Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کہندا بلھے شاہ >> کافیاں بُلھے شاہ >> کافیاں بلھے شاہ: 26-30

کافیاں بلھے شاہ: 26-30

وچار ڈیسک
March 19th, 2011
5 / 5 (1 Votes)

26
پردہ کس توں راکھی دا
کیوں اوہلے بہہ بہہ جھاکی دا

پہلوں آپے ساجن ساجیدا
ہُڻ دسنائیں سبق نماجی دا
ہُڻ آیا آپ نظارے نوں
وچ لیلٰی بڻ بڻ جھاکی دا

پردہ کس توں راکھی دا
کیوں اوہلے بہہ بہہ جھاکی دا

شاہ شمس دی کھل لہائیو
منصور نوں چا سُولی دوائیو
زکرئیے سر کلوتر دھرائیو
کیہ لیکھا رہ گیا باقی دا

پردہ کس توں راکھی دا
کیوں اوہلے بہہ بہہ جھاکی دا

کن کہیا فیکون کہایا
بے چُونی دا چُون بڻایا
خاطر تیری جگت باُیا
سر پر چھتر لولاکی دا

پردہ کس توں راکھی دا
کیوں اوہلے بہہ بہہ جھاکی دا

ہُڻ ساڈے ول دھایا اے
نہ رہندا چھپا چھپایا اے
کِتے بلھّا نام دھرایا ہے
وچ اوہلا رکھیا خاکی دا

پردہ کس توں راکھی دا
کیوں اوہلے بہہ بہہ جھاکی دا

اوکھے لفظاں دے معنے
ساجیدا: بڻایا جاندا اے؛ کلوتر: وڈا آرا؛ چُون: عالم مثال؛ لیکھا: حساب؛ بے چونی: بے مثالی دی حالت


27
پڑتالی لاہوڻ عشق کوں کھیڑے

نیوں لگا مت گئی گواتی
نحم اقرب ذات پچھاتی
سائیں بھی شاہ رگ توں نیڑے

پڑتالی لاہوڻ عشق کوں کھیڑے

ہیرے ہو مُڑ رانجھا ہوئی
ایہہ گل ورلا سمجھے کوئی
چُک پئے سب جھگڑے جھیڑے

پڑتالی لاہوڻ عشق کوں کھیڑے

لے برأٔتاں راتیں جاگڻ
نور نبی دے برسڻ لاگڻ
اوہو ویکھ اساڈے جھیڑے

پڑتالی لاہوڻ عشق کوں کھیڑے

انالحق کہایا لوکا
منصور نہ دیندا آپے ہوکا
ملاں بڻ بڻ آئے بیڑے

پڑتالی لاہوڻ عشق کوں کھیڑے

بلھّا شاہ شریعت قاضی
ہے حقیقت پر بھی راضی
سائیں گھر گھر نیاوں نبیڑے

پڑتالی لاہوڻ عشق کوں کھیڑے

اوکھے لفظاں دے معنے
چک پئے: مُک گئے؛ برأت: چھوٹ؛ نیاں: انصاف

28
پیاریا سانوں مٹھڑا نہ لگدا شور میں تے راضی رہڻا

پیاریا سانوں مٹھڑا نہ لگدا شور
میں گھر کھلا شگوفہ ہور
دیکھیاں باغ بہاراں ہور
ہُڻ مینوں کجھ نہ کہایں

پیاریا سانوں مٹھڑا نہ لگدا شور میں تے راضی رہڻا

ہُڻ میں موئی نی میرئیے ماں
پوڻی میری لے گیا کاں
ڈو ڈو کردی مگرے جاں
پوڻی دئیں سائیں دے ناں

پیاریا سانوں مٹھڑا نہ لگدا شور میں تے راضی رہڻا

بلھّا شوہ دے نال پیار
مہر عنایت کرے ہزار
ایہو قول تے ایہو قرار
دلبر دے وچ رہڻا

پیاریا سانوں مٹھڑا نہ لگدا شور میں تے راضی رہڻا

اوکھے لفظاں دے معنے
کاں: نفس شیطان؛


29
تاہنگ ماہی دی جلیاں
نت کانگ اڈاواں کھلیاں

کوڈی دمڑی پلّے نہ کائی
پار ونجڻ نوں میں سدھرائی
نال ملاح نہیں آشنائی
جھیڑا کراں وللّیاں

تاہنگ ماہی دی جلیاں
نت کانگ اڈاواں کھلیاں

نیں چندل دے شور کنارے
گھمڻ گھیر وچ ٹھاٹھاں مارے
ڈب ڈب موئے تارو بھارے
شور کراں تاں جھلیاں

تاہنگ ماہی دی جلیاں
نت کانگ اڈاواں کھلیاں

نیں چندل دے ڈوہنگے پاہے
تارو غوطے کھاندے آہے
ماہی منڈے پار سدھائے
میں کیوں رہیاں اکلّیاں

تاہنگ ماہی دی جلیاں
نت کانگ اڈاواں کھلیاں

نیں چندن دیاں تارو پھاٹاں
کھلی اڈیکاں ماہی دیاں واٹاں
عشق ماہی دے لائیاں چاٹاں
کوکاں تاں میں گلیاں

تاہنگ ماہی دی جلیاں
نت کانگ اڈاواں کھلیاں

پار جھناؤں جنگل بیلے
اوتھے خونی شیر بگھیلے
جھب رب مینوں ہی میلے
ایس فکر وچ گلیاں

تاہنگ ماہی دی جلیاں
نت کانگ اڈاواں کھلیاں

ادھی رات لٹکدے راتے
اک لٹکے اک لٹکڻ ہارے
میں اٹھ آئی ندی کنارے
پار لنگھڻ نوں کھلیاں

تاہنگ ماہی دی جلیاں
نت کانگ اڈاواں کھلیاں

میں من تارو سار کیہ جاناں
ونجھ چپہ نہ تلہ پوراناں
گھمن گھیر نہ ٹانگ ٹکاڻاں

تاہنگ ماہی دی جلیاں
نت کانگ اڈاواں کھلیاں

بلھّا شوہ گھر میرے آوے
ہار سنگار میرے من بھاوے
منہ مخٹ متھے تلک لگاوے
ویکھے تاں میں بھلیاں

تاہنگ ماہی دی جلیاں
نت کانگ اڈاواں کھلیاں

اوکھے لفظاں دے معنے
تاہنگ: ملڻ ویکھڻ دی سدھر؛ کانگ: کاں؛ میں سدھرائی: میں سدھر پیدا کیتی؛ وللّیاں: عجیب و غریب؛ نیں چندل: چندر بھاگا (چنانہہ دریا دا پراڻا ناں)؛ پھاٹاں: شاخاں؛ واٹاں: رستے؛ بگھیلے: باگھ دے بچے؛ ٹانگ: پاڻی دی روہڑدی اجیہی لہر جیہڑی دوجے کنڈھے اپڑڻ وچ مددگار ہوئے؛ بھلیاں: چنگی بھلی،

30
توں کدھروں آیا کدھر جاڻاں
اپڻا دس ٹکاڻاں

جس ٹھاڻے دا ماڻ کریں
تیرے نال نہ جاسی ٹھاڻاں
ظلم کریں تے لوک ستاویں کسب پھڑیو لُٹ کھاڻاں
شہر خموشاں دے چل وسیّے
جتھے ملک سماناں

بھر بھر پور لنگھواے ڈاہڈا
ملک الموت مہاڻاں
کر لے چادڑ چار دیہاڑے
اوڑک توں اٹھ جاڻاں
اہناں سبھناں تھیں ایہہ بلھّا
اوگڻ ہار پراڻاں

توں کدھروں آیا کدھر جاڻاں
اپڻا دس ٹکاڻاں

اوکھے لفظاں دے معنے
ٹھاڻا: پولیس چوکی؛ اوڑک: آخرکار؛ اوگڻ ہار: گناہ گار، مجرم


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels