Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ہیر - دمودر داس >> ہیر دمودر داس 20-1

ہیر دمودر داس 20-1

ہیر دمودر
May 18th, 2008

دمُودر ھیر
1
ناؤں دمودر ذات گلھاٹی، آیا سک سیالیں
آپنے من وچ مسلت کیتی، بیٹھ اتھائیں جالیں
وڑیا ونج چوچک دے شہرے ، جتھے سیال ابدالیں
آکھ دمودر خوش ہوئیس ، ویکھ اوہناں دے چالیں
2
اوتھے کیتا رہن دمودر ، اوہ دستی خوش آئی
چوچک نوں جو ونج ملیاسے ، نالے کندی تائیں
چوچک بہوں دلاسا کیتا، تاں دلگیری لاہی
آکھ دمودر ہویا دلاسہ، ہٹی اُتھے بنائی

3
وچ سیالیں رہے دمودر ، خوشی رہے سر تائیں
اکھیں دیکھ تماشا سارا، لکھ مجھیں ، لکھ گائیں
بادشاہی جو اکبر سندی ، حیل نہ حجت کائی
پتر چار چوچک گھر ہوئے ، دمودر آکھ سنائیں

4
بوہت خوشی گھر چوچک سندے بہوں سو ملے ودھائی
دئے خیرات خوشی ہو چوچک ، بوہتی خلقت آئی
وہ سکداری چوچک سندی ، بھلی گذارن لنگھائی
آکھ دمودر وار بڈھے دی، مہری کندی ویائی
5
ہیر چھوہر جمی ہے لوکا، صورت نند نہ کائی
پٹ ولھیٹی ، مکھن پالی، کچھڑ کیتی دائی
جو ویکھے سو خوش تھیوے، چہرے بہوں سندرائی
آکھ دمودر گھر چوچک دے ، ہیر کڑی وت جائی

6
وڈی ہوئی ہیر سلیٹی ، زمیں پیر نہ لائے
جے کوئی ویکھے ہیرے تائین ، پیر نہ مولے چائے
لنگی مجھ بنھے پنج تانی، اتے پٹ ہنڈھائے
ویکھ دمودر ہیر دی چالیں ، قصہ آن بنائے

7
اکھیں ڈٹھا قصہ کیتا ، میں تان گنی نہ کوئی
شوق شوق اٹھی ہے مینڈی، تاں دل امک ہوئی
اساں مونہوں الایا اوہو، جو کجھ نظر پیو ای
آکھ دمودر اگے قصہ ، جو سنے سبھ کوئی
1
اول نام صاحب دا لیئے ، جن ایہہ جگت اپایا
زمیں اسمان فلک درسیتی ، قدرت نال ٹکایا
دور قمر خورشیدو سیتے، کہ ہر جا اکو سایا
ناؤں دمودر ذات گلھاٹی ، میں ایہہ قصہ چایا
2
وڈا راٹھ زمیں دا خاوند ، کیہی صفت اکھائیں
اکبر نال کریندا دعوے ، بھوئیں نئیں دا سائیں
سونا، ریا ، مال ، خزینہ، ڈھکن ستے پاہیں
چاروں بیٹے چڑھے چڑھیندے ، گن گن ناؤں سنائیں
واہ دمودر جاون والی، روپ دتو ای سائیں

3
ویکھو قدرت قادر والی ، ڈاڈھے رب کیہ بھائی
ہویا حکم حضوروں کوئی، آپے بازی پائی
آکھ دمودر کھان عشق دی گھر چوچکانے لائی
4
گھر چوچک دے بیٹی جمی، ہوئیاں جگ ودھائیاں
نھاتی دھوتی پٹ ولھیٹی ، کچھڑ کیتی دائیاں
دو ورھیاں دی چھوہر ہوئی، ڈھک رہیاں کڑمائیاں
چونہہ ورھیاں دی چھوہر ہوئی ، گلاں کرے سچیائیاں

5
چھیاں ورھیاں دی چھوہر ہوئی ، تاں لگی کرن بھلیائیاں
اٹھاں ورھیاں دی چھوہر ہوئی تاں در در کوکاں پائیاں
وساں ورھیاں دی چھوہر ہوئی چارے بئیں نوائیاں
باراں ورھیاں دی چھوہر ہوء ، تاں رانجھے اکھیں لائیاں

6
بھائی بابے متا پکایا ، ہیر کڑی کہیں ڈیہاں
ہکے تاں دیجے توڑ پٹھاناں ، سندھوں پار چڑھیہاں
ہکے دویہاں اکبر غازی ، کچھاں آپ کچھیہاں
آکھ دمودر ذات گلھاٹی ، ایہو متا کریہاں

7
رل سیالاں مسلت کیتی ، آکھن چوچک تائیں
ہیر تیرے گھر وڈی ہوئی ، کیجے ساک کدائیں
آخر مال پرایا ایہو، رکھیاں بندی ناہیں
آکھ دمودر سبھ سیالاں ، ایہو گل سنائی

8
بھائی تساں خبر نہ کائی ، خط کھیڑیاں دا آیا

کمیں آء رتوکے بیٹھے ، کہیں آدر دے نہ بہایا
کہییں پچھ کے ونج نہ ڈٹھا ، خط نہ گھن پڑھایا
آکھ دمودر جو تساں بھاوے ، دوس نہ میں تھے آیا

9
خاناں ! کیہڑی گل نہ دیہاں ، ایہہ مناسب ناہیں
ہک دیونہہ جوکا سکا وڈا، آوے کم اساہیں
ہکو جیہی عمر نہ کسے ، اوسر ہبھسے تائیں
کہے دمودر ڈھل نہ کیجے ، بنے تحمل ناہیں
10
اندر خانے راضی ہبھا، ایہو متے پکائے
آیا خان ، ستھ وچ بیٹھا، وڈے روہ الائے
باہمن سد سونپائے باہمن ، خدمت بہوں کرائے
آکھ دمودر ڈوماں تائیں ، گھر مجمان بنائے

11
اٹھوہار گذر گئیاں نیں ، چوچک ستھے آیا
کیتوس فکر ، کیہ دیجے بھائی ؟ تاں سنیار سدایا
راضی تھی ، سونا ہتھ لیتا ، تاں بہہ ترگ گھڑایا
آکھ دمودر دتی ودھائی ، تاں باہمن گل پایا

12
جوڑا گھوڑا دوہاں تائیں ، دوہیں تیڑ پہرائے
دے سر پائے ودے تے آندے ، گل چوچک پلو پائے
ونجو کھیڑیں ! بوہت عاجزی ، چوچک آکھ سنائے
آکھ دمودر خان سنائے ، "سے واری تساں ودھائے

13
ٹرے ودا تھی ، کمیں یارو، کرن پسند تداہان
ہک انعام اساں دتا چوچک ، دوجا اگوں ونج گھناہاں
جے اگوں سن پائے علی ، تاں سر خاک اساہاں
کہے دمودر پینڈا مندا کر کر گھٹ پیواہاں

14
چلے کمیں اوتھوں بھائی ، کیہے قدم اٹھائے
اگے خان ستھ وچ بیٹھا ، دل وچ فکر ہنڈھائے
"کمیں ونج سیالین بیٹھے ، تن کو خبر سنائے"
آکھ دمودر ہویا خوشحالی ، جے اوہ نظری پائے

15
ہس ہس خان سنیہے پچھے ، خوشی ہویا سر تائیں
بوہتے خان سبھ آن کھلوتے بھوئیں نئیں دے سائیں
تنیاں ٹٹ گئیاں علی دیاں ، جثے ماوے ناہیں
کہے دمودر ول وچ کیتوس، ٹمک ڈھول دھراہیں
16
ٹمک آن دھرایا علی، سبھ بھراؤ سدائے
شادی کیتی دل دی بھاندی ، کوٹھے آن لٹائے
کمیں بھیج سدیو نیں سکے، آئے خاناں جائے
گھانا کھا کریندے مسلت ۔ کیہے متے پکائے

17
آکھے خان سنو بھراؤ ، بیٹھ پسند کریہے
مول تحمل بندا ناہیں ، چنگے ہتھ اٹھیہے
چلیے جھنگ سیالاں والے ، روشن ساک کریہے
کہے دمودر ڈھل نہ بندی ، تیاری ترت کریہے

18
تاں ہبھے چت ایہا آئی۔ جیوں کرخان سنائے
نقرے ، نیلے، ابلق ، تازی ، گل گج گاہا بنائے
نح نح تان پرنیدے تازی، مخمل ہنے پائے
خان ملوک اکٹھے ہوئے ، عالم ویکھن آئے

19
چلے خان بھوئیں دے خاوند ، کل سامان اٹھائے
گھوڑے بخشن کارن لیتے ، روکڑ اٹھ لدائے
آکھ دمودر ، ملکاں ، خاناں چڑھیا رنگ رنگ سوائے

20
کلے ، کوتل ، ابلق، مشکی ، خان ملوک سدائے
بہیہنگی ، استر ، شتر سوائی ، پورن تان سوائے
اوٹھ ، ٹٹو کشمیری ، اڑدو خانہ ہتھیار بنائے
آکھ دمودر تس دن دھرتی ، بھارنہ سرتے چائے 

 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels