Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کہندا بلھے شاہ >> کافیاں بُلھے شاہ >> کافیاں بلھے شاہ: 20-25

کافیاں بلھے شاہ: 20-25

وچار ڈیسک
March 13th, 2011
5 / 5 (1 Votes)

21
بوڑھیں وے طبیبا مینڈی خبر گئیا
تیرے عشق نچایا کر تھیا تھیا

تیرے عشقے ڈیرا میرے اندر کیتا ۔۔۔۔۔ بھر کے زہر پیالہ میں تے آپے پیتا

جھبدے آویں وے طبیبا نہیں تے میں مر گئیا
تیرے عشق نچایا کر تھیا تھیا

چھپ گیا سورج باہر رہ گئیا لالی ۔۔۔۔۔ ہوواں میں صدقے مُڑ جے دیں وکھالی

میں بھل گئیا پیرا تیرے نال نہ گئیا
تیرے عشق نچایا کر تھیا تھیا

تیرے عشق دی سار وے میں نہ جاڻاں ۔۔۔۔۔ ایہہ سر آیا اے میرا ہیٹھ وداناں

سٹ پئی عشق دی تاں کوکاں وئیا
تیرے عشق نچایا کر تھیا تھیا

ایس عشق دے کولوں سانوں ہٹک نہ مائے ۔۔۔۔۔ لاؤ جاندڑے بیڑے موڑ کوڻ لیائے

میری عقل بھلی نال موہاڻیاں دے گئیا
تیرے عشق نچایا کر تھیا تھیا

ایس عشقے دی جھنگی وچ مور بولیندا ۔۔۔۔۔ سانوں کعبہ تے قبلہ پیارا یار دسنیدا

سانوں گھائل کر کے پھیر خبر نہ لئیا
تیرے عشق نچایا کر تھیا تھیا

بُلھا شاہ عنایت دے چل بہیئے بوہے ۔۔۔۔۔ جس دے عشق پہنائے سانوں ساوے تے سُوہے

جاں میں ماری ہے اڈی اڈی مل پئیا ہے وہیئا
تیرے عشق نچایا کر تھیا تھیا

اوکھے لفظاں دے معنے
بوڑھنا: ویلے سر مدد لئی اپڑنا؛ خبر: ہوش، حواس؛ تھیا تھیا: ناچ سکھاؤڻ والا استاد مونہوں بولدا ہے؛ جھبدے: چھیتی؛ سار: خبر؛ ودان: ہتھوڑا؛ وئیا: اے ماں؛ ہٹکڻا: روکڻا؛ لاؤ: جھنڈا؛ لاؤ جاندا بیڑا: ڈُبدا بیڑا؛ مہاڻے: ملاح؛ جھنگی: سنگھڻے رُکھاں والا جنگل؛ ساوے تے سُوہے: ہرے تے لال؛ وہیا: منزل

22

بھیڻاں میں کتدی کتدی ہُٹی
پڑی پچھی پچھواڑے رہ گئی ہتھ وچ رہ گئی جُٹی
اگے چرخہ پچھے پہیڑا میرے ہتھوں تند تُرٹی

بھیڻاں میں کتدی کتدی ہُٹی

بھوندا بھوندا میرا اُورا ڈِگا چِھب الجھی تند ٹُٹی
عاشق بکرا معشوق قصائی میں میں کردی کُھٹی

بھیڻاں میں کتدی کتدی ہُٹی

داج جواہر اس کیہ کرنا جس پریم کٹوری مُٹھی
اوہو چور میرا پکڑ منگاؤ جس میری جند کُٹھی

بھیڻاں میں کتدی کتدی ہُٹی

بھلا ہویا میرا چرخہ ٹٹا میری جند عذابوں چھٹی
بُلھا شوہ نے ناچ نچائے اوتھے دُھم پئی کر کُٹی

بھیڻاں میں کتدی کتدی ہُٹی

اوکھے لفظاں دے معنے
ہُٹڻا: تھک ٹُٹ کے لمے پے جاڻا؛ پِڑی: بانس دی چھوٹی جہی پٹاری؛ پچھی: سُوتر دیاں چھلیاں پاؤڻ والی چھوٹی ٹوکری؛ جُٹی: اکٹھیاں دو پُوڻیاں دا جوٹا؛ پچھواڑے: گھر دے پچھلے پاسے؛ اُورا: جلاہیاں دا اوزار جس تے سُوتر دی اٹی چڑھا کے اس توں نلیاں تے نڑے وٹدے نیں؛ جواہر: اک جوگ تے جوگ دی واہی لئی رقبہ؛ مُٹھی: لُٹ لئی؛ پریم کٹوری: پریم دی چھنی؛ کُٹھی: کوہ دی گئی؛ کرکُٹی: ڈھول دی کن پاڑ آواز؛چِھب: سُوتر دی اٹی؛

23

بھانوے جاڻ نہ جاڻ وے ویہڑے آ وڑ میرے
میں تیرے قربان وے ویہڑے آ وڑ میرے

تیرے جیہا مینوں ہور نہ کوئی ڈھونڈاں جنگل بیلا روہی
ڈھونڈاں تاں سارا جہان وے ویہڑے آ وڑ میرے

میں تیرے قربان وے ویہڑے آ وڑ میرے
لوکاں دے بھاڻے چاک مہیں دا رانجھا تاں وگاں وچ کہیندا

ساڈا تاں ایمان وے ویہڑے آ وڑ میرے
میں تیرے قربان وے ویہڑے آ وڑ میرے

ماپے چھوڑ لگی لڑ تیرے شاہ عنایت سائیں میرے
لائیاں دے لج پال وے ویہڑے آ وڑ میرے

میں تیرے قربان وے ویہڑے آ وڑ میرے

اوکھے لفظاں دے معنے
روہی: ریتلے علاقے دی آباد زمین؛ بھاڻے: خیال وچ؛ لائیاں: اکھیاں لائیاں، محبت

24

بے حد رمزاں دسدا نی ۔۔۔۔۔ ڈھولڻ ماہی
میم دے اوہلے وسدا نی ۔۔۔۔۔ ڈھولڻ ماہی

اولیاء منصور کہاوے
رمز اناالحق آپ بتاوے
آپے آپ نوں سولی چڑھاوے
تے کول کھلو کے ہسدا نی ۔۔۔۔۔ ڈھولڻ ماہی
بے حد رمزاں دسدا نی ۔۔۔۔۔ ڈھولڻ ماہی
میم دے اوہلے وسدا نی ۔۔۔۔۔ ڈھولڻ ماہی

اوکھے لفظاں دے معنے
میم: احمد وچ میم (احد دنیا وچ احمد دا روپ دھار کے آیا اے)؛ اناالحق: منصور دے مونہوں نکلیا واک (میں خدا ہاں)

25

پاڻی بھر بھر گئیاں سیاں سب آپو اپڻی وار ۔۔۔۔۔ جس جگ دا توں ماڻ کریں ہے سو جگ تار بتار

اک بھر آئیاں اک بھر چلیاں اک کھلیاں بانہہ پسار
ہار حمیلاں پئیاں گل وچ
باہیں چھڻکے چُوڑا
کنیں بُک بُک مچھریالے
سب اڈنبر کُوڑا
کوئی جو سد پیو نیں گُجھی وِسریا گھربار
پاڻی بھر بھر گئیاں سیاں سب آپو اپڻی وار

ہتھیں مہندی پیریں مہندی
سر تے دھڑی گندائی
تیل پھُلیل پاناں دا بِیڑا
دندیں مسی لائی
اجے وی شوہ نے جھات نہ پائی ایویں گیا سنگھار
پاڻی بھر بھر گئیاں سیاں سب آپو اپڻی وار

بُلھا شوہ دت سدی جاویں
تاں توں راہ پچھاڻیں
پوں ستاراں پاسیوں مانگیں
دا پون تن کاڻے
گُنگی ڈوری کملی ہوئے کے جان دی بازی ہار
پاڻی بھر بھر گئیاں سیاں سب آپو اپنی وار
جس جگ دا توں ماڻ کریں ہے سو جگ تار بتار

اوکھے لفظاں دے معنے
بانہہ پسار: بانہہ کھلار کے؛ حمیل: گل وچ پاؤڻ والا گہڻا؛ مچھریالے: مچھی دی شکل دا گہڻا؛ دھڑی: میڈھی؛ چوپٹ: پانسے دے کھیڈ وچ پوری کامیابی دا داء؛ ڈوری: کناں توں بولی


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels