں بھگت تائیں ساودھان کیتا
قادر یار گُزار کے برس باراں                         خست حال تائیںخوش خال کیتا

پُورن دی جوگ دی منگ تے گھورکھ ناتھ دی پروانگی

8)

د۔ دین لگا رُخصت اوس ویلے                    گُرو آکھدا بچہ جی ملکھ جاؤ
ویکھ باپ تے مائی نوں ٹھنڈ پاؤ                    دُکھ کٹیا جائے تے سُکھ پاؤ
پُورن آکھدا بے حساب ہے جی                       کن پاڑ میرے انگ خاک لاؤ
قادر یار کہندا پُورن بھگت اوتھے                  مہر بانگی دے گھر وِچ آؤ !

9)

ذ۔ ذرا نہ پوء خیال میرے                    گُرو آکھدا جوگ کمان اوکھا
فاقہ فقر تے سفر قبول کرنا                     دُنیا چھڈ دینی مرجان اوکھا
کام مار کے کرودھ نوں دور کرنا              من دی حِرص دا توڑنا مان اوکھا
قادر یار کہندا گُرو پُورن تائیں              ایس راہ دا مسئلہ پان اوکھا


10)

ر۔ رو کے پُورن ہتھ بنھے                           لڑ چھڈ تیرا کتھے جاوساں میں
فاقہ فقر تے صبر قبول سر تے                     تیرا حکم بجا لیاوساں میں
کرو کرم تے سیس پر ہتھ رکھو                   خزمت گار غُلام سداوساں میں
قادر یار تواضع ہو گو جیہڑی                  ٹہل ثابتی نال کراوساں میں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels