Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کہندا بلھے شاہ >> کافیاں بُلھے شاہ >> کافیاں بلھے شاہ 31-35

کافیاں بلھے شاہ 31-35

وچار ڈیسک
March 21st, 2011

31
توں نہیئوں میں ناہیں
وے سجڻاں
توں نہیئوں میں ناہیں
کھولے دے پرچھاویں وانگوں گھوم رہیا من ماہیں
توں نہیئوں میں ناہیں
وے سجڻاں
توں نہیئوں میں ناہیں
جاں بولاں توں نالے بولیں چپ کراں من ماہیں
توں نہیئوں میں ناہیں
وے سجڻاں
توں نہیئوں میں ناہیں
جاں سواں توں نالے سونویں جاں ٹُراں توں راہیں
توں نہیئوں میں ناہیں
وے سجڻاں
توں نہیئوں میں ناہیں
بلھّا شوہ گھر آیا ساڈے جندڑی گھول گمائیں
توں نہیئوں میں ناہیں
وے سجڻاں
توں نہیئوں میں ناہیں

اوکھے لفظاں دے معنے
چپ کراں من ماہیں: جے میں چپ کراں تے توں میرے دل وچ لک جانا ایں؛ جندڑی گھول گمائیں: کسے دے منجے دوالے پھر کے ست چکر لاؤڻا تے آکھڻا مینوں ایہدی بیماری یاں موت آ جاوے، کئی واری چکر لاؤڻ والا واقعی مر جاندا اے تے روگی بھلا چنگا ہو جاندا اے۔ ایس طرحاں چکر لاؤڻ والا آپڻی جند واردا صدقے کردا تے گھول گھماؤندا اے۔
32
ٹُوڻے کامن کرکے نی میں پیارا یار مناواں گی
اس ٹُوڻے نوں پڑھ پڑھ پھوکاں
سورج اگن جلا واں گی
ٹُوڻے کامن کرکے نی میں پیارا یار مناواں گی
اکھیاں کاجل کالے بادل
بھواں سے آگ لگاواں گی
ٹُوڻے کامن کرکے نی میں پیارا یار مناواں گی
اور بساط نہیں کُجھ میری
جندڑی دھڑی گنداواں گی
ٹُوڻے کامن کرکے نی میں پیارا یار مناواں گی
ست سمندر دل دے اندر
دل سے لہر اٹھاواں گی
ٹُوڻے کامن کرکے نی میں پیارا یار مناواں گی
بجلی ہوکر چمک ڈراواں
میں بادل گھر گھر جاواں گی
ٹُوڻے کامن کرکے نی میں پیارا یار مناواں گی
عشق انگیٹھی ہرمل تارے
سورج اگن چڑھاواں گی
ٹُوڻے کامن کرکے نی میں پیارا یار مناواں گی
ناہیں بیاہی نہ میں کواری
بیٹا گود کھڈاواں گی
ٹُوڻے کامن کرکے نی میں پیارا یار مناواں گی
لامکان دی بیڑی بلھّا
بہ کے ناد وجاواں گی
ٹُوڻے کامن کرکے نی میں پیارا یار مناواں گی

اوکھے لفظاں دے معنے
ٹوڻا: جادو دا اثر ؤاؤڻ لئی کیتی گئی کوئی تدبیر؛ کامن: پتی نوں آپڻے ول دھیان کراؤڻ لئی کیتے گئے جادو منتر دے لفظ؛ دھڑی: کنپٹیاں اُتے پائے گئے گُندے وال؛ میڈھیاں؛ پٹڑی: حد، کنارہ، تختہ؛ ہرمل: اک بُوٹی دے بی جیہناں نوں اگ وچ سٹ کے جن بھوت لاہوڻ لئی جادو ٹوڻے والے دھوڻی دیندے نیں۔

33
حاجی لوک مکے نوں جاندے
رانجھڻ ماہی مکّہ
نی میں کملی ہاں
میں تے منگ رانجھڻ دی ہوئیاں
بابل کردا دھکا
نی میں کملی ہاں
حاجی لوک مکّے نوں جاندے
گھر وچ نوشوہ مکہ
نی میں کملی ہاں
وچے حاجی وچے گاجی
وچے چور اُچکا
نی میں کملی ہاں
حاجی لوک مکے نوں جاندے
جاڻاں تخت ہزارے
نی میں کملی ہاں
جت ول یار اوتے ول کعبہ
پھول کتاباں چارے
نی میں کملی ہاں

اوکھے لفظاں دے معنے
گاجی: غازی؛ جت ول: جس پاسے؛


34
دل لوچے ماہی یار نوں
دل لوچے ماہی یار نوں
اک ہس ہس گلاں کردیاں
اک روندیاں روندیاں مردیاں
کہو پُھلی بسنت بہار نُوں
دل لوچے ماہی یار نوں
میں نہاتی دھوتی رہ گئی
اِک گنڈ ماہی دل بہہ گئی
بھا لائیے ہار سنگار نوں
دل لوچے ماہی یار نوں
میں دُوتیاں گھائل کیتیاں
دُکھ گھیر چوفیروں لیتیاں
گھر آماہی دیدار نوں
دل لوچے ماہی یار نوں
بلھا ہُن ساجن آیا گھر
میں گُھٹ رانجھڻ لایا گھر
دُکھ گئے سمندر پار نوں
دل لوچے ماہی یار نوں


اوکھے لفظاں دے معنے
لوچڻا: ملڻ دیکھڻ نوں ترسڻا؛ گنڈھ بہہ جاڻا: کسے دے خلاف پکا خیال دل وچ سما جاڻا؛ بھاہ لاؤڻا: اگ لا دیڻا، نفرت پاروں کوئی اہمیت نہ دیڻا؛ دُوتی: دُشمڻ، حریف؛

35
ڈھولا آدمی بڻ آیا

آپے آہو آپے چیتا
آپے مارن دھایا
آپے صاحب آپے بردا
آپے مُل وکایا

ڈھولا آدمی بڻ آیا

ہاٹھی تے اسوار ہویا
کدی ٹھوٹھا ڈانگ بُھوایا
راول جوگی بھوگی ہوکے
سانگی سانگ رچایا

ڈھولا آدمی بڻ آیا

بازی گر کیا کھیلی بازی
پتلی وانگ نچایا
میں اس پڑتالی نچناں ہاں
جس گت مت یار لکھایا

ڈھولا آدمی بڻ آیا

ہابیل قابیل آدم دے جائے
آدم کس دا جایا
بلّھا انھاں توں بھی اگے آہا
دادا گود کھڈایا

ڈھولا آدمی بڻ آیا

اوکھے لفظاں دے معنے
آہو: ہرن؛ صاحب: آقا؛ بردہ: زرخرید غلام؛ ٹھوٹھا ڈانگ بھوایا: فقیری اختیار کیتی؛ راول: قسمت دا حال اتے روگ بیماری دسڻ والا؛ بھوگی: جوگی دا اُلٹ؛ پڑتال: چار تال دا اک بھید۔ ایس تال وچ گائے جاڻ والے شعراں دا ناں پڑتال پے گیا سی؛ مِت: متر؛ لکھایا: دکھا دتا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels