Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کہندا بلھے شاہ >> کافیاں بُلھے شاہ >> کافیاں بُلھے شاہ: 5-1

کافیاں بُلھے شاہ: 5-1

وچار ڈیسک
May 31st, 2008
5 / 5 (3 Votes)

۱
الف اللہ دل رتّا میرا
"ب" دی خبر نہ کائی
"ب" پڑھدیاں مینوں سمجھ نہ آوے
لذّت الف دی آئی
"ع" تے "غ" نوں سمجھ نہ جاڻاں
گل الف سمجھائی
بُلھیا قول الف دے پورے
دل دی کرن صفائی


اوکھے لفظاں دے معنے
رتّا۔ لال رنگ رنگیا ہویا (پریم وچ بجھیا ہویا) الف۔ اللہ دی علامت ب۔ بیگانے یا غیر دی سینت
ع۔ یعنی عین، ساہےیا غ۔ غیر، غائب قول۔ اقرار، ہدائیتاں


2
اب لگن لگی کیہ کرئیے؟
نہ جی سکیئے تے نہ مرئیے
تم سڻو ہماری بیناں
موہے رات دنے نئیں چیناں
ہُڻ پی بِن پلک نہ سرئیے
اب لگن لگی کیہ کرئیے ؟

اب لگن لگی کیہ کرئیے؟
نہ جی سکیئے تے نہ مرئیے

اہ اگن برہوں دی جارے
کوئی ہمری پیت نوارے
بن درشڻ کیسے ترئیے
اب لگن لگی کیہ کرئیے؟

اب لگن لگی کیہ کرئیے؟
نہ جی سکیئے تے نہ مرئیے

بُلھے پئی مصیبت بھاری
کوئی کرو ہماری کاری
ایہہ اجہے دُکھ کیسے جرئیے
اب لگن لگی کیہ کرئیے؟

اب لگن لگی کیہ کرئیے؟
نہ جی سکیئے تے نہ مرئیے


اوکھے لفظاں دے معنے
بیناں: ویڻ، رونا؛ لگن: عشق؛ سرئیے:گذارہ کرئیے، وقت لنگھاؤڻا؛ اگن: اگ؛ جارے:جالے، ساڑے؛
نوارے: سانبھ کے رکھے، بچاوے، راکھی کرے؛ درشن:دیدار، ویکھنا ؛ کاری: شافی علاج، دارو اجہے:اج دے، اجوکے


3
اب ہم گم ہوئے!
پریم نگر کے شہر

اپڻے آپ نوں سودھ رہیا ہوں
نہ سِر، ہاتھ نہ پیر

خودی کھوئی اپڻا پد چیتا
تب ہوئی گل خیر

لتّھے پگڑے پہلے گھر تھیں
کوڻ کرے نِرویر

بُلھا شوہ ہے دوہِیں جہانیں
کوئی نہ دِسدا غیر



اوکھے لفظاں دے معنے
سودھڻا: پاک کرنا، غلطیاں کڈھ کے ٹھیک کر دیڻا، تحقیق، تلاش؛ پد: مقام، تے پد دا مطلب بول، کلام تے لفظ وی ہے؛  چیتا: یاد کیتا، سہی کیتا ؛ پگڑے: پکڑے؛  نِرویر۔ انصاف، جیس وچ ویر نہ ہووے



4
اپڻے سنگ رلائیں پیارے، اپڻے سنگ رلائیں
پہلے نیُونہہ لگایا سی تیں آپے چائیں چائیں
میں لایا اے کہ تُدھ لایا، اپڻی اور نباہیں
راہ پواں تاں دھاڑے بیلے، جنگل لکھ بلائیں
بُھوکڻ چیتے چِت مچتے، بھوگڻ کرن ادائیں
پار تیرے جگاتر چڑھیا، کنڈھے لکھ بلائیں
ہُول دلے دا تھر تھر کنبدا، بیڑا پار لنگھائیں
کر لئی بندگی رب سچّے دی، پوڻ قبول دعائیں
بُلھے شاہ تے شاہاں دا مُکھڑا، گھنگٹ کھول دکھائیں
اپڻے سنگ رلائیں پیارے، اپڻے سنگ رلائیں



اوکھے لفظاں دے معنے
سنگ: ساتھ؛  چائیں چائیں: چاء نال، ارماناں نال؛  اور:اپنے ولّوں؛  دھاڑے:حملے، ڈاکے؛  بیلے:سنگھنے جنگل؛ بھوکڻ: دند کھوبدے نیں ، جے ایہہ بوکڻ ہے تے ایہہ بوک توں نکلیا لفظ ہو سکدا ہے۔ بوک دا معنی ہے، بکرا، تے بوکڻ دا مطلب ہووے گا بکرے بلاوڻا، للکراں مارنا؛ جُگاتر:جُگ انتر، اک جُگ دا اخیر تے دوجے دا شروع؛  ہول:ہولا، رُکھ دی پوری نوں کھوکھلا کرکے بنائی گئی بیڑی



5
اُٹھ گئے گواہنڈھوں یار
ربا ّ ہُڻ کیہ کرئیے

اُٹھ گئے ہُڻ رہندے ناہیں
ہویا ساتھ تیار
ربا ہُن کیہ کرئیے

ڈھانڈ کلیجے بل بل اُٹھدی
بھڑکے برہوں نار
ربا ہُڻ کیہ کرئیے

بُلھا شوہ پیارے باہجھوں
رہے اُرار نہ پار
ربا ہُن کیہ کرئیے


اوکھے لفظاں دے معنے
ڈھانڈ: نکا جیہا بھانڑ؛  برہوں: فراق؛  نار:اگ؛  اُرار: ایس پاسے، دریا دے اپڻے والے پاسے


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels