حالین ہون والے اک سروے وچ پتہ لگا ہے کہ اج دے زمانے دیاں ساریاں فکراں تے پریشانیاں مگروں وی دنیا وی خوشیاں ودھ گئیاں ہین۔
یونیورسٹی آف مشی گن دے پولیٹیکل سائنسدان رونالڈ دا آکھنا ہے کہ 'ایہہ اک حیرانی والی کھوج ہے۔ عام طور تے ایہہ وچاریا جاندا ہے کہ کسے وی ملک وچ خوشی دی پدھر دا ودھنا نامنن والی گل ہے'۔
دنیا وچ ڈنمارک سبھ توں خوش ملک ہے تے سبھ توں غمگین ملک زمبابوے ہے۔ خوش رہن والیاں قوماں وچ امریکہ سولہویں نمبر تے ہے۔
ایس سروے وچ دنیا دے 52 دیساں دے لوکاں کولوں پچھیا گیا سی کہ 'ہر شئے نوں ویکھدیاں ہوئیاں تسیں کیہ آکھو گے کہ تسیں، بہت خوش او، بس خوش او، خوش نہیں او، بہت ہرکھے ہوئے او۔' تے 'اجکل واپردا سارا کجھ ویکھ کے تسیں اپنی جیونی بارے کنے سکھالے او؟' خوش رہن دی پدھر 1981ء توں 2007ء تیکر دنیا دے 40 ملکاں وچ ودھی ہے تے رہندے 12 وچ گھٹی ہے۔
نویں سروے وچ پتہ لگا ہے کہ امیر ملکاں دے وسنیک غریب ملکاں دے وسنیکاں نالوں بوہتے خوش ہین۔ ایس توں اڈ بوہتے خوش لوک اوہناں وسیباں دے ہین جتھے بندیاں نوں ایہہ آزادی ملدی ہے کہ اوہ اپنے جیون دا ڈھنگ آپے چُنن۔
