Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> جنگ نامہ- شاہ محمد >> جنگ نامہ: بند 20-11

جنگ نامہ: بند 20-11

شاہ محمد
June 4th, 2008
اٹھ پہر لُکائے کے رکھیو نے،
دُوجے دِن رانی چند کَور آئی۔
کھڑک سنگھ دا مُول دریغ ناہیں،
کَور صاحب تائیں اوتھے رون آئی۔
ہُن مویا تاں کرو سسکار اِس دا،
بھلا تُساں کیوں اِتنی دیر لائی۔
شاہ محمدا، روندی اے چند کوراں،
جس دا مویا پُتر سوہنا شیر سائیں۔ ١١

شیر سنگھ نوں کِسے جا خبر دِتی،
جس دا مویا بھتیجا تے وِیر یارو۔
جدوں آن کے ہویا لاہور داخل،
اکھیں رو پلٹ دا نیر یارو۔
اُس نے تُرت بٹالِیوں کُوچ کِیتا،
راتیں آؤندا گھت وہیر یارو۔
شاہ محمد لوک دلبری کردے،
چند کَور ہوئی دِلگیر یارو۔ ١٢

دِتے سنتری چار کھلہار چوری،
شیر سنگھ اج اندر آونا جے۔
تُرت پُھوک دِیؤ تُسیں کرابیناں،
اِک گھڑی وِچ مار مُکاونا جے۔
شیر سنگھ نوں راجے نے خبر دِتی،
اندر اجے ضرور نہیں آونا جے۔
شاہ محمدا، اجے نہیں زور تیرا،
تینوں اساں ہی انت سداونا جے۔ ١٣

چند کَور دی مندی جو نظر دیکھی،
دغے بازیاں ہور بتھیریاں نی۔
اُس نے تُرت لاہور تھیں کُوچ کِیتا،
بَیٹھا جائے کے وِچ مُکیریاں نی۔
پِچھے تخت بَیٹھی رانی چند کوراں،
دیندے آن مُصاحِب دلیریاں نی۔
شاہ محمدا، کَور نا جمنا ایں،
قلعے کوٹ تے ریتاں تیریاں نی۔ ١٤

راجے لشکراں وِچ صلاح کِیتی،
شیر سنگھ نوں کِویں سدائیے جی؟
اوہ تاں پُتر سرکار دا فتح جنگی،
گدی اوس نوں چا بہائیے جی۔
سِنگھاں آکھیا، راجا جی حُکم تیرا،
جس نوں کہیں سو فتح بُلائیے جی۔
شاہ محمدا، گل جو مُونہوں کڈھیں،
ایسے وخت ہی چا منگائیے جی۔ ١٥

بائی دِناں دی راجے نے لئی رخصت،
تُرت جموں نوں ہوئے نی کُوچ ڈیرے۔
شیر سنگھ تائیں لِکھ گھلی چٹھی،
میں تاں رفو کر چھڈے نی کم تیرے۔
دھونسا مار کے پہُنچ لاہور جلدی،
اگوں آ مِلسن تینوں سبھ ڈیرے۔
شاہ محمدا، مِلن گے پھیر افسر،
جس ویلڑے شہر دے گِیوں نیڑے۔ ١٦

شیر سنگھ نے راجے دا خط پڑھ کے،
فوجاں تُرت لاہور نوں گھلیاں نی۔
گھوڑے ہِنکدے تے مارُو وجدے نی،
دھوڑ اُڈ کے گھٹا ہو چلیاں نی۔
آوے بُدھو دے لائے نی پاس ڈیرے،
فوجاں لتھیاں آن اِکلیاں نی۔
شاہ مُحمدا، آن جاں مِلے افسر،
گلاں وِچ لاہور دے چلیاں نی۔ ١٧

شیر سنگھ تاں بُدھو دے آوِیوں جی،
کر تُرم لاہور ول دھاوا ای۔
پہلے پڑتالاں دے اگوں پاڑ کے جی،
شیر سنگھ نوں تُرت لنگھایا ای۔
اُس بلی شہزادے دا تیز بھاری،
جس قلعے نوں مورچہ لایا ای۔
شاہ محمدا، ہار کے وِچلیاں نے،
شیر سنگھ نوں گدی بہایا ای۔ ١٨

شیر سنگھ گدی تے بَیٹھ کے جی،
رانی قید کر کے قلعے وِچ پائی۔
گھر بیٹھیاں رب نے راج دِتا،
دیکھو مل بَیٹھا ساری پاتشاہی۔
برس ہویا جاں اُس نوں قید اندر،
رانی دِل دے وِچ جو جِچ آہی۔
شاہ محمدا، مار کے چند کوراں،
شیر سنگھ نے گلوں بلا لاہی۔ ١٩

جِنہاں گولیاں نے ماری چند کوراں،
اُنہاں تائیں حضور چا سدیا ای۔
راجے سِنگھاں دا گلہ مِٹاونے نوں،
نک کن چا اُنہاں دا وڈھیا ای۔
راجے سِنگھاں نوں اندروں حُکم کِیتا،
اُنہاں اندروں باہر چا کڈھیا ای۔
شاہ محمدا، لاہ کے سبھ زیور،
کالا مُنہ کر کے پھیر چھڈیا ای۔ ٢٠

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels