Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> جنگ نامہ- شاہ محمد >> جنگ نامہ: بند 40-31

جنگ نامہ: بند 40-31

شاہ محمد
June 4th, 2008
مہابلی سردار سی پنتھ وِچوں،
ڈِٹھی بنی کُچلنی چال میاں۔
دِل آپنے بَیٹھ وِچار کردا،
ایتھے کئیاں دے ہون گے کال میاں۔
لہنا سنگھ سردار مجیٹھیا سی،
وڈا عقل دا کوٹ کمال میاں۔
شاہ مُحمدا، تُر گیا تیرتھاں نوں،
سبھو چھڈ کے دنگ دوال میاں۔ ٣١

دلیپ سنگھ گدی اُتے رہے بَیٹھا،
ہِیرا سنگھ جو راج کماؤندا ای۔
جلا اُس دا خاص وزیر ہے سی،
خاطر تلے نا کِسے نوں لیاؤندا ای۔
اندر باہر سرکار نوں پیا گھورے،
کہے کُجھ تے کُجھ کماؤندا ای۔
شاہ محمدا پنتھ نوں دُکھ دیندا،
ہِیرا سنگھ دا ناش کراؤندا ای۔ ٣٢

سِنگھاں لِکھیا خط سُچیت سنگھ نوں،
بُرا کرن ہارا جلا ٹھیک دا ای۔
جلدی پہُنچ وزیر بنا لئیے،
تینوں خالصہ پیا اُڈِیکدا ای۔
اکثر راج پیارے نی راجیاں نوں،
ہِیرا سنگھ تاں پُتر شریک دا ای۔
شاہ محمدا، جلے دا نک وڈھو،
بھج جائےگا ماریا لِیک دا ای۔ ٣٣

جس ویلڑے راجے نے خط پڑھیا،
جامے وِچ نا مُول سماؤندا ای۔
وگا تگ لاہور نوں اساں جانا،
ڈیرے کاٹھیاں چا پواؤندا ای۔
منجی کاکڑی فوج اُتار کے جی،
بائی آدمی نال لَے آؤندا ای۔
شاہ محمدا، آن لاہور پہُنچا،
میاں میر ڈیرا آن لاؤندا ای۔ ٣٤

ہِیرا سنگھ نوں راجے دی خبر ہوئی،
تُرت پڑتلاں سبھ لپیٹیاں نی۔
سِنگھاں آکھیا، راجا جی! جاؤ مُڑ کے،
فوجاں رہندیاں نہیں سمیٹیاں نی۔
سِنگھوں! جیؤندا جان محال جمو،
طعنے دین راجپوتاں دِیاں بیٹیاں نی۔
شاہ محمدا، آیا وزیری لَے کے،
آکھن سبھ پہاڑ ڈُمیٹیاں نی۔ ٣٥

توپاں جوڑ کے پلٹناں نال لَے کے،
چاچے سکے تے ہِیرا سنگھ جا چڑھدا۔
جدوں فوجاں نے گھتیا آن گھیرا،
کھنڈا کِھچ کے سار دا ہتھ پھڑدا۔
بھیم سنگھ تے کیسری سنگھ سارے،
لَے کے دوہاں نوں کٹک دے وِچ وڑدا۔
شاہ محمدا، سِنگھاں نے لاج رکھی،
متھے ساہمنے ہو کے خوب لڑدا۔ ٣٦

سنگھ جلھے دے ہتھوں جو تنگ آئے،
دِلاں وِچ کچیچیاں کھاؤندے نی۔
اگے ست تے اٹھ سی طلب ساری،
باراں زور دے نال کراؤندے نی۔
کئی آکھدے دِیو انعام سانوں،
لَے کے بُتکیاں چا گل پاؤندے نی۔
شاہ محمدا، جلھے دے مارنے نوں،
پَنج کونسلی چا بناؤندے نی۔ ٣٧

ہویا حُکم جاں بہُت مہاوتاں نوں،
ہودے سونے دے چائے کساؤندے نی۔
طرف جموں دی مُنہ موڑ چلے،
سانوں آ کے سنگھ مناؤندے نی۔
گھیرے ازل دے عقل نا مُول آئی،
بُرا آپنا آپ کراؤندے نی۔
شاہ محمدا، سنگھ لَے مِلے توپاں،
اگوں گولیاں نال اُڈاؤندے نی۔ ٣٨

ہِیرا سنگھ تے جلے نوں مار کے جی،
جواہر سنگھ وزیر بناؤندے نی۔
طرف جموں پہاڑ دی ہو چلے،
راہی شور کھرود مچاؤندے نی۔
اُتھوں راجا گُلاب سنگھ بنھ آندا،
کَینٹھے پھیر لَے کے گلیں پاؤندے نی۔
شاہ محمدا، اساں ہُن کڑے لَینے،
جواہر سنگھ نوں آکھ سُناؤندے نی۔ ٣٩

کیہا بُرچھیا آن اندھیر پایا،
جیہڑا بہے گدی اوہنوں مار لَیندے۔
کڑے کَینٹھے انعام روپئے باراں،
کَدے پَنج تے ست نا چار لَیندے۔
کئی تُرے نی قلعے دی لُٹ کرکے،
کئی شہر دے لُٹ بازار لَیندے۔
شاہ محمدا، چڑھے مجھَیل بھئیئے،
پیسہ طلب دا نال پَیزار لَیندے۔ ٤٠

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels