ਸਿਆਸੀ ਬਿੱਕਰ ਮੰਡੀ

ਗਿਦੜਾਂ ਦੀ ਮੌਤ ਆਈ ਸ਼ਹਿਰ ਜਾ ਵੜੇ ਸੀ
ਸਾਨੂੰ ਵੀ ਤੇ ਸ਼ੌਕ ਕੁਰਬਾਨੀਆਂ ਦੇ ਚੜ੍ਹੇ ਸੀ

ਹਥ ਘੁੱਟ ਕੇ ਪੈਸੇ ਚਾਰ ਜੋੜ ਕੇ
ਲੈਣ ਗਏ ਸੀ ਬੱਕਰਾ ਬੇੜੀਆਂ ਨੂੰ ਰੋੜ੍ਹ ਕੇ

ਮੰਡੀ ਜਾ ਕੇ ਵੇਖਿਆ ਵਪਾਰੀਆਂ ਦਾ ਜ਼ੋਰ ਸੀ
ਬੱਕਰੇ ਵਿਚਾਰਿਆਂ ਦੀ ਉਨ੍ਹਾਂ ਹਥ ਡੋਰ ਸੀ

ਹਰ ਕੈਟਾਗਰੀ ਦੇ ਤੇ ਮੂਲ ਜਾਇਜ਼ ਬੱਕਰੇ
ਬੱਲੀ ਨਾਲੋਂ ਵੱਡੇ ਵੱਡੇ ਫ਼ੁੱਲ ਸਾਈਜ਼ ਬੱਕਰੇ

ਬੱਕਰੇ ਮੈਂ ਵੇਖੇ ਕੁਝ ਖ਼ਾਸ ਖ਼ਾਸ ਘਰ ਦੇ
ਦਾਦੀਆਂ ਦੇ ਵੇਲ਼ੇ ਤੋਂ ਸਿਆਸਤਾਂ ਸੀ ਕਰ ਦੇ

ਅੱਖਾਂ ਵਿਚ ਅੱਖ ਪਾ ਕੇ ਗੱਲ ਵੀ ਨਹੀਂ ਕਰਦੇ
ਜਿਹੜਾ ਵੀ ਖ਼ਰੀਦ ਲੋਵੇ ਦੱਮ ਉਹਦਾ ਭਰਦੇ

ਕੁਲ ਕਿਸੇ ਹੋਰ ਦੇ ਉਹ ਸੱਜੇ ਸੀ ਤੇ ਖੱਬੇ ਸੀ
ਅੱਜ ਇਕ ਨਵੀਂ ਜਿਹੇ ਕੱਲੇ ਨਾਲ ਬੱਧੇ ਸੀ

ਇਸੇ ਵੀ ਪਹਾਰੂ ਕਈ ਵੇਖੇ ਉਥੇ ਆਏ ਹੋਏ
ਦੋਹਰੇ ਦੋਹਰੇ ਤਹਰੇ ਤਹਰੇ ਰੱਸੇ ਗੱਲ ਪਾਏ ਹੋਏ

ਡੀਲ ਸੀ ਨਾ ਢਿੱਲ ਸੀ ਖਿੱਚੇ ਤੇ ਖਚਾਏ ਹੋਏ
ਚੰਗੇ ਭਲੇ ਸ਼ੇਰਾਂ ਤੋਂ ਸੀ ਬੱਕਰੀ ਬਣਾਏ ਹੋਏ

ਦੱਸਿਆ ਵਪਾਰੀਆਂ ਨੇ ਉਨ੍ਹਾਂ ਦਾ ਕਸੂਰ ਵੀ
ਵਿਕਣਾ ਨਹੀਂ ਚਾਹੁੰਦੇ ਸੀ ਤੇ ਬੜੇ ਮਗ਼ਰੂਰ ਸੀ

ਖੁੱਲੇ ਕਈ ਫਿਰਦੇ ਸੀ ਮੌਜਾਂ ਪਏ ਮਾਰਦੇ
ਦੂਜੀਆਂ ਦੇ ਰਾਸ਼ਨਾਂ ਤੇ ਵਕਤ ਗੁਜ਼ਾਰ ਦੇ

ਹਰ ਆਏ ਗਏ ਨੂੰ ਉਹ ਢੁੱਡ ਕੱਢ ਮਾਰਦੇ
ਇਹ ਸੀ ਖ਼ਰੀਦੇ ਹੋਏ ਵੱਡੀ ਸਰਕਾਰ ਦੇ

ਝਾਨਝਰਾਂ ਤੇ ਗਾਣਿਆਂ ਦੇ ਨਾਲ ਸੀ ਸ਼ਿੰਗਾਰੇ ਹੋਏ
ਬੜਾ ਖੌਰੂ ਪਾਉਂਦੇ ਸੀ ਇਹ ਰੱਜ ਕੇ ਹਨਕਾਰੇ ਹੋਏ

ਇਕ ਦੋ ਨਹੀਂ ਲਿਖ ਤੇ ਹਜ਼ਾਰ ਲੈ ਜਾ ਬੱਕਰੇ
ਪੈਸੇ ਹੈ ਨਹੀਂ ਕੋਲ ਤੇ ਉਧਾਰ ਲੈ ਜਾ ਬੱਕਰੇ

ਜਿੱਦਾਂ ਚਾਹੋ ਕੋਹ ਲਵੋ ਇਹ ਵੀ ਤੇ ਆਰਾਮ ਏ
ਬੜੇ ਭੋਲੇ ਬੱਕਰੇ ਇਥੋਂ ਦੀ ਅਵਾਮ ਏ

ਦੇਖ ਕੇ ਮਾਹੌਲ ਸਾਰਾ ਮੈਂ ਘਬਰਾ ਗਿਆ
ਉਨ੍ਹਾਂ ਦੀ ਵਪਾਰੀਆਂ ਦੇ ਹਥ ਫਿਰ ਆ ਗਿਆ

ਜੋ ਕੁਝ ਕੋਲ ਸੀ ਸਾਰਾ ਮੈਂ ਲੁਟਾ ਲਿਆ
ਬੱਕਰੇ ਦੀ ਥਾਂ ਇਕ ਭੇਡ ਲੈ ਕੇ ਆ ਗਿਆ

ਘਰੋਂ ਵੀ ਤੇ ਬਾਹਰੋਂ ਵੀ ਮਖ਼ੌਲ ਹੋਇਆ ਵੱਖਰਾ
ਕਸਾਈਆਂ ਦੇ ਮਾਆਸ਼ਰੇ 'ਚ ਆਪ ਵੀ ਮੈਂ ਬੱਕਰਾ