سیاہ کار متھیاں گئیاں زنانیاں دا کوئی والی وارث ہوندا اے تے نہ کوئی سنگ ساک، اوہ تے سارے اہناں دے قاتل ہوندے نیں۔ پولیس نے دو دن علاقے وچ اعلان کروائے کہ جے کوئی اہناں زنانیاں دا والی وارث ہے تے مقامی ہسپتال توں اوہناں دیاں لوتھاں لے جاوے پر کوئی نہیں اپڑیا۔ تیجا دن ہو گیا اے تے پولیس حالے اڈیک وچ ہے۔
نصیر آباد توں دو گھنٹیاں دے پینڈے تے عمرانی قبیلے دے جدی علاقے تمبو وچ زنانیاں دے قتل تے کوئی سوگ اے نہ پچھتاوا۔ مقامی پدھر تے ویلا اپنی چالے چل رہیا اے۔ لوک قتل دیاں ایہو جہیاں وارداتاں نوں عام سمجھدے نیں پر ایس واری اہناں زنانیاں دا قتل مقامی سرداراں دے گل وچ پھسی ہڈی بن گیا اے۔
اہناں زنانیاں دی کہانی اہناں دے نانواں وانگ دو تن راہواں تے چل رہی ہے۔ قتل کیتیاں گئیاں زنانیاں دے ناں حمیداں عرف عزت خاتون، جنت عرف رحیماں خاتون اتے سیانی عرف فاطمہ دسے جا رہے ہین۔
زنانیاں دے اکٹھے قتل دی واردات چوداں جولائی دی رات نوں ہوئی تے اوہدی خبر پندراں جولائی نوں مقامی میڈیا وچ آ گئی۔ مقامی پولیس نے کوئی حیلہ نہ کیتا تے بلوچستان ہائیکورٹ دے چیف جسٹس امان اللہ خان نے سولاں جولائی نوں آپوں نوٹس لیا تے رپورٹ منگ لئی۔
علاقے وچ آکھیا جا رہیا ہے کہ زنانیاں تن سن تے مرضی دا ویاہ کرن لئی گھروں نکلیاں سن۔ اہناں وچوں اک قبیلے دے سردار دی بھتیجی یاں بھانجی وی سی تے اوہناں نوں اوستہ محمد دے اک ہوٹل وچوں سرکاری جیپ وچ چکیا گیا تے مگروں قتل کر دتا گیا۔
دوجی کہانی علاقے وچ ایہہ کھلری ہوئی ہے کہ اہناں زنانیاں نوں قبیلے دے سردار دے مُنڈیاں نے دوستی رکھن لئی تنگ کیتا۔ جدوں اوہ نہ منیاں تے اوہناں نوں سیاہ کاری دا الزام لا کے قتل کر دتا گیا۔
عام حالات وچ ایہو جہے قتل کیس دی تفتیش پولیس دا کوئی وی انسپکٹر دی پدھر دا بندہ کردا ہے پر علاقے وچ حالات کجھ ایہو جہے وگڑ گئے نیں کہ پولیس دے ضلعی افسر نے اک مقامی صحافی نوں مہنا ماریا کہ توں آپ وی تے بلوچ ایں فیر مینوں کیوں ایہو جہے سوال پچھدا ایں کہ غیرت آ جاوے۔
اہناں حالات وچ مقامی ڈاکٹراں نے وی اپنا کم کجھ انج کیتا کہ قبر کھولن توں نانہہ کر دتی۔ پولیس دے ڈی آئی جی شبیر شیخ موجب مقامی ہسپتال دے ڈاکٹر کیوں جو آپ وی عمرانی قبیلے دے ہین ایس لئی اوہناں نے پہلوں تے قبر کھولن توں نانہہ کر دتی پر جدوں اوہناں نوں اندر کرن دی تڑی لائی گئی تے اوہ من گئے تے علاقے وچ پولیس دے نال گئے۔
پولیس دے ضلعی پربندھ دے دفتر وچ اک پڑھیار کُڑی دی فوٹو لگی ہوئی سی جیہدے تے لکھیا ہویا سی 'میں سیاہ کار نہیں بننا'۔ پولیس اک ان ڈٹھے دباء وچ کم کر رہی ہے۔ پورے دا پورا علاقہ پولیس دے خلاف ہو گیا اے۔
کجھ پولیس والیاں نے دسیا کہ جدوں اوہ قبر کھولن لئی کوٹ بابا علاقے وچ جاون دی تیاری کر رہے سن تے اوہناں نوں دسیا گیا کہ عمرانی قبیلے دے بندے اوہناں تے فائرنگ کرن گے تے اوہناں دے راہ وچ بارودی سرنگاں وچھائیاں جاون گیاں جیہڑی بلوچستان دے ایس حصے وچ عام جہی گل اے۔
پولیس جدوں بابا کوٹ جا رہی سی تے وزیر اعلیٰ ہاؤس کوئٹہ توں علاقے وچ اک وائرلیس سنیہا جاری ہویا کہ اج قبر نہ کھولی جاوے۔ صوبے دے پولیس پربندھی نال مقامی افسراں دے رابطے نال گل کھلی کہ وزیر اعلیٰ نے ایہو جہیا کوئی سنیہا نہیں جاری کیتا۔ ڈی آئی جی دا آکھنا ہے کہ جے اوس رات قبر نہ کھولی جاندی تے اوہناں دیاں لوتھاں کڈھ کے کدھرے ہور دفنا دتیاں جانیاں سن۔ زنانیاں دیاں لوتھاں لبھن وچ پولیس نے جیہڑیاں چار تھاواں نوں پُٹیا سی اوہناں وچوں اک کھڈے وچ جنگلی جانور دبیا ہویا سی۔ اک ہور کھڈے وچ دو زنانیاں دیاں لوتھاں پئیاں ہوئیاں سن جیہناں نوں جانوراں نے نوچیا ہویا سی تے جیہناں نوں شکاریاں نے فیر مٹی پا کے دب دتا سی۔
پولیس دے مقامی پربندھی دا آکھنا ہے کہ جے مینوں صف دو بندے گواہ تے مدعی لبھ جاون تے کسے وی سردار دا ناں کیوں نہ ہووے، اوہ گرفتاریاں شروع کر دیون گے۔ پر قبائلی رِیتاں دیاں سنگلاں وچ بجھی ہوئی زنانی دے بھاگ اینے ماڑے ہوندے نیں کہ انج قتل ہوون دی صورت وچ نہ تے اوہنوں پیو، پُتر یاں کھسم دا موڈھا نصیب ہوندا اے تے نہ ای کوئی مدعی یاں گواہ۔
پولیس اپنی تفتیش توں بڑی خوش تے راضی ہے۔ اوہ اک دوجے نوں ٹیلی فون تے دس رہے ہین کہ اہناں اوکھے ویلیاں وچ دو زنانیاں دیاں لوتھاں لبھ لینا ای کسے انہونی توں گھٹ نہیں اے۔
میں اوہناں دیاں گلاں سُننداں تے اوہناں دے دفتر توں باہر ویکھداں، جتھے مینوں صرف مرد دی ایہو جہی حاکمی نظر آؤندی اے جیہدے وچ اہناں زنانیاں دا کیس ہور اگے ودھ وچ خورے ای کسے نوں کوئی موہ ہووے۔
