ਤਾਲਿਬਾਨ ਨੇ ਜਿਹਾਦ ਲਈ ਸੱਦਿਆ ਤੇ ਅੱਜ ਵੀ ਅਫ਼ਗ਼ਾਨਿਸਤਾਨ ਜਾਵਾਂਗੇ: ਜਮਾਤ ਇਸਲਾਮੀ

ਜਮਾਤ ਇਸਲਾਮੀ ਦੇ ਅਮੀਰ ਮੁਨੱਵਰ ਹਸਨ ਨੇ ਆਖਿਆ ਹੈ ਪਈ ਅਫ਼ਗ਼ਾਨੀਆਂ ਦੇ ਸਦਨ ਤੇ ਅਸੀਂ ਪਹਿਲਾਂ ਵੀ ਜਹਾਦ ਲਈ ਅਫ਼ਗ਼ਾਨਿਸਤਾਨ ਗਏ ਸੀ ਤੇ ਜੇ ਅੱਜ ਵੀ ਤਾਲਿਬਾਨ ਨੇ ਸਾਨੂੰ ਸੱਦਿਆ ਤੇ ਅਸੀਂ ਜ਼ਰੂਰ ਜਾਵਾਂਗੇ।

ਈ ਨਿੱਜੀ ਟੀ ਵੀ ਚੈਨਲ ਤੇ ਗੱਲ ਕਰਦਿਆਂ ਉਨ੍ਹਾਂ ਆਖਿਆ ਪਈ ਅਮਰੀਕਾ ਇਹ ਜਤਨ ਕਰ ਰਿਹਾ ਹੈ ਪਈ ਜਹਾਦ ਨੂੰ ਦਹਿਸ਼ਤ ਗਰਦੀ ਮਿੱਥ ਦਿੱਤਾ ਜਾਵੇ। ਸਾਨੂੰ ਮਾਣ ਹੈ ਪਈ ਅਸੀਂ ਅਫ਼ਗ਼ਾਨਿਸਤਾਨ ਵਿਚ ਜਹਾਦ ਕੀਤਾ ਸੀ ਜਿਹਦੇ ਵਿਚ ਰੋਸ ਟੋਟੇ ਹੋਇਆ। ਅਮਰੀਕਾ ਨੇ ਪਹਿਲਾਂ ਕਬਾਇਲੀਆਂ ਨੂੰ ਹਥਿਆਰ ਦਿੱਤੇ, ਸਿਖਲਾਈ ਦਿੱਤੀ ਤੇ ਰੋਸ ਦੇ ਜਾਣ ਮਗਰੋਂ ਅਮਰੀਕਾ ਆਪ ਵੀ ਚਲਾ ਗਿਆ ਉਹਨੂੰ ਇੰਜ ਨਹੀਂ ਕਰਨਾ ਚਾਹੀਦਾ ਸੀ। ਇਹਦੇ ਨਾਲ ਮੁਜਾਹਿਦਾਂ ਦੇ ਗਰੁੱਪ ਆਪੋਂ ਵਿਚ ਲੜਨਾ ਸ਼ੁਰੂ ਹੋ ਗਏ।

ਇਕ ਸਵਾਲ ਦੇ ਜਵਾਬ ਵਿੱਚ ਮੁਨੱਵਰ ਹਸਨ ਨੇ ਆਖਿਆ ਪਈ ਮੁਜਾਹਿਦ ਢਾਈ ਵਰ੍ਹੇ ਦਰੇ ਦੇ ਬਣੇ ਹੋਏ ਅਸਲ੍ਹੇ ਨਾਲ ਰੋਸ ਦੇ ਖ਼ਿਲਾਫ਼ ਲੜਦੇ ਰਹੇ ਜਦੋਂ ਕਾਮਯਾਬ ਹੋਣ ਵਾਲੇ ਸਨ ਤੇ ਅਮਰੀਕਾ ਤੇ ਸਾਊਦੀ ਅਰਬ ਵਿਚ ਪੈ ਗਏ। ਉਨ੍ਹਾਂ ਆਖਿਆ ਅਸੀਂ ਜਹਾਦੀਆਂ ਦੀ ਮਦਦ ਕੀਤੀ ਸੀ ਤੇ ਅੱਜ ਵੀ ਤਾਲਿਬਾਨ ਦੀ ਅਮਰੀਕਾ ਦੇ ਖ਼ਿਲਾਫ਼ ਲੜਾਈ ਦੀ ਹਮਾਇਤ ਕਰਦੇ ਹਾਂ। ਤਾਲਿਬਾਨ ਜਿੱਤ ਰਹੇ ਹਨ ਤੇ ਅਮਰੀਕਾ ਅਫ਼ਗ਼ਾਨਿਸਤਾਨ ਵਿੱਚੋਂ ਨੱਸਣ ਦਾ ਰਾਹ ਲੱਭ ਰਿਹਾ ਹੈ।