ਮਜਬੂਰ ਕੀਤਾ ਗਿਆ ਤੇ ਉਤਰੀ ਕੋਰੀਆ ਤੇ ਮਿਜ਼ਾਈਲ ਧਾੜਾ ਮਾਰ ਦੇਵਾਂਗੇ:ਦੱਖਣੀ ਕੋਰੀਆ

ਦੱਖਣੀ ਕੋਰੀਆ ਨੇ ਤੜੀ ਲਾਈ ਹੈ ਪਈ ਜੇ ਪੀਆਨਗ ਯਾਂਗ ਸਰਕਾਰ ਨੇ ਹੋਰ ਵਾਧਾ ਕੀਤਾ ਤੇ ਉਹ ਉਤਰੀ ਕੋਰੀਆ ਤੇ ਮਿਜ਼ਾਈਲ ਧਾੜਾ ਮਾਰ ਦੇਵੇ ਗਾ। ਇਹ ਬਿਆਨ ਮੰਗਲ ਦੀ ਸਵੇਰੇ ਦੱਖਣੀ ਕੋਰੀਆ ਦੇ ਇਕ ਜਜ਼ੀਰੇ ਤੇ ਹੋਣ ਵਾਲੇ ਇਕ ਵੱਡੇ ਧਾੜੇ ਦੇ ਮਗਰੋਂ ਸਾਹਮਣੇ ਆਇਆ ਹੈ। ਇਸ ਮੌਕੇ ਤੇ ਦੋਹਾਂ ਕੋਰੀਆਈ ਰਿਆਸਤਾਂ ਵਿਚਕਾਰ ਇਕ ਘੰਟੇ ਤੀਕਰ ਫ਼ਾਇਰਿੰਗ ਹੁੰਦੀ ਰਹੀ।

ਇਹ ਪਿਛਲੇ ਸੱਠਾਂ ਸਾਲਾਂ ਦੀ ਸੱਭ ਤੋਂ ਵੱਡੀ ਟੱਕਰ ਸੀ। ਇਸ ਧਾੜੇ ਦੇ ਨਤੀਜੇ ਵਿਚ ਦੱਖਣੀ ਕੋਰੀਆ ਦੇ ਘੱਟੋ ਘੱਟ ਦੋ ਫ਼ੌਜੀ ਮਾਰੇ ਗਏ ਜਦੋਂ ਕਿ ਦਰਜਨਾਂ ਹੋਰ ਜੀ ਫੱਟੜ ਹੋਏ। ਉਤਰੀ ਕੋਰੀਆ ਵੱਲੋਂ ਦੱਖਣੀ ਕੋਰੀਆ ਦੇ ਇਕ ਜਜ਼ੀਰੇ ਤੇ ਕੀਤੇ ਜਾਣ ਵਾਲੇ ਇਸ ਧਾੜੇ ਤੇ ਬਹੁਤ ਭਰਵਾਂ ਰੋਸ ਵਿਖਾਲਾ ਸਾਹਮਣੇ ਆਇਆ ਹੈ। ਅਮਰੀਕੀ ਸਦਰ ਬਾਰਾਕ ਉਬਾਮਾ ਨੇ ਇਹਨੂੰ ਜ਼ੁਲਮ ਮਿਥਿਆ ਤੇ ਕਹਿਆ ਪਈ ਇਹਦੇ ਜਵਾਬ ਲਈ ਦੱਖਣੀ ਕੋਰੀਆ ਨਾਲ ਸਲਾਹ ਕਰ ਰਹੇ ਆਂ। ਅਕਵਾਮ ਮੁਤਹਿਦਾ ਦੇ ਸੈਕਟਰੀ ਜਨਰਲ ਬਾਣ ਕੀ ਮੋਨ ਨੇ ਦੋਹਾਂ ਧਿਰਾਂ ਤੇ ਜ਼ੋਰ ਦਿੱਤਾ ਹੈ ਪਈ ਉਹ ਹੱਦੋਂ ਅੱਗੇ ਨਾ ਵਧਣ।