ਪਿਸ਼ਾਵਰ ਹਾਈਕੋਰਟ ਦੇ ਚੀਫ਼ ਜਸਟਿਸ ਕਲ ਨਵਾਂ ਹਲਫ਼ ਚੁੱਕਣਗੇ

ਪਿਸ਼ਾਵਰ ਹਾਈਕੋਰਟ ਦੇ ਮਾਅਜ਼ੂਲ ਚੀਫ਼ ਜਸਟਿਸ ਤਾਰਿਕ ਪਰਵੇਜ਼ ਨੇ ਆਖਿਆ ਹੈ ਕਿ ਉਹ ਕਲ ਪਿਸ਼ਾਵਰ ਹਾਈਕੋਰਟ ਦੇ ਚੀਫ਼ ਜਸਟਿਸ ਦੇ ਤੌਰ ਤੇ ਹਲਫ਼ ਚੁੱਕਣਗੇ। ਮੀਡੀਆ ਨਾਲ ਗੱਲ ਕਰਦਿਆਂ ਉਨ੍ਹਾਂ ਦੱਸਿਆ ਕਿ ਉਹ ਜੁਮੇ ਦੇ ਦਿਹਾੜੇ ਪਿਸ਼ਾਵਰ ਹਾਈਕੋਰਟ ਦੇ ਚੀਫ਼ ਜਸਟਿਸ ਦੀ ਹੈਸੀਅਤ ਨਾਲ ਹਲਫ਼ ਚਕ ਰਹੇ ਹਨ। ਉਨ੍ਹਾਂ ਨੇ ਪਿਸ਼ਾਵਰ ਹਾਈਕੋਰਟ ਦੇ ਦੂਜੇ ਮਾਅਜ਼ੂਲ ਜੱਜਾਂ ਦੇ ਹਲਫ਼ ਚੁੱਕਣ ਬਾਰੇ ਕਿਸੇ ਖ਼ਬਰ ਤੋਂ ਲਾਇਲਮੀ ਦਾ ਵਿਖਾਲਾ ਕੀਤਾ ਹੈ।

ਪਰਵੇਜ਼ ਮੁਸ਼ੱਰਫ਼ ਦੇ ਤਿੰਨ ਨਵੰਬਰ ਦੇ ਹੁਕਮ ਮਗਰੋਂ ਪਿਸ਼ਾਵਰ ਹਾਈਕੋਰਟ ਦੇ ਚਾਰ ਜੱਜਾਂ ਨੇ ਪੀ ਸੀ ਓ ਹੇਠ ਹਲਫ਼ ਚੁੱਕਣ ਤੋਂ ਇਨਕਾਰ ਕੀਤਾ ਸੀ ਜਿਹਨਾਂ ਵਿੱਚ ਮਾਅਜ਼ੂਲ ਚੀਫ਼ ਜਸਟਿਸ ਤਾਰਿਕ ਪਰਵੇਜ਼ ਤੋਂ ਅੱਡ ਜਸਟਿਸ ਦੋਸਤ ਮੁਹੰਮਦ ਖ਼ਾਨ, ਜਸਟਿਸ ਸ਼ਾਹ ਜਹਾਨ ਖ਼ਾਨ ਅਤੇ ਜਸਟਿਸ ਇਜਾਜ਼ ਅੱਫ਼ਜ਼ਲ ਰਲਤੀ ਨੇਂ। ਵਸੀਲਿਆਂ ਮੂਜਬ ਸਰਹੱਦ ਦੇ ਗਵਰਨਰ ਮਾਅਜ਼ੂਲ ਚੀਫ਼ ਜਸਟਿਸ ਕੋਲੋਂ ਪਿਸ਼ਾਵਰ ਹਾਈਕੋਰਟ ਦੇ ਚੀਫ਼ ਜਸਟਿਸ ਦਾ ਹਲਫ਼ ਲੈਣਗੇ।

ਹਲਫ਼ ਚੁੱਕਣ ਦਾ ਇਕੱਠ ਜੁਮੇ ਦੇ ਦਿਹਾੜੇ ਸਵੇਰੇ ਗਿਆਰਾਂ ਤੋਂ ਬਾਰਾਂ ਵਜੇ ਦੇ ਵਿਚਕਾਰ ਗਵਰਨਰ ਹਾਊਸ ਪਿਸ਼ਾਵਰ ਵਿਚ ਹੋਵੇ ਗਾ। ਵਸੀਲਿਆਂ ਮੂਜਬ ਦੋਸਤ ਮੁਹੰਮਦ ਅਤੇ ਸ਼ਾਹ ਜਹਾਨ ਯੂਸੁਫ਼ ਜ਼ਈ ਵੀ ਪਿਸ਼ਾਵਰ ਹਾਈਕੋਰਟ ਦੇ ਜੱਜਾਂ ਦੇ ਤੌਰ ਤੇ ਹਲਫ਼ ਚੁੱਕਣਗੇ। ਉਨ੍ਹਾਂ ਕੋਲੋਂ ਨਵੇਂ ਚੀਫ਼ ਜਸਟਿਸ ਤਾਰਿਕ ਪਰਵੇਜ਼ ਹਲਫ਼ ਲੈਣਗੇ। ਦੂਜੇ ਪਾਸੇ ਪਿਸ਼ਾਵਰ ਹਾਈਕੋਰਟ ਦੇ ਤਿੰਨ ਮਾਅਜ਼ੂਲ ਜੱਜਾਂ ਨੇ ਅਪਣੀ ਬਹਾਲੀ ਬਾਰੇ ਲਾ ਇਲਮੀ ਦਾ ਵਿਖਾਲਾ ਕੀਤਾ ਹੈ।