Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> دُھکھدا جنگل >> ہزاراں پرندے

ہزاراں پرندے

سرجیت پاتر
March 27th, 2008

ہزاراں پرندے
میرے من چ قیدی
سُناں رات دن میں
ایہہ دیندے دہائی
رہائی
رہائی۔۔۔
اسیں بھاویں جا کے
کتے وِنھ ہوئے
وگن ساڈی کایا چوں
رت دے پھُہارے
اسیں بھاویں جا کے
کِتے جھُلس جائیے
جلن ساڈے کھمباں دے
سِلکی کنارے
تُوں بس جان دے ہُن
کِتے وی اسانوں
تیری قید نالوں
تاں چنگے نے سانوں
شکاری اتے ماس خورے قسائی
اودوں بِرکھ سی توں
جدوں اُترے ساں
اسیں ڈالیاں تے
اودوں توں کہیا سی
اُڈو عرش اندر
جدوں تھک جاؤ
میرے کول آؤ
جدوں اکّ جاؤ
تاں پھر پنکھ تولو
ہواواں چ کھمباں نہ ، خط لکھدے جاؤ
تُوں ساڈے سدا لئی
اُڈن کولوں ڈردا
تے پتیاں دے سُکن
جھڑن کولوں ڈردا
تُوں ہن بِرکھ توں
پنجرا ہو گیا ایں
تے رُتاں دے آون تے جاون توں ڈردا
توں اپنے ہی من دے دروازے تے جڑیا
کسے خوف دا جِندرا ہو گیا ایں
اسیں شبد تیرے
اسیں بول تیرے
اسیں تیرے اندر
پئے مر رہے ہاں
وِدا کر اسانوں
اتے پنجرے توں
تُوں پھر بھِرکھ ہو جا
فضاواں چ گونجن دے
مُکتی دے نغمے
اسیں سُنے آکاش توں بھردیاں گے
اسیں ایس ماتم جیہی چُپ تائیں
ترنم ترنم جیہی کر دیاں گے
تُوں کیوں آپنے رستے چ
آپے کھڑا ہیں
تُوں کیوں چِت کھولن توں
ایوں ڈر رہیا ہیں
تُوں آلاپ لے
کہ وگن فیر ندیاں
کہ وگن فیر ہواواں
توں فیر گھول لے
جام وچ موت جیون
توں فیر ٹھگ لے
اوس ٹھگاں دے ٹھگ نُوں
تے ایوں پنجرے توں
تُوں فیر بِرکھ ہوجا
تے شاخاں دے وانگوں ہواواں چ جھلدا
خوشی تے اداسی چ
ہو جا شُدائی
رِہائی
رِہائی
ہزاراں پرندے
میرے من چ قیدی
سُناں رات دن میں
ایہہ دیندے دُہائی
رِہائی
رِہائی۔۔۔۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels