Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کلام خواجہ فرہد >> آکھیا خواجہ فرید نے 193-202

آکھیا خواجہ فرید نے 193-202

خواجہ فرید
March 7th, 2008

193
توں بن مہیں دا چاک وے دلڑی غماں دی جھوک ہے
جو جو خوشی سر سبز تھئی صر صر ڈکھاں توں سوک ہے

گئی ریت پت ڈت گھت منڈھوں اصلوں نہ ٹکساں اتھ منڈھوں
ساڑے نہ سہساں نت منڈھوں ایہہ گالھ روک دی روک ہے

رل مل تتی نوں تیندیاں رکھ ویر دین الیندیاں
ہکڑیاں الابنھے ڈیندیاں ہکڑیاں دی نوک تے ٹوک ہے

رو رو اکھیں وچ پئیاں چراں کل مردی شالا اج مراں
یاونج بڈاں یا بھوئیں وڑاں گیا یار تروڑ سنجوک ہے

ڈکھ سول ہار ہنڈھیرے آئے سرتے سخت رنڈیپڑے
بدبخت ضعف بڈھیپڑے کیا ملیا تھوک کوں تھوک ہے

قسمت فرید دی تھئی پٹھی گیا رول سانول ڈے پٹھی
چٹڑے پدھرتے میں لٹی
خوش وسدا سارا لوک ہے

کر قربانی


194
تیرا نینہہ نبھیساں زورے
سانوں ہٹکے کون تے ہوڑھے

جان جلیساں سیس سڑیساں سہجوں سوز سہیساں
سارا شرم شعور لوڑھیساں ساری عار ویار اٹھیساں
تن من دھن سبھ ملک سجن دے تونے کیہہ جو کرم وچھوڑے

عشق اجڑیم سولاں ساڑیم درداں لائے ویرے
روگ کروپ کشالے ہر دم گانے گہنے سہرے
راج ببانے تول وہانے وسرنے زورے تورے

پیکے ٹوکاں کرم سوہریجے مارم جگتاں نوکاں
مٹھڑی دلڑی لٹڑی دا ہے قبلہ یار دیاں جھوکاں
ماپیو خویش قبیلہ مل مل ڈیندے دھکڑے دھوڑے

چشماں جادو جوڑ جگائے ہوش قرار بھلایا
ڈکھڑے پکھڑے آئے غم ہم دم دم نال سوایا
غمزے خوب دھموڑے ڈیون رمزاں گھتدیاں گھوڑے

یار فرید نہ وسرم ہرگز رو رو دھانہیں کرساں
جیندیں مردیں اوکھیں ساہ محبت بھرساں
ڈوڑی سک دی سانگ جگر وچ
جے ڈکھ ڈیوم ڈوڑے
195
تیرے بناں سانول بہوں دلڑی الگ بے آس ہے
جندڑی جلے سینہ سڑے سر چور ہے تن ماس ہے

جیڑا غماں دے وات ہے ہیہات ہے ہیہات ہے
ہک ڈکھ تتی دے ساتھ ہے سکھ دی نہ بو نہ باس ہے

جیں ڈینہہ پنل گیا کیچ ول سٹ سیج کھٹ رنگیں محل
جھاگاں جبل گھاٹیاں تے تھل ہک مونجھ ہے بئی پیاس ہے

وسرے نہالی تول سبھ پوپاتے بینسر بول سبھ
ہن سوز ہے یا سول سبھ یا درد ہے یا یاس ہے

کڈے فرید اج جھج نسوں جتھ رچھ تے باندردی وسوں
ڈینیں ممیں، راخس بہوں
سو غول لکھ نسناس ہے
196
ٹوبھا بنواڈے یکا تڑتاڑ تے سندھڑوں دوراتاڑتے
صبح سحوریں گبھکن مٹیاں جھوپڑ دے اگواڑتے
روہی راوے روہیں دھماں ہوک پودے ونج ماڑتے
اچڑے ٹبڑے ساگردے چڑھا پووم پہاڑتے
چو طرفوں ویہہ پانی آوے سوہنے صاف جھکاڑتے
پاک ڈہر وچ ٹوبھا ماروں نہ جھت جھاڑ کجاڑتے
روہی واس سبھے لڈ اوسن اپنیاں جھوکاں ساڑتے
پھلو ڈہے تے منت لیسوں تھورا چڑھیسوں دینے لاڑتے
آن فرید سوہیساں چنورے
شہر بزار اجاڑ تے
197
ٹوبھا کھٹا ڈے سوہنی جاتاڑتے اوہجانہ ہووے ساری ماڑتے
ٹوبھے باجھوں مول نہ بہساں نہ گٹھ تے نہ پاڑ تے
ڈینہاں پیسوں لسیاں گاویاں راتیں کھیر کوں کاڑھ تے
توں بن سانول اگ اڑیساں چولا بوچھن پاڑ تے
جے نہ اوسیں توں ول جھوکاں لڈسوں جھوپڑ ساڑتے
جھوپڑ جوڑ بنیسوں کھپ دے تھل دے صاف پساڑتے
گائیں سہنس سوائیاں سوہنیاں ڈوبھسن آن اوکاڑ تے
ٹوبھااینویسوں دل دے سانگے منت چڑھیسوں لعلولاڑتے
آوم راحت ڈوڑی چوہیر لانے پھوگ لانے پھوگ دی واڑتے
فرح فرید نوں روز سوائی
سنج بر سخت اجاڑتے
198
ٹوبھا کھٹا دے ملک ملیرتے
پتھر پہاڑ کون چیرتے

ملک ملیر دی نازو چالی بوئی لانی دا رتبہ عالی
ٹوکاں کردی دھوڑی والی کیسر مشک عنبیر تے

منجھیاں رنگسن گائیں ڈھکسن بھیڈاں بکریان چانگے ٹکسن
اکھیاں اڑسن دلڑیاں بکسن دھرتی دی تاثیر تے

برہوں دے ٹھوہ تے جوہ بنیسوں جھوکان جوڑ سنجوک چھکیسوں
سسی تے سے تھورے لیسوں منت چڑھیسوں مائی ہیر تے

بیعت کریسوں کل تھل برکوں ساگر پریم تے سکھ ساگر کوں
گجھڑے رچھنے جودھا سرکوں رکھ تکیہ گر پیر تے

جاں جاں ووٹھ دی ووہ سنیوے سندھڑوں روح اچاک ڈسیوے
ڈینہاں لسڑی تے دل تھیوے راتیں گاوے کھیر تے

ٹوبھے باجھوں مال نہ ٹھہساں نہ وکڑے نہ بند تے بہساں
نہ گٹھ تے نہ پاڑتے رہساں نہ وت کھوہ وہیر تے

آپے آکر دلڑی لاتو حال میڈا سبھ سمجھیو جاتو
ہن کیوں مٹھڑی توں ول چاتو دھوتیں دی تقریر تے

عشق فرید لکھیا پروانہ گھر باروں تھی بار روانہ
کرسر صدقے پڑھ شکرانہ
ہیں مٹھڑی تحریر تے
199
جڈاں جایم پکاکر جھولی
کر وین ڈتی ما لولی

پہلوں پیت نہ پئی پیوما دی وت ہوت بولچ نہ رادھی
میں مٹھڑٰ جاون لادی ہم بخت سڑی ڈکھ رولی

گھر فخر پیا پوں پاوے آ اجڑی جھوک وساوے
رل چیتر بہار سوہاوے وس ہس رس کھیڑوں ہولی

تونے ردشن مول نہ پیساں تاں وی نازک نہینہ نبھیساں
وچ کوٹ شہر مر ویساں تھی در دلبر دی گولی

سارا چولا بوچھن گھانگھے گئے زیور تریور لاہنگے
سر مانگ مریندی سانگے تھئی سرخی زہر دی گولی

بن یار نہ سیج سوہیساں پھل سہرے تروڑ سٹیساں
بھن بنیسر بول سڑیساں بٹھ چندن ہار بنولی

سیاں رل مل میہنے ڈیندیاں کھل ہاسے کیس کریندیاں
مابھینیں وین الیندیاں سس مارم سو سو بولی

جند جلڑی جندڑی جھولی جتھ کرڑ کنڈا سبھ سولی
ڈسے ککرے رتیڑ کولی دل درد چلائی گولی

ہر پلل پل پیت پنل دی سک سانول باروچل دی
ہے تیڈی روز ازل دی ایہا کوجھی کملی بھولی

ول یار فرید نہ آیا سر سولیں سانگ رسایا
سبھ ہار سنگار وہایا
گئی ناز نواز دی ٹولی
200
جگ وہم خیال تے خوبے
سبھ صورت نقش بر آبے

جے پچھدیں حال حقیقت سن سمجھ اتے رکھ عبرت
جیویں بحر محیط ہے وحدت کل کثرت شکل حبابے

نہیں اصلوں اصل دوئی دا خود جان ہے نسل دوئی دا
گیا پھوکا نکل دوئی دا ول اوہی آب دا آبے

نہ کافی جان کفایہ نہ ہادی سمجھ ہدایہ
کر پرزے جلد وقایہ ایہا دل قرآن کتابے

ہے پرم گیان وی دلڑی ہے بید پران وی دلڑی
ہے جان جہان وی دلڑی دل بطن بطون دا بابے

دل لب ہے کون مکاں دا دل غایت اصل جہاں دا
دل مرکز زمین زماں دا بیا کوڑ پلال حجابے

وچ صورت دے ناسوتی وچ معنے دے ملکوتی
جبروت اتے لاہوتی دل اندر سبھ اسنابے

رکھ انتر دھیان فریدی سٹ سکھنی پیر مریدی
ہے دوری سخت بعیدی
جی سکھڑیں کان عذابے
201
جنڈری اچاکے جیڑا اداسے
جاپے تتی کوں کیں دی پیاسے

پیکیں سوہر یجیں گلڑے وکھوہے ڈیندی مٹھی نوں مابھین ڈوہے
قسمت دیاں گالھیں دلبروی دروہے ایڈوں گیوسے اوڈوں گیاسے

تھئی آس پاسے آئی یاس پاسے زرلفت ڈورے ململ تے خاصے
کھڈڑیاں نباتاں مصریاں پتاسے کچڑے اڈاہے کوڑے دلاسے

لکھڑی متھے دی پلڑے پیاسے واہ واہ خدا دے کم بے قیاسے
جیہڑیں کوں مونہہ سی لیندے نہ ہاسے مل مل کریندیاں کھل ٹوک ہاسے

مونہہ ویڑھ ٹھڈھڑے پئی ساہ بھردی دیندی نبھائی ڈینہوں ڈینہہ نجر دی
چس رس نہ مانئیم گھر دی نہ ور دی ہک پل نہ ڈتڑم سکھ سیج پاسے

برہوں بچھیندا لکھ لکھ بلائیں تھی تھی ڈکھاری مگندی دعائیں
شالا کہیں دیاں یارب کڈاہیں دیداں نہ اٹکن دلڑی نہ پھاسے

سانول سلونا مارو مریلا نکھڑیانہ ڈٹھڑس کوئی وقت ویلا
سرخی ڈوہاگن کجلا ڈوہیلا گل گیا فرید جوبن نراسے
202
جھوپڑجوڑوں چگ کھپ تھڈتے ایجھانہ ہووے سارے مڈتے
نہ وکڑے نہ بندتے بہساں نہ گٹھ پاڑ دی کھڈتے
ساون آن سوہیاں روہی سندھڑودں سگھری لڈتے
جے پانی کھٹ دیسی بہسوں ڈھائے تے کل اڈتے
شہر بھنبھور وی کھاون اوسم ہوت نہ جاویں چھڈتے
تیغ فرید برہوں دی دیہہ گئی
چم چم تے ہڈ ہڈ تے


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels