Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> دُھکھدا جنگل >> چوک شہیداں چ اوس دا آخری بھاشن

چوک شہیداں چ اوس دا آخری بھاشن

سرجیت پاتر
March 27th, 2008

چلو یارو کہ ہن ایہہ چوک چھڈئیے
کہ ہن ایہہ چوک چورستہ نہیں ہے
ہوندا سی، جدوں سربنس جیندا سی
جدوں نیہاں چ پتھر چِنے جایا کردے سن
پُتر نہیں
جدوں سنگھنا انھیرا سی
تے کوئی سُر پتہ لگدا نہیں سی
انھیرے وچوں ایہہ کدھروں آؤندا ہے
تے کِس دا تیر آوندا ہے
کہ کوئی جین جوگا لُڑھک جاندا ہے
ہر اِک تیر تے قسمت ہی لکھیا سی
تے اُنگلاں دے نشاناں نُوں پڑھن دی جاچ نہ سی
اودوں اک چوک چورستہ ہی ہوندا سی
اودوں جے بُت بن کے تسیں ایس تھاں
عمر بھر وی سوچدے رہندے
کہ کیہڑی طرف جائیے
تاں وی پوجن یوگ ہوندے
تے جاں جیہڑی وی راہے جی بھیانے چل پیندے
اِکو جیہے معصوم ہوندے
ہن معصومیت کیہہ ہے؟
سائیڈ پوز ہے گولے کبوتر دا
جاں بُت دی دستاویزی مسکراہٹ ہے
شہر نوں چور لوری دے رہے نیں
چھلیڈا پھُل بنیا ہے
تے جاں لُومبڑ چون نشان لیلا مل گیا ہے
ہن معصومیت کیہ ہے
ہن تاں پتہ ہے کہ جنڈ تے ترکش
صاحباں نے نہیں، سمیاں نے ٹنگیا سی
ہن تاں پتہ ہے کہ ہوا نوں وی ہتھ اُگ پیندے
جے کنگن کنچنی ہووے
ہن تاں پتہ ہے کہ آتما وی ماس کھاندی ہے
ہن تاں پتہ ہے کہ مہک نوں وی دند ہوندے نیں
ہن تاں پتہ ہے شگناں بھری راتے دُدھ تے پُت کس نے قتل کیتے
اتے قاتل دی کدھر پیڑ جاندی ہے
ہن ایہہ چوک چورستہ نہیں ہے
چلو ایہہ چوک چھڈئیے
کسے چور ستے تے سجیے
تے اوتھے جا کے فیردُبھیدا چ پیئے
ایتھے دُبھیدا چ پینا فیر مڑ کے ککھ چ پینا ہے
تہانوں میں کیہہ دساں مہنگیوں یارو!
تُسیں تاں جاندے ہو
کہ جیہڑے چوک اندر
آپنے حساس ہس مُکھ ہانیاں دا لہو ڈُلھ جاوے
فیر اوہ چوک چورستہ نہیں رہندا
جنہاں چوکاں چ حالے ہانیاں دا لہو ڈُلھنا ہے
اوہ اگے نیں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels