هڪ ڌرتي جون ٻه ڌيئرون ٻئي، ڀارت ديش ۽ پاڪستان
هڪ ڏيئي جون ٻه لاٽون، ڀارت ديش ۽ پاڪستان
ڀارت ديش ۽ پاڪستان جي جنگ نه ٿيڻ ڏيندا سين
ڪنهن به وردي واري کي اسان امن کسڻ نه ڏيندا سين
ڊالر واري آمريڪا جي منهن کي ڏُهڻ نه ڏيندا سين
اسان پنهنجا شينهن سپاهي، ڪڏهن کسڻ نه ڏيندا سين
هاڻي ملڪن جي مائرن کي اسان ڪڏهن روئڻ نه ڏيندا سين
ڪنهن قوال کي جنگ ترانو مُلهه ڳائڻ نه ڏيندا سين
هڪ صفحي جا ٻه رخ آهن، ڀارت ديش ۽ پاڪستان
هڪ گهر جا ٻه تنڀ آهن، ڀارت ديش ۽ پاڪستان
اسانجي بدن جي مٽي ۾ پريت جا سڄ جرڪڻ
اسانجي قرب جي ويڙهي ۾ امن جا پکي ڳالهائن
اسانجي گڏيل باغن ۾، اتحاد جا گُل ٽڙندا
هڪ ٻي جي اکين ۾ مذهب نه رڙڪندا
هر ميدان ۽ هر کاتي ۾ اتحاد جا گهنگرو ڇڻڪن
اسانجي سيما ۽ سرحد تي جنگ جا دُهل نه وڄن
گڏجي ڪري پريت نگر ۾ وسن، ڀارت ديش ۽ پاڪستان
هڪ ٻئي کي سڄڻ سمجهن، ڀارت ديش ۽ پاڪستان
