Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> جنگ نامہ- شاہ محمد >> جنگ نامہ: بند 50-41

جنگ نامہ: بند 50-41

شاہ محمد
June 4th, 2008

پِچھے اِک سرکار دے کھیڈ چلی،
پئی نِت ہُندی مارو مار میاں۔
سِنگھاں مار سرداراں دا ناس کِیتا،
سبھو قتل ہوئے وارو وار میاں۔
سِر فوج دے رہیا نا کوئی کُنڈا،
ہوئے شُتر جیوں باجھ مُہار میاں۔
شاہ محمدا، پِھرن سردار لُکدے،
بُھوت منڈلی ہوئی تیار میاں۔ ٤١

جواہر سنگھ دے اُتے نی چڑھے سارے،
متھا خونیاں دے وانگ وٹیو نے۔
ڈردا بھانجے نوں لَے کے مِلن آیا،
اگوں نال سنگین دے پھٹیو نے۔
سیکھاں نال اڑُنب کے فیل اُتوں،
کڈھ ہودِیوں زِمیں تے سٹیو نے۔
شاہ محمدا، واسطے پا رہیا،
سِر نال تلوار دے کٹیو نے۔ ٤٢

مائی قید قنات دے وِچ کِیتی:

کِس نوں رو کے پئی سُناونی ہیں؟
تیرا کَون حمایتی سُنن والا،
جس نوں پا کے وَین دِکھاونی ہیں؟
کہڑے پاتشاہ دا پُت مویا ساتھوں
جہڑے ڈونگھڑے وَین توں پاونی ہیں؟
شاہ محمدا، دے انعام سانوں،
ساڈے زور تے راج کَماونی ہیں۔ ٤٣

پئی جھوردی اے رانی جِند کوراں،
کِتھوں کڈھاں میں کلغیاں نِت توڑے۔
میرے ساہمنے کوہیا اے وِیر میرا،
جس دی تابیا لکھ ہزار گھوڑے۔
کِتھوں کڈھاں میں دیس فرنگیاں دا،
کوئی مِلے جو ایہناں دا گرب توڑے۔
شاہ محمدا، اوس تھیں جان واراں،
جواہر سنگھ دا وَیر جو کوئی موڑے۔ ٤٤

مینوں آن چپھیریوں گھوردے نی،
لَیندے مُفت انعام روپئے باراں۔
جٹی ہوواں تاں کراں پنجاب رنڈی،
سارے دیس دے وِچ چا تُرن واراں۔
چھڈاں نہیں لاہور وِچ وڑن جوگے،
سنے وڈیاں افسراں جمعداراں۔
پئے رُلن ایہہ وِچ پردیس مُردے،
شاہ محمدا، مارنی ایس ماراں۔ ٤٥

جِنہاں ماریا کوہ کے وِیر میرا،
میں تاں کھُہاؤں گی اُنہاں دِیاں جُنڈیاں نی۔
دھاکاں جان ولائتی دیس سارے،
پاواں بکرے وانگ چا ونڈیاں نی۔
چوڑے لہِنگے بہُت سُہاگناں دے،
نتھ، چونک تے والِیاں ڈنڈیاں نی۔
شاہ محمدا، پَین گے وَین ڈونگھے،
جدوں ہون پنجابناں رنڈیاں نی۔ ٤٦

عرضی لِکھی فرنگی نوں کُنج گوشے،
پہلے آپنا سُکھ انند واری۔
تیری ول میں فوج نوں گھلنیاں،
کھٹے کرِیں توں ایہناں دے دند واری۔
جہڑا زور توں آپنا سبھ لاویں،
پِچھے خرچ میں کراں گی بند واری۔
شاہ محمدا، پھیر نا آؤن مُڑ کے،
مینوں ایتنی بات پسند واری۔ ٤٧

پہلے پار دا مُلکھ توں مل ساڈا،
آپے کھا غُصہ تَیتھیں آؤن گے۔
سوئی لڑن گے ہون بے خبر جہڑے،
متھا کدی سردار نا ڈاہون گے،
ایسے واسطے فوج میں پاڑ چھڈی،
کئی بھانج اچانکی کھاون گے۔
شاہ محمدا، لاٹ جی کٹک تیرے،
میرے گلوں تگادڑی لاہون گے۔ ٤٨

لندن کمپنی صاحب کتاب ڈِٹھی،
ایہناں لاٹکاں وِچوں کَون لڑے گا جی؟
ٹُنڈے لاٹ نے چُکیا آن بیڑا :
ہم سنگھ سِیوں جائے کے لڑے گا جی۔
گھنٹے تین میں جا لاہور ماراں،
اِس بات میں فرق نا پڑے گا جی۔
شاہ محمدا، پھگنوں تیرھویں نوں،
ہم شہر لاہور وِچ وڑے گا جی۔ ٤٩

وجی تُرم تنبُور کرنَیل شُتری،
تنبُو بَیرکاں نال نشان میاں۔
کوتل بگھیاں پالکی توپخانے،
دُوربین چنگی، سائبان میاں۔
چڑھیا لندنوں لاٹ اُٹھائے بیڑا،
ڈیرا پاؤندا وِچ میدان میاں۔
شاہ محمدا، گوریاں چھیڑ چھیڑی،
مُلک پار دا ملیا آن میاں۔ ٥٠

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels