Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> پُورن بھگت - قادر یار >> قصہ پُورن بھگت پہلی سہ حرفی بند 1-10

قصہ پُورن بھگت پہلی سہ حرفی بند 1-10

قادر یار
February 20th, 2008
5 / 5 (1 Votes)


1

پُورن دا جنم

الف آکھ سکھی سیالکوٹ اندار                پورن پُت سلواہن نے جایا ای
جدوں جمیا راجے نوں خبر ہوئی                سد پنڈتاں وید پڑھایا ای
باراں برس نہ راجیا منہہ لگیں                  ویکھ پنڈتاں ایہہ فرمایا ای
قادر یار میاں پورن بھگت تائیں                  باپ جمدیاں ای بھویرے پایا ای

2)

ب۔ بید اُتے جیویں لکھیا سی                  تویں پنڈتاں آکھی سناءِ دِتا
پُورن اک ہنیریوں نکلیا سی                   دوجی کو ٹھڑی دے وچ پاء دِتا
سبھو گولیاں باندیِاں دائیاں نوں               باراں برس دا خرچ پواءِ دِتا
قادر یار پُورن بھگت تائیں                        باپ جمدیاں قید کراءِ دِتا

3
 
ت۔ تابع نال اُستاد ہوئے                           لگے وِدیا عقل سکھاونے نوں
چھیاں برساں دا پُورن بھگت ہویا               پاندھے پوتھیاں دین پڑھاونے نوں
تیر اندازاں نے ہتھ کمان دِتی                    دسن ترکشاں تیر چلاونے نوں
قادر یار جوان جد ہویا پُورن                     دم دم لوچے باہر آونے نوں

پُورن دا پیو دے دربار وچ آونا

(
4)

ث۔ ثابتی وِدیا سِکھ کے جی                       باراں برس گُزرے خبردار ہویا
پُورن پُتر راجے سلواہن تائیں                     پان لے کے ملن تیار ہویا
چڑھی حرِص راجے سلواہن تائیں                چُگ اڈیاں پباں دے بھار ہویا
قادر یار صورت راجے جدوں ڈٹھی               چڑھی ہرس تے مست سنسار ہویا

5)

ج۔ جاءِ راجے سلواہن آندی                          اِک اِستری ہور ویاہ کے جی
اوس دی جات چمیاری تے نال لُونا                 گھر آندی سی اِین مناءِ کے جی
صورت اوس دی چند مہتاب وانگوں               جدوں بیٹھی دی زیوراں پاءِ کے جی
قادر یار کہہ آکھ سُناوساں میں                        پنچھی ڈِگدے درشن پاءِ کے جی
 
6)

ھ۔ ہار شنگھار سبھ پہر کے جی                     پُورن نال مہور تاں باہر آیا
کڈھ بھوہریوں باپ دا بھور تازی                     ٹگا رکھ کے وِچ بازار آیا
خوشی بہت ہوئی رانی اِچھراں نوں            گھریں دین ودھئی سنسار آیا
قادر یار میاں باراں برس پچھوں                         پُورن راجیاں دے دربار آیا

7)

خ۔ خوشی ہوئی سلواہن راجے                  پُورن آکے جدوں سلام کیتا
خوشی نال نہ میوندا وچ جامے                   گؤاں منیاں تے پُن دان کیتا
پُورن وِچ کچہری دے آن بیٹھا                   لوکاں سبھناں ول دھیان کیتا
قادر یار میاں سلواہن راجے                      ہتھوں سائیں دے نام کجھ دان کیتا

8)

د۔ دسدا پچھدا لاگیاں نوں                          سلواہن راجا تدوں گج کے جی
پورن بھگت دا ڈھونڈ ساں ساک یارو           جِتھے چل ڈُھکئیے دِن اج کے جی
مینوں سکدیاں رب نے لال دتا                     اکھیں ویکھ لیا ہن رج کے جی
قادر یار میاں پورن بھگت اگوں                    کہندا سُخن سچا اِک وجے جی

9)

ذ۔ ذرا نہ باپ توں سنگ کردا                      کہندا بابلا پُت ویاہو ناہیں
جس واسطے لوک ویاہ کردے                    میرے من اجے کوئی چاؤ ناہیں
میرا بھور سیلانی ہے روح ایویں                     بنھ بیڑیاں بابلا پاؤ ناہیں
قادر یار نہ سنگدا کہے پُورن                          میتھوں رب دا ناؤں بھُلاؤ ناہیں

10)

ر۔ رنگ تغیر ہو گیا سُن کے                         پُورن بھگت ولوں سلواہن دا ای
کولوں اُٹھ وزیر نے مت دِتی                         اجے ایہہ کی راجیا جاندا ای
جدوں ہو گو جوان کر لیگو آپے                     تیتھوں باہرا فِکر ویاھن دا ای
قادر یار وزیر دے لگ آکھے                          راجا پھیر خوشی اندر آوندا ای


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels