اُردن جي ارڙهن سالن جي ماها جڏهن رنڊي بازي جو پيشو ڇڏڻ جو فيصلو ڪيو ته سندس ڀاءُ کيس ”عزت جي نالي تي قتل“ ڪري ڇڏيو.
ماها اُردن جي هنن هزارن مان نه بلڪ سوين عورتن مان هڪ آهي جن کي هر سال سندن مڙس ۽ مٽ مائٽ عزت بچائڻ لاءِ ”عزت جي نالي“ تي قتل ڪندا آهن.
اقوام متحده رپورٽ پيش ڪئي آهي ته اهڙا جُرم برازيل، برطانيا، ايڪواڊور، هندستان، اسرائيل، اٽلي، سويڊن، ۽ يوگنڊا جهڙي غير مسلم ملڪن سان گڏ مراڪو، پاڪستان ۽ ترڪي جهڙي اسلامي ملڪن ۾ به ٿيندا آهن.
اُردن ۾ ساليانو 15 کان 20 عورتن کي عزت جي نالي تي قتل ڪيو ويندو آهي. هلندڙ سال ۾ اڃان تائين اٺ عورتون عزت جي نالي تي قتل ٿيون آهن. گذريل سال سترهن عورتن کي قتل ڪيو ويو هو. پر ”عزت جي نالي تي قتل“ هن معاشري ۾ جرم لڪائڻ لاءِ استعمال ٿيندا آهن.
ججن، وڪيلن، ماڻهن جي حقن لاءِ ڪم ڪندڙ تنظيمن ۽ دانشورن جو خيال آهي ته اهڙي طرح ڪيترن ئي ڪيسن ۾ عورتن باري غلط فهمين کي وراثتي ملڪيت، خانداني مامرا حل ڪرڻ ۽ پنهنجا ڏوهه لڪائڻ لاءِ استعمال ڪيا ويندا آهن. اُردن ۾ عورتن جي حقن لاءِ ڪم ڪندڙ هڪ تنظيم جو چوڻ آهي ته ”ماها رنڊي بازي جهڙي پيشي مان نڪرڻ چاهيندي هئي، ان ڪري سندس ڀاءُ کيس عزت جي نالي تي قتل ڪري ڇڏيو.
سندس ڀاءُ نشئي ۽ ڏوهاري هيو. ڀيڻ کي قتل ڪرڻ کانپوءِ هن بيان ڏنو ته آئون پنهنجي خاندان جي عزت بچائڻ لاءِ کيس قتل ڪيو آهي. اها ڳالهه واضع ٿي چُڪي آهي ته ماها رنڊي بازي جي پيشي ۾ ملوث هئي. سندس ڀاءُ کي صرف 2 سالن جي قيد جي سزا ٻڌائي وئي.“
