ڏکڻ ڪوريا جي پهريان خلاباز عورت اڱاري تي بين الاقوامي خلائي اسٽيشن جي مشن تي روانو ٿيندي. مس يي ۽ ٻه روسي خلاباز تقريبن يارهين وڳي قازقستان جي بيڪنور سينٽر کان روانو ٿيندا. ڪوريا جي 29 ورهين جي انجينيئر خلا ۾ 10 ڏينهن تائين قيام ڪندي ۽ ان دوران سائنسي تجربه پڻ ڪندي.
هن مهم کانپوءِ ڏکڻ ڪوريا خلا ۾ خلاباز موڪليندڙ 6 ايشيائي ملڪ بڻجي ويندو. ڪوريا جي ايرو سپيس ريسرچ انسٽيٽيوٽ جو چوڻ آهي ته خلائي مهم جا آخري انتظام يا تياريون تمام منظم طريقي سان جاري آهن. صدر پيڪ هونگ يلنه چيو آهي ته ”مس يي جي صحتمند آهي ۽ اسانکي اُميد آهي ته اسين پنهنجي مقصد ۾ ڪامياب ٿيندا سين“.
مس يس کي 36 هزار درخواست گذارن مان چونڊيو ويو آهي ۽ ان مشن لاءِ ڏکڻ ڪوريا 20 ملين ڊالرز خرچ ڪري رهيو آهي. ابتدائي طور تي هڪ متبادل خلاباز جي طور تي چونڊيل مس يي کي ان مهل خلاء ۾ وڃڻ جو موقعو مليو جڏهن پهرين چونڊيل 31 ورهين جي عورت سپيس سنٽر جي قاعدن جي ڀڃڪڙي ڪئي.
سومر تي هڪ نيوز ڪانفرنس سان خطاب ڪندي مس يي کان پڇيو ويو ته هو بين الاقوامي خلائي اسٽيشن پهچي سڀ کان پهريان ڪهڙو ڪم ڪندي ته هن جواب ڏنو ته ”منهنجو خيال آهي ته مان سڀ کان پهريان چوندس، ”وائو“.
هن چيو آهي کيس اُميد آهي ته سندس خلائي سفر کان اُتر ۽ ڏکڻ ڪوريا جا تعلقات بهتر ٿيندا. مس يي ٻنهي روسي ساٿين سان گڏ زمين تي 19 اپريل تي ورندي.
