ویلے دے سیانیاں دا ہوکا اے پئی گوانڈھیاں وچ وسنا ٹوریے تے سبھ توں پہلاں اوس ویلے دا دھیان کریے پئی جے گوانڈھیاں نال سنگ پھس جان تے فیر کیہ کرئے۔ کیوں جے سنگ سبھ توں پہلاں گوانڈھیاں نال ای پھسیا کردے نیں۔ دور دراڑے ویری اک تاں سنگ پھساندے ای نہیں تے جے پھسا وی بہن تے ایس جوڑ دے کئی توڑ ہو سکدے نیں۔ہاں ودھیری اوکڑ اودوں پیندی اے جدوں گوانڈھیاں نال ان جوڑ ہو جاوے۔ کچے کوٹھیاں وچ وسدے تے ڈانگاں سوٹے ہلاردیادں گوانڈھیاں نال دال ٹکی ونڈن دی ایہہ صورت اے پئی اوہناں توں چنگے کوٹھے چھیتے۔ ہوسکے تاں پکے کوٹھے بنایئے تے اوہناں دیاں ڈانگاں تے اوہناں دیاں سوٹیاں نال برابر اترن ، سگوں اوہناں دے وروگنلئی چھویاں تے بلماں تیار رکھیے۔ انج نہ ہووے تے ماڑے دا دھرتی تے وسن دا نہ کوئی حج اے تے نہ کوئی چج اے۔ اوہنوں کوئی لمی مدت نہیں ہوئی۔ اجے کل دی گل جاپدی اے پئی ساڈے پنڈ لاگے گوانڈھیاں دے دو دھڑے آپ وچ دی جٹ پئے۔ کھڑیا کھڑبی توں ودھ کے سچل تے نترویں لڑائی چھڑگئی ۔ کجھ چر لڑائی لگی رہی تے دونہاں دھڑیاں دا کافی نقصان ہویا۔ پر جدوں لڑائی اخیرلے وٹاں تے آئی تے دونہاں دھڑیاں نے انگیا پئی لڑائی وچ ڈانگاں سوٹیاں ، چھویاں بلہماں ، تلواراں تے بندوقاں توپاں نالوں لڑن والیاں دی تھاں مکان دا بہتا کم ہوندا اے ۔ جس دھڑے دا تھاں اچی تے پکی دھرتی تے ہووے تے کندھاں کولے چوکھے نگر تے پکیرے ہون اوڑک اوہدا جت گنا ہوندا اے۔ دونہاں دھڑیاں وچوں جیہڑے پیسے والے سن اوہناں اپنے رہن لئی بھوئیں ہیٹھاں پکے کوٹ بنالئے تاں جے لڑائی چھڑے تے ویری دا زور تھاؤں تھائیں نہ چلے۔ پر دوجے دھڑے نے منگ تنگ کے ادھار سدھار راہیں اپنے تھاں مکان دا نواں جتن کیتا۔ اوس اک اجیہا کوٹھا چھتیا جیہدے بوہے ٹینکاں دے سن۔ کندھاں کولے توپاں دے تے چھت ہوائی جہازاں دی سی۔ ہور پکیائی کرن لئی نکراں وچ تے فرشاں ہیٹھ گولے بارود دیاں پٹییاں وچھا دتیاں۔ پر مالک دا کرنا کیہ ہویا۔ نہ گوانڈھیاں نال لڑائی چھڑی، نہ ایس پکے کوٹ دی پکیائی جاچن دا ویلا آیا۔ اک دن کسے وسنیک نے بے دھانیاں بلدی تیلی جو سٹی تے ٹھوں ٹھانہہ، ٹھاہ ٹھاہ، ٹھپ ٹھک ، گرڑ گرڑ دااجیہا رولا پیا پئی سنن والیاں دے کن پاٹ گئے۔ ٹینکاں دے بوہیاں ، توپاں دیاں کندھاں تے ہوائی جہاز دیاں چھتاں والا کوٹھا اپنے وسنیکاں نوں نال لے کے دھوڑ دیاں بدلاں نال اڈگیا۔
