Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> دُھکھدا جنگل >> پیش گوئی

پیش گوئی

سرجیت پاتر
March 23rd, 2008

رات دیوالی دی سی
میں اُچے چڑھ کے تکیا
جو کدے تکیا نہیں سی
کہ ادھے نگر وچ جگ رہے دیوے
رات دیوالی دی
تے ادھے نگر وچ جگ رہے دیوے
ایہہ تاں کوئی تیوہار نہ سی
زمین اسمان وچ لٹکی کوئی تصویر سی
تحریر سی
چندری جیہی پیش گوئی سی
جو کالی رات دے کالے صفحے اُتے
اگن دے زرد کمبدے اکھراں نال لکھی ہوئی سی
میں پڑھ کے ویکھیا
اُس زرد تے کالی جیہی پیشن گوئی نوں
عبرت ناک سی اُس دی عبارت
کجھ ایس طراں سی
کہ جد ادھے نگر وچ سوگ ہے
ادھے نگر وچ دیپ مالا ہے
نگر کِنا کُو چر ایہہ وسن والا ہے
ایہہ دیوے کد نیں دیوے
ایہہ تاں ہن جیوں اگ دیاں جیبھاں
ایہہ انھیرا کد ہے بھِنی رین
ایہہ انھیرا تاں سازش ہے
ایہہ دیوے وی انھیرا وی
ایہہ تاں خاموش نعرے ہن
ایہہ جھنڈے ہن
ایہہ تاں ہتھیار ہن
اشتہار
گُجھی دیوت والے
خیر اوہ بَل گئے دِیوے
ڈھل گئی رات
تے اوہ ٹل گیا تیوہار تے پیشن گوئی
شاید ایس لئی کہ مناں دے اندر کوئی اِتہاس باقی سی
بھلک دی آسی باقی سی
پر اگلے وار ہن تیوہار توں پہلاں
نگر دے دل دا دُکھڑا پھول لینے
اوہناں ماواں دے اتھرو پونجھ دینے
جنہاں دے پت مسافر گھر نہیں پرتے
جو کدھرے موت دے جنگل دے اندر گم ہو گئے ہن
جنہاں دے ہن کدی بن واس نہیں مُکنے
تے اوہناں کُنبھ کاراں، تیلیاں تے پینجیاں نوں وی
صلا دینا
جنہاں دیوے رچائے سن
جگن جوگ بنائے سن
تے فیر دیوے جگا کے رکھنے اپنے بنیرے تے
جو ہسن نہ کسے گھر دے انھیرے تے
اوہ دیوے رات دے کالے مخملی صفحے اُتے لکھے جاپن گے
کسے اسیں ورگے
تے دیوالی اودوں تیوہار ہووے گی
اودوں تیکر تاں ایہہ سبھ کجھ
زمین اسمان وچ لٹکی کوئی تصویر ہے
تحریر ہے
چندری جیہی پشین گوئی ہے
جو کالی رات دے کالے صفحے اُتے
اگن دے زرد کمبدے اکھراں نال لکھی ہوئی ہے


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels