Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پورن بھگت دوجی سہ حرفی بند 11 -20

قصہ پورن بھگت دوجی سہ حرفی بند 11 -20

قادر یار
February 20th, 2008
5 / 5 (1 Votes)



11)

ز۔ زور نہ ڈاڈے دے نال کوئی                           پکڑ بے گناہ منگایا میں
کیہنوں کھول کے دل دا حال دساں                    جیہڑا گھات گناہ کرایا میں
میں تاں جھورنا اپنے طالع نوں                         ایہوں کرم نصیب لکھایا میں
قادر یار کہندا پورن بھگت اوتھے                    ہن راجے نے چور بنایا میں

12)

س۔ سمجھ راجا بُدھ ہار نائیں                         کہندی اِچھران واسطہ پا کے جی
امب وڈھ کے اک نوں واڑ دیویں                  پچھوتاویں گا وقت ویہاء کے جی
بُوٹا اپنا آپ پٹان لگوں                              جڑاں مڈھ تائیں اُکراء کے جی
قادر یار جے پُورن نوں ماریو ای                    باپ کون بلاؤ گا آء کے جی

13)

ش۔شکل نہ راجے دی نرم ہوئی                     قہروان ہو کے کہندا نال غصے
باہر جا کے چیرو حلال خورو                       چھنے رت پاؤ جیہڑی وچ جُثے
ایہدے ہتھ سھکاء کے وڈھیو جے                 وانگ بکرے دے ایہدی جان کُسے
قادر یار جاں راجے دا حکم ہویا                     پکڑ لیا جلاداں نے وقت اوسے

14)

ص۔ صاحب توں لکھیا لیکھ ایویں                    پُورن بھگت نوں لے جلاد چلے
گلی کوچیاں شہر ہڑتال ہوئی                            پاس رون وزیر دیوان کھلے !
تدوں غشی آئی رانی اِچھراں نوں                      جان نِکل نہ جاندی ہے کسے گلے
قادر یار میاں ماواں پتراں نوں                             لُونا ماریا کفر دی جھاڑ پلے

15)

ض۔ ضامنی دے چھڈوانی ہاں                    لُونا لکھ کے بھجیا خط چوری
پُتر بنن لگوں میرا پورنا وے                       ویکھ کہی میں دِتی آ ماؤں لوری
آکھے لگ میرے اجے ہئی ویلا                  اِسے وقت چھڈاوساں نال زوری
قادر یار کیوں جان گواونا ہیں                   لاء دِنی ہاں تہمتاں ول ہوری

16)

ط۔ طرف خدا دے جند دینی                       پُورن آکھدا وت نہ آونا ای
آخر جیونا لکھ ہزار برساں                          انت پھیر مائے مر جاونا ای
خط واچ کے پُورن نے لب سُٹی                    کیہڑی گل توں دھرم گواونا ای
قادر یار اَن ہوندیاں کرن جیہڑے                  آخر پھیر اوہناں پچھوتاونا ای

17)

ظ۔ ظلم کیتا مائے ماترے نی                        پُورن آکھدا پوری نہ پوے تیری
مندا حال کمایا ای نال میرے                      دھرم ہار کے تدھ دلیل پھیری
جیہڑی بنی مینوں ہن جھلساں میں             مر جائے گی روندڑی مائی میری
قادر یار جلاداں نوں کہے پُورن                    مِل لین دیو مینوں اِک ویری

18)

ع۔عرض کیتی سلواہن اگے                           خاطر ماؤں جلاد کھلو وندے نی
رانی اِچھراں تے پُورن بھگت اوتھے                جاندی وار دونویں مل روندے نی
پانی ڈولھ کے رت دا نیر اوتھے                      دلوں حرص جہان دی دھووندے نی
قادر یار جلاد پھر پئے کالہے                         پُتر ماں تھوں وِدعا ہوندے نی

19)

غ۔ غم کھادا رانی ہوئی انھی                     آہیں ماردی رب دے ویکھ بُوہے
پُتر پکڑ بگانیاں ماپیاں دے                         پُورن بھگت نوں لے گئے باہر جُوہے
اوہدے دست سھکاء کے وڈھو نیں             اوہدی لوتھ دباوندے وِچ کھوہے
قادر یار آلُونا نوں دین رتو !!                    ویکھ لاوندی ہار شنگار سوہے

کووی اواچ (مقولہ شاعر)

20)

ف۔ فیر کھلو کے صِفت کیتی                    ایہناں تریمتاں خان نِوا دِتے
راجے بھوج اُتے اَسوار ہویاں                       مار اڈیاں عقل بھلا دِتے
پُورن بھگت وچارا سی کون کوئی               یوسف جہے تاں کھوہ پواء دتے
قادر یار تریمتاں ڈاھڈیاں نی !                     دہسر جہے تاں تھاں مروا دِتے


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels