Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> جنگ نامہ- شاہ محمد >> جنگ نامہ : بند 10-1

جنگ نامہ : بند 10-1

شاہ محمد
June 4th, 2008
5 / 5 (2 Votes)
اول حمد جناب اﷲ دی نوں،
جہڑا قُدرتی کھیل بناؤندا ای۔
چوداں طبقاں دا نقش و نگار کرکے،
رنگ رنگ دے باغ لگاؤندا ای۔
صفاں پِچھلیاں سبھ لپیٹ لیندا،
اگوں ہور ہی ہور وچھاؤندا ای۔
شاہ محمدا، اُس توں سدا ڈریئے،
بادشاہاں توں بِھیکھ منگاؤندا ای۔ ١

ایتھے آیاں نوں دُنیا موہ لیندی،
دغے باز دا دھار کے بھیس میاں۔
سدا نہیں جوانی تے عیش ماپے،
سدا نہیں جے بال وریس میاں۔
سدا نہیں دولتاں فیل گھوڑے،
سدا نہیں جے راجیاں دیس میاں۔
شاہ محمدا، سدا نا رُوپ دُنیا،
سدا رہن نا کالڑے کیس میاں۔ ٢

اِک روز وڈالے دے وِچ بیٹھے،
چلی آن انگریز دی بات آئی۔
سانوں آکھیا ہیرے تے نور خاں نے،
جِنہاں نال ساڈی ملا قات آئی۔
راضی بہُت رہندے مُسلمان ہِندو،
سِراں دوہاں دے اُتے آفت آئی۔
شاہ محمدا، وِچ پنجاب دے جی،
کَدے نہیں سی تیسری ذات آئی۔ ٣

ایہہ جگ سرائے مُسافراں دی،
ایتھے زور والے کئی آ گئے۔
شداد نمرود فرعون جیہے،
دعویٰ بنھ خُدا کہائے گئے۔
اکبر شاہ جِہے وِچ دِلی دے جی،
پھیری وانگ ونجاریاں پا گئے۔
شاہ محمدا، رہے گا رب سچا۔
واجے کُوڑ دے کئی وجا گئے۔ ٤

مہابلی رنجیت سنگھ ہویا پیدا،
نال زور دے مُلک ہِلائے گیا۔
مُلتان، کشمیر، پِشور، چنبا،
جموں کانگڑا کوٹ نِوائے گیا۔
ہور دیش لداخ تے چین توڑی،
سِکہ آپنے نام چلائے گیا۔
شاہ محمدا، جان پچاس برساں،
اچھا رج کے راج کما گیا۔ ٥

جدوں ہوئے سرکار دے سواس پُورے،
جمع ہوئے نی سبھ سردار میاں۔
چیت سنگھ نوں ماریا کَور صاحب،
شروع ہوئی دربار تلوار میاں۔
کھڑک سنگھ مہاراج نے ڈھاہ ماری،
مویا مُڈھ قدیم دا یار میاں۔
شاہ محمدا، اساں بھی نال مرنا،
ساڈا ایہو سی قَول قرار میاں۔ ٦

میرے بیٹھیاں ایہناں نے خون کِیتا،
ایہہ تاں غرق جاوے دربار میاں۔
پِچھے ساڈے بھی کَور نا راج کرسی،
اسیں مراں گے ایس نوں مار میاں۔
ناحق دا ایہناں نے خون کِیتا،
ایہہ تاں مرن گے سبھ سردار میاں۔
شاہ محمدا، ہوئی ہُن موت سستی،
خالی نہیں جانا اِک وار میاں۔ ٧

کھڑک سنگھ مہاراج ہویا بہُت ماندا،
برس اِک پِچھوں وس کال ہویا۔
آئی موت نا اٹکیا اِک گھڑی،
چیت سنگھ دے غم دے نال مویا۔
کَور صاحب شاہزادے دی گل سُن کے،
ذرا درد دے نال نا مُول رویا۔
شاہ محمدا، کئیاں دے مارنے نوں،
وِچ کونسلے کَور نوں حُکم ہویا۔ ٨

کھڑک سنگھ مہاراج نوں چُک لیا،
دیکھو ساڑنے نوں ہُن لَے چلے۔
دھرم راج نوں جدوں ایہہ خبر ہوئی،
کَور مارنے نوں اُس دُوت گھلے۔
مارو مار کردے دُوت آن وڑے،
جدوں موت دے ہوئے نی آن ہلے۔
شاہ محمدا، دیکھو رضا اُس دی،
اودھم سنگھ تے کَور دے سواس چلے۔ ٩

اِک دُوت نے دیکھ کے فِکر کِیتا،
پلک وِچ دروازے دے آیا ای۔
جہڑا دُھر درگاہ دا حُکم آندا،
دیکھو اُس نوں خوب بجایا ای۔
اندر طرف حویلی دے تُرے جاندے،
چھجا ڈھاہ دوہاں اُتے پایا ای۔
شاہ محمدا، اودھم سنگھ تھاؤں مویا،
کَور صاحب بھی سہِکدا آیا ای۔ ١٠

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels