Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> دُھکھدا جنگل >> دُھکھدا جنگل

دُھکھدا جنگل

سرجیت پاتر
March 26th, 2008

شُوک رہے جنگل نوں کِیکن چُپ کراواں میں
کلے کلے رُکھ نوں جا کے کیہہ سمجھاواں میں
جنگل جیہڑا ہر موسم دے قہر نال لڑدا سی
جنگل جیہڑا ہر آفت دے راہ وچ اُڑدا سی
جنگل جس چوں ہر کوئی اپنی پوڑی گھڑدا سی
جنگل جیہڑا بالن بن کے گھر گھر سڑدا سی
اوس وچ پھیلی اگ تاں کس دے ذمے لاواں میں
اوہ جنگل جو خوشبوواں ڈھوآ ونڈدا سی
اوہ جنگل جو پھلاں دے سنگ ہر رُت رنگدا سی
اوہ جنگل جو سر تے کلغی کونپل ٹنگدا سی
منگدا سی تاں کیول اپنا پانی منگدا سی
اگ دی واچھڑ نوں دس ہانی کنج بناواں میں
جد جنگل نے شہر تیرے دیاں جیلاں بھریاں سن
تد جنگل توں محل تیرے دیاں کندھاں ڈریاں سن
توں جنگل نوں کول بٹھا فیر گلاں کریاں ہین
کون سی جس دیاں گلاں کسوٹی توں ڈریاں سن
جو کسوٹیاں ڈریاں کھریاں کیوں من جاواں میں
منیاں میں جنگل ہاں وسدا وچ جہالت دے
تینوں مان بہت نیں ترک دلیل وکالت دے
میں جس دے قابل ہاں مینوں اوہی ذلالت دے
جنگل کہندا مسئلہ لے چل وچ عدالت دے
ایہہ وی نامنظور تاں کیہڑا در کھڑکاواں میں
تیری چپ نے جنگلاں نوں اوہ تلخ فضا دتی
جنگل وچوں کنڈیاں دی اک جھڑی اُگا دتی
کنڈے کنڈے کہہ کے توں فیر رولی پا دتی
کجھ کنڈیاں وچ کل جنگل دی گل اُلجھا دتی
جے توں خود الجھاونی چاہویں کِنج سُلجھاواں میں
تینوں تاں جنگل دی گل اُلجھاون چ فائدا سی
جنگل وچ کنڈے ہور اُگاؤن وچ فائدہ سی
ایس جنگل توں جنگل ہور بناون چ فائدا سی
تے فیر اُچے چڑھ کے رولا پاؤن چ فائدہ سی
ویکھو ویکھو اک بھیانک دن دِکھلاواں میں
ہور کوئی جد راہ جنگل نوں راس نہ آیا میں
کجھ رکھاں نے جس دہشت دا راہ اپنایا سی
تے جسدا جنگل نوں میہنا مڑ مڑ آیا سی
ایوں توں آپے ہی اُس راہ نوں پیر بنایا سی
توں کیوں غصے ہن جد اوہی پیر دھیاواں میں
اوہ جو ایس جنگل دے پہرے دار کہاؤندے سن
اوہ شائد ایس رستے نوں بدلاؤنا چاہوندے سن
ڈر دے سن بے چارے ڈر کے ہتھ نہ پاوندے سن
اوہ گل وکھری نربھائتا دے سبق سکھاوندے سن
سبق اوہناں دے اوہناں اگے کیہ دوہراواں میں
اس من چاہی سکھر تے جد توں کھیل پُچا دتا
دہشت تائیں سارے جنگل دے سر پا دتا
ادھے جنگل نوں ادھے دے نال لڑا دتا
فیر توپاں دا مونہہ جنگل دے ول بھنوا دتا
توپاں اگے کنج امن دا گیت سناواں میں
وڈا جنگل ایس چھوٹے نوں ویکھن آیا اے
ایس دھکھدے نوں دھونی وانگوں سیکن آیا اے
''خوفناک'' دا ایس نوں وین وشیشن آیا اے
تیری وڈیائی نوں متھا ٹیکن آیا اے
جنگل نوں جنگل دا محرم کنج بناواں میں
بُوٹا بُوٹا ایس جنگل وچ رل وی سکدا ہے
ایہہ جنگل جو دھکھدا ہے ایہہ بل وی سکدا ہے
بلدا بلدا محلاں ول نوں چل وی سکدا ہے
ہاں شاید ایہہ سبھ کجھ ہونوں ٹل وی سکدا ہے
ایپر کتھوں لے آواں گھنگھور گھٹاواں میں
شوک رہے جنگل نوں کیکن چپ کراواں میں
کلے کلے رُکھ نوں جا کے کیہہ سمجھاواں میں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels