ਜੱਗ ਦੀ ਸੱਭ ਤੋਂ ਵਧਦੀ ਮੁਆਸ਼ੀ ਤਾਕਤ ਜ਼ਨਾਨੀਆਂ ਹਨ: ਆਲਮੀ ਬੈਂਕ

ਜੱਗ ਦੀ ਸੱਭ ਤੋਂ ਛੇਤੀ ਵਧਣ ਵਾਲੀ ਮੁਆਸ਼ੀ ਤਾਕਤ ਚੀਨ ਯਾਂ ਹਿੰਦੁਸਤਾਨ ਨਹੀਂ ਸਗੋਂ ਜ਼ਨਾਨੀਆਂ ਹਨ। ਅਮਰੀਕੀ ਟੀ ਵੀ ਸੀ ਐਨ ਐਨ ਨੇ ਆਲਮੀ ਬੈਂਕ ਦੇ ਹਵਾਲੇ ਨਾਲ ਆਖਿਆ ਹੈ ਪਈ ਆਲਮੀ ਪੱਧਰ ਤੇ 2014ਈ. ਤੀਕਰ ਜ਼ਨਾਨੀਆਂ ਦੀ ਕਮਾਉਣ ਦੀ ਤਾਕਤ 18ਖਰਬ ਡਾਲਰ ਤੋਂ ਵੱਧ ਜਾਵੇਗੀ ਜਿਹੜੀ ਅੱਜ ਦੀ ਕਮਾਈ ਤੋਂ ਪੰਜ ਖਰਬ ਵੱਧ ਹੋਵੇਗੀ। ਇਹ ਚੀਨ ਤੇ ਹਿੰਦੁਸਤਾਨ ਦੀ ਰਲਵੇਂ ਜੀ ਡੀ ਪੀ ਤੋਂ ਦੁੱਗਣੀ ਹੋਵੇਗੀ।

ਬੋਸਟਨ ਦੇ ਇਕ ਆਲਮੀ ਸਰਵੇ ਮੂਜਬ ਕੰਪਨੀਆਂ ਜ਼ਨਾਨੀਆਂ ਨੂੰ ਬਹੁਤ ਅੱਖੋਂ ਪਰੋਖੇ ਕਰਦੀਆਂ ਹਨ। ਅਮਰੀਕਾ ਦੇ ਹਾਲੀਂ ਮੁਆਸ਼ੀ ਮੰਦੇ ਨਾਲ ਬੇ ਰੁਜ਼ਗਾਰਾਂ ਦੀ ਗਿਣਤੀ ਬਹੁਤ ਵਧੀ ਹੈ। ਪਹਿਲੀ ਵਾਰੀ ਅਮਰੀਕੀ ਤਾਰੀਖ਼ ਵਿਚ ਰੁਜ਼ਗਾਰ ਦੇ ਮਾਮਲੇ ਤੇ ਬੰਦਿਆਂ ਤੇ ਜ਼ਨਾਨੀਆਂ ਦੀ ਗਿਣਤੀ ਬਰਾਬਰ ਹੋ ਗਈ ਹੈ।

ਇਹਦਾ ਇਹ ਮਤਲਬ ਨਹੀਂ ਹੈ ਪਈ ਅਮਰੀਕਾ ਵਿਚ ਜ਼ਨਾਨੀਆਂ ਬੰਦਿਆਂ ਦੇ ਬਰਾਬਰ ਕਮਾਈ ਕਰਨ ਲੱਗ ਪਈਆਂ ਹਨ। ਅੱਜ ਵੀ ਅਮਰੀਕਾ ਵਿਚ ਇਕ ਡਾਲਰ ਬੰਦਾ ਕਮਾਉਂਦਾ ਹੈ ਤੇ ਉਹਦੇ ਮੁਕਾਬਲੇ ਵਿਚ ਜ਼ਨਾਨੀਆਂ ਨੂੰ 77 ਸੈਂਟ ਲੱਭਦੇ ਹਨ। ਵੱਡੀਆਂ ਕੰਪਨੀਆਂ ਵਿਚ ਬੰਦਿਆਂ ਦੀ ਗਿਣਤੀ ਵੱਧ ਹੈ। 400 ਵੱਡੀਆਂ ਕੰਪਨੀਆਂ ਵਿੱਚੋਂ 38 ਫ਼ੀਸਦੀ ਨੂੰ ਜ਼ਨਾਨੀਆਂ ਚਲਾ ਰਹੀਆਂ ਹਨ।