Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پورن بھگت دوجی سہ حرفی بند 21-30

قصہ پورن بھگت دوجی سہ حرفی بند 21-30

قادر یار
February 20th, 2008
5 / 5 (1 Votes)



21)

ک۔ کرم جاں بندے دے جاگدے نی             رب آن سبب بناوندا ای
سروپاء پنہاوندا قیدیاں نوں                        دُکھ دے کے سکھ دکھاوندا ای
رب بے پروا بے انت ہے جی                       اوہدا اَنت حساب نہ آوندا ای
قادر یار پھیر ثابتی ویکھ اُس دی                 رب حق نوں چا پُچاوندا ای

گورکھ ناتھ دا بوڑھنا

22)

ک۔ کئی جو مدتاں گزر گئیاں                     بارہ برس گُزرے پُورن کھوہ پائیاں
سائیں کرم کیتا بخشنہار ہویا !                     کوئی حکم سبب دا آن لائیا
گُرو گورکھ ناتھ نوں خوشی ہوئی                سیالکوٹ دی طرف نوں سیل آیا
قادر یار جا کھوہے تے کرن ڈیرہ                     اِک سادھ جو پانی نوں لین دھائیا

23)

ل۔ لج تاں کھوہے وِہا دِتی                       تلے پانی دے ول دھیان کر کے
وچوں آدمی دا بُت نظر آیا                    سادھ ویکھدا بُت نظیر دھر کے
کھادا خوف تے ہوش نہ رہی کائی           دوڑ آیا گرو دے پاس ڈر کے
قادر یار سناوندا گرو تائیں                     آیا جیوندا میں کیویں کیویں مر کے

24)

م۔ میں جاگُرو جی کھوہے چڑھنا                تلے پانی دے ول دھیان پایا
کھادا خوف تے ہوش نہ رہیا کائی               وچوں آدمی دا بت نظر آیا
کرم کرو تے چل کے آپ ویکھو                  کوئی آدمی جن کہ بھوت سایا
قادر یار اچرج دی گل سن کے                 سارا جھنڈ گُرو سیتی اُٹھ دھایا

گُرو گورکھ ناتھ دا پُورن نوں کھوہوں کڈھنا

25)

ن۔ نال دے سادھ خموش ہوئے                  گُرو پچھدا آپ کھلو کے جی
سچ دس کھاں توں ہیں کون کوئی             گُرو پچھدا کاہلیاں ہو کے جی
باراں برس نہ آدمی مونہہ لگا                     پُورن بولیا سی وچوں رو کے جی
قادر یار میں رُپ ہاں آدمی دا                      بھاویں ویکھ لوو آزمو کے جی

26)

و۔ واسطہ پا کے کہے پُورن                          منوں رب دے ناؤں سوال میرا
جیہڑی بنی سی آکھ سُنادساں میں               جیس کارن ہویا ایہا حال میرا
اہل ترس ہوسائیں دے روپ تسیں               باہر کڈھ کے پچھو احوال میرا
قادر یار تُسیں کڈھو باہر مینوں                    پھیر پچھنا حال احوال میرا

27)

ح۔ حکم زبان تھیں ناتھ کیتا                     لج تُرت وہاوندے وِچ چیلے
پُورن باہر آیا گرو لوتھ ڈٹھی                    جیویں گھائل کیتا شیر وچ بیلے
صورت سوہنی وچ نہ فرق کوئی               ہتھ پیر میلے گرو اوس ویلے
قادر یار جاں رب نوں یاد کیتا                 سچا رب جے ایس دے زخم میلے

28)

ل۔ لوتھ چُکا کے گُرو ہوراں                       پُورن بھگت نوں آندا ہے چک ڈیرے
بیٹھ نال تاگید دے پُچھیو نیں                    کیہڑے شہر نیں لڑکیا گھر تیرے
کِس دا پُت تے کیہہ ہے ناؤں تیرا                 کیوں کھوہ پایا وڈھے ہتھ تیرے
قادر یار سُناوندا گُرو تائیں                         رب جاندا جو بنی نال میرے

29)

الف۔ آکھدا مُلک اُجین ساڈا                  راجا بِکر ماجیت دی ول ہے جی
اوس مُلکوں آیا ساڈا باپ دادا                 سیالکوٹ بیٹھے ہن مل ہے جی
پُورن ناؤں نے پُتر سلواہن دا ہاں              جِس وڈھ سُٹیا وِچ ڈل دے جی
قادر یار ہن اپنا آپ دسو !                    تدے کھول دساں اگوں گل ہے جی

30)

ی۔ یاد کر چیلیاں کیہا اگوں                گُرو ناتھ جاں ہویا بخشن ہارا
کجھ منگ لے بے پرواہیاں تھوں               ٹلے بال گندائی دا سنت بھارا
ایہدا جوگ درگاہ منظور ہویا              متھا ٹیکدا کُل جہان سارا
قادر یار فقیراں دی گل سُن کے                پُورن پیا پیریں ہویا منت دارا







Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels