Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پورن بھگت پہلی سہ حرفی بند 21-30

قصہ پورن بھگت پہلی سہ حرفی بند 21-30

قادر یار
February 20th, 2008




21)

ق ۔ قہر کرا نہ پُورنا وے                           آکھے لگ جا جے بھلا چاہنا ایں
جھولی اڈ میں کھلی آں پاس تیرے                ہنسیاریا خیر نہیں پاونا ایں
کُچھڑ بیٹھ مما کدوں چُٹگیا ای                    ایویں کُوڑ دی ماؤں بناونا ایں
قادر یار نہ سنگدی کہے لُونا                        کیوں گردنیں خون رکھاونا ایں

22)

ک۔کہے پُورن سُنی سچ ماتا                      تیرے پلنگ تے پیر نہ مُول دھر ساں
اکھیں پھیر کے مُول نہ نظر کراں                  میں تاں سولی تے چڑھن قبول کرساں
کنی کھچِ کے اندروں باہر آیا                        کہندا دھرم گوا کے کیہ مرساں
قادر یار نہ سنگدی کہے لُونا                       تیرے لہو دا پُورنا گھُٹ بھر ساں

راجے دا محلیں آونا

23)

ل۔ لاہ کے ہار شنگار رانی                         راجے آوندے نوں بُرے حال ہوئی
راجا ویکھ حیران اسچرج ہویا                  محلیں جگیا نہ شمعدان کوئی
بیٹھ پُچھدا رانیے دس مینوں                     وقت سندھیا دے چڑھ پلنگ سوئی
قادر یار سلواہن دی گل سن کے              رانی اُٹھ کے دھرو دے نال روئی

24)

م۔ مینوں کیہ پچھنائیں راجیا وے             میرا دھوکھ کلیجڑا جالیو ای
جاء پُچھ کھا پُتر اپنے نوں                        جیہڑا بھورے کوتلا پالیو ای
اوہنوں رکھ تے دے جواب سانوں             ساڈا شوق جے تاں دلوں ٹالیو ای
قادر یار جد جھوٹھ پہاڑ جیڈا                 رانی راجے نوں تُرت سکھالیو ای

25)

ن۔ ناؤں لے کھاں اُوس گل دا توں               جیہڑی گل پورن تینوں آکھ گیا
جیہڑا نال تیرے مندا بولیا سو                   اُس نوں دیواں پھاہے میرا پُت کیہا
اج نال ماؤں کرے سُخن ایسا                       بھلکے دیگ کھٹی مینوں کھٹ ایہا
قادر یار پھیر ہوئی بیداد نگری                     انھے راجے دے پُورن ہے وس پیا

26)
 
و۔ ویکھ راجا مندا حال  میرا                      رانی آپ دلوں درد دسیا ای
پُتر پُتر میں آکھدی رہی مونہوں               پورن بھرتیاں وانگراں ہسیا ای
وینی کڈھ کے دسدی ویکھ چُوڑا                بھنسی ونگ تے ہتھ ولسا ای
قادر یار میں زور وکھا لیا ای                    پُورن تدوں محل تھوں نسیا ای

27)

ھ۔ ہو کھڑا دلگیر راجا                        رتو رت اکھیں متھے وٹ پائے
پتھر دل ہویا سکے پتر ولوں                دِلوں غضب دا بھانبڑا مچ دا جائے
مچھی وانگ تڑفدا رات رہیا                 کدی پئے لما کدی اُٹھ بہے
قادر یار مندا دُکھ استری دا                    پُورن جیوندا کسے سبب رہے

28)

ل۔ لُوتِیاں رہن نہ دیندیاں نیں                     نال نالِشاں شہر ویران کیتا
مُڈھوں گلاں وی ہوندیاں آئیاں نی              اگے کُئیِاں دا الکھ جیان کِیتا
پُورن نال اولڑی ہون لگی                           جِس دی ماؤں ایہہ صاف رُمان کیتا
قادر یار چڑھیا دن سکھ دا جی                      راجے بیٹھ چوکی اشنان کیتا

راجے دا پُورن نوں بُلا بھیجنا

29)

الف۔ آکھدا سد کے چوبداراں                      ذرا سد کے پُورن لیاونا جے
جھب جاؤ شتاب نہ ڈھل لاؤ                         نال سد وزِیر لیاؤنا جے
کڈھے گالیاں دونہاں نوں کرو حاضر             جھبدے جاؤ نہ چھڈ کے آونا جے
قادر یار جے پُچھسی کم اگوں                     راجے سدیا جاء فرماونا جے

30)

ی۔ یاد کیتا راجے باپ تینوں                 ہتھ بنھ کے آکھیا چوبداراں
سُنی گل تے دِل نوں سُجھ گیوس            جیہڑی گاوندی سی کل ماؤں داراں
جِس کم نوں راجے یاد کیتا                     راگ بُجھیا تے وچ گئیاں تاراں
قادر یار میاں تُر پیا پُورن                       آن کردا ہے باپ نوں نمسکاراں






Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels