ਖਸਮ ਵੀ ਨਾਨ ਨਫ਼ਕੇ ਦਾ ਹੱਕਦਾਰ ਹੈ

ਦਿੱਲੀ ਦੀ ਹਾਈ ਕੋਰਟ ਨੇ ਨਿੱਕੀ ਅਦਾਲਤ ਦੇ ਇਕ ਫ਼ੈਸਲੇ ਨੂੰ ਬਰਕਰਾਰ ਰੱਖਦਿਆਂ ਹੋਇਆਂ ਕਹਿਆ ਹੈ ਜੇ ਤੀਵੀਂ ਦੀ ਆਮਦਨੀ ਬਹੁਤੀ ਹੋਵੇ ਤੇ ਉਹਨੂੰ ਆਪਣੇ ਖਸਮ ਨੂੰ ਖ਼ਰਚਾ ਦੇਣਾ ਹੋਵੇ ਗਾ। ਦਿੱਲੀ ਹਾਈ ਕੋਰਟ ਦੇ ਚੀਫ਼ ਜਸਟਿਸ ਜੀ ਇਸ ਸੀਸ਼ਤਾਨੀ ਨੇ ਆਪਣੇ ਇਕ ਅਹਿਮ ਫ਼ੈਸਲੇ ਵਿਚ ਕਹਿਆ ਪਈ ਤੀਵੀਂ ਨੂੰ ਗੁਜ਼ਾਰੇ ਲਈ ਆਪਣੇ 55 ਸਾਲਾਂ ਦੇ ਖਸਮ ਨੂੰ ਹਰ ਮਹੀਨੇ 20 ਹਜ਼ਾਰ ਰੁਪਏ ਦੇਣੇ ਪੈਣਗੇ।

ਅਦਾਲਤ ਨੇ ਇਹ ਵੀ ਕਹਿਆ ਖਸਮ ਦੀ ਆਉਣੀ ਜਾਨੀ ਦੀ ਸੋਖਿਤ ਲਈ ਤੀਵੀਂ ਨੂੰ ਆਪਣੀਆਂ ਚਾਰ ਕਾਰਾਂ ਵਿੱਚੋਂ ਇੱਕ ਕਾਰ ਵੀ ਦੇਣੀ ਹੋਵੇਗੀ। ਜ਼ਨਾਨੀ ਨੇ ਨਿੱਕੀ ਅਦਾਲਤ ਦੇ ਇਸ ਫ਼ੈਸਲੇ ਨੂੰ ਹਾਈ ਕੋਰਟ ਵਿਚ ਚੈਲੰਜ ਕੀਤਾ ਸੀ ਜਿਹਦੇ ਵਿੱਚ ਉਹਨੂੰ ਖ਼ਰਚਾ ਦੇਣ ਨੂੰ ਕਹਿਆ ਗਿਆ ਸੀ ਪਰ ਹਾਈ ਕੋਰਟ ਨੇ ਉਹਦੀ ਅਪੀਲ ਖ਼ਾਰਜ ਕਰ ਦਿੱਤੀ ਹੈ।

ਅਦਾਲਤ ਦਾ ਕਹਿਣਾ ਸੀ ਜੋ ਜ਼ਨਾਨੀ ਦੀ ਆਮਦਨ ਲੱਖਾਂ ਰੁਪਏ ਹੈ ਜਦੋਂ ਕਿ ਖਸਮ ਦੇ ਕੋਲ ਕਮਾਈ ਦਾ ਕੋਈ ਵਸੀਲਾ ਨਹੀਂ ਹੈ ਇਸ ਲਈ ਖਸਮ ਦੇ ਖ਼ਰਚਿਆਂ ਦੀ ਜ਼ਿੰਮੇ ਵਾਰੀ ਤੀਵੀਂ ਤੇ ਹੈ। ਕਹਾਣੀ ਇਹ ਹੇ ਖਸਮ ਇਕ ਆਟੋ ਰਿਕਸ਼ਾ ਚਲਾਉਂਦਾ ਹੈ। ਉਹਦਾ ਵਿਆਹ ਸੁਣਾ 1982 ਵਿਚ ਹੋਇਆ ਸੀ ਉਨ੍ਹਾਂ ਦੀ ਇਕ 26 ਸਾਲ ਦੀ ਧੀ ਤੇ 24 ਸਾਲ ਦਾ ਪੱਤਰ ਹੈ।

ਖ਼ਾਨਦਾਨ ਚੰਗੀ ਤਰ੍ਹਾਂ ਚੱਲ ਰਿਹਾ ਸੀ ਕਿ ਖ਼ਾਵੰਦ ਨੇ ਆਪਣੀ ਬੀਵੀ ਦੇ ਨਾਂ ਤੋਂ ਇਕ ਪਿੰਗ ਗੈਸਟ ਹਾਊਸ ਚਲਾਉਣਾ ਸ਼ੁਰੂ ਕੀਤਾ ਜਿਹੜਾ ਅੱਗੇ ਜਾ ਕੇ ਏਨਾ ਮਸ਼ਹੂਰ ਹੋਇਆ ਪਈ ਉਹਦੇ ਤੋਂ ਲੱਖਾਂ ਦੀ ਆਮਦਨ ਹੋਣ ਲੱਗੀ। ਫਿਰ ਤੀਵੀਂ ਨੇ ਖਸਮ ਨੂੰ ਘਰੋਂ ਕੱਢ ਦਿੱਤਾ ਤੇ ਅਖ਼ਬਾਰ ਵਿੱਚ ਇਸ਼ਤਿਹਾਰ ਦੇ ਦਿੱਤਾ ਪਈ ਉਹਦਾ ਖਸਮ ਨਾਲ ਕੋਈ ਸਾਂਗਾ ਨਹੀਂ ਹੈ।

ਇਹਦੇ ਤੇ ਖਸਮ ਨੇ ਪਹਿਲੋਂ ਤੀਵੀਂ ਨੂੰ ਤਲਾਕ ਦਾ ਨੋਟਿਸ ਦਿੱਤਾ ਤੇ ਫਿਰ ਖ਼ਰਚੇ ਦੀ ਮੰਗ ਕੀਤੀ। ਨਿੱਕੀ ਅਦਾਲਤ ਨੇ ਖ਼ਾਵੰਦ ਦੇ ਹੱਕ ਵਿਚ ਫ਼ੈਸਲਾ ਸੁਣਾਇਆ। ਇਸ ਫ਼ੈਸਲੇ ਨੂੰ ਤੀਵੀਂ ਨੇ ਹਾਈ ਕੋਰਟ ਵਿਚ ਚੈਲੰਜ ਕੀਤਾ ਜਿਹਨੂੰ ਅਦਾਲਤ ਨੇ ਰੱਦ ਕਰ ਦਿੱਤਾ ਤੇ ਹੁਕਮ ਦਿੱਤਾ ਜੋ ਉਹ ਖ਼ਾਵੰਦ ਦੇ ਖ਼ਰਚੇ ਬਰਦਾਸ਼ਤ ਕਰੇ।