Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> جنگ نامہ- شاہ محمد >> جنگ نامہ: بند 60-51

جنگ نامہ: بند 60-51

شاہ محمد
June 4th, 2008

پھرانسیس نوں اندروں حُکم ہویا،
تُسیں جاؤ خاں طرف کشمیر نوں جی۔
اُنہاں رب دا واسطہ پایا ای،
مائی پھڑی نا کُجھ تقصیر نوں جی۔
پارو مُلک فرنگیاں مل لیا،
اسیں ماراں گے اوس دے پِیر نوں جی۔
شاہ محمدا، آئے نی ہور پرِیوں،
اساں ڈکنا اوس وہیر نوں جی۔ ٥١

مائی آکھیا، سبھ چڑھ جان فوجاں،
بُوہے شہر دے رہن نا سکھنے جی۔
مُسلمانیاں پڑتالاں رہن ایتھے،
گھوڑ چڑھے ناہیں ایتھے رکھنے جی۔
کلغی والڑے خالصہ ہون موہرے،
اگے ہور غریب نا دھکنے جی۔
شاہ محمدا، جِنہاں دی طلب تیراں،
مزے تِناں لڑائیاں دے چکھنے جی۔ ٥٢

سارے پنتھ نوں سد کے کہن لگی،
مَیتھوں گئے خزانے نِکھُٹ واری۔
جمنا تیکراں پیا جے دیس سُئنلا،
کھاؤ دیس فرنگی دا لُٹ واری۔
مارو شہر فِروزپور لدھیانہ،
سُٹو چھاونی اوس دی پُٹ واری۔
شاہ محمدا، لوو انعام مَیتھوں،
کڑے، کَینٹھے میں دیواں گی سُٹ واری۔ ٥٣

سِنگھاں آکھیا، لڑاں گے ہو ٹوٹے،
سانوں خبر گھلیں دِنے رات مائی۔
تیری نوکری وِچ نا فرق کرساں،
بھاویں کُھوہ گھتیں بھاویں کھات مائی۔
سِنگھاں بھولیاں مُول نا صحیح کِیتی،
گُجھا کرن لگی ساڈا گھات مائی۔
شاہ محمدا، اجے نا جانِیو نے،
خالی پئی اے چوپڑی پرات مائی۔ ٥٤

دِتی مائی نے جدوں دلبری بھاری،
سنگھ بیٹھے نی ہوئے سُچیت میاں۔
سچے صاحب دے ہتھ نی سبھ گلاں،
کِسے ہار دیوے کِسے جیت میاں۔
اِک لکھ بیٹا سوا لکھ پوتا،
راوَن ماریا گھر دے بھیت میاں۔
شاہ محمدا، جاندا جگ سارا،
کئی سورمیں آؤن گے کھیت میاں۔ ٥٥

سِنگھاں ساریاں بَیٹھ گُرمتا کِیتا :

چلو جائے فرنگی نوں ماریے جی۔
اِک وار جے ساہمنے ہوئے ساڈے،
اِک گھڑی وِچ پار اُتاریئے جی۔
بھائی وِیر سنگھ جیہے اساں نہیں چھڈے،
اساں کدی نا اوس توں ہاریئے جی۔
شاہ محمدا، مار کے لدھیانہ،
فوجاں دِلی دے وِچ اُتاریئے جی۔ ٥٦

ضبط کراں گے مال فرنگیاں دے،
اوتھوں لیاواں گے دولتاں بوریاں نی۔
پِچھوں وڑاں گے اُنہاں دے ستر خانے،
بنھ لیاواں گے اُنہاں دِیاں گوریاں نی۔
کابل وِچ پٹھان جیوں علی اکبر،
مار وڈھ کے کِیتِیاں پوریاں نی۔
شاہ محمدا، لواں گے پھیر کنٹھے،
تِلے دار جو ریشمی ڈوریاں نی۔ ٥٧

جھنڈے نِکلے کُوچ دا حُکم ہویا،
چڑھے سورمے سنگھ دلیر میاں۔
چڑھے پُت سرداراں دے چھَیل بانکے،
جَیسے بیلِیوں نِکلدے شیر میاں۔
چڑھے سبھ مجھَیل، دُوآبیئے جی،
جِنہاں قلعے نِوائے نی ڈھیر میاں۔
شاہ محمدا، چڑھے جمہورخانے،
ہویا حُکم نا لاؤندے دیر میاں۔ ٥٨

شام سنگھ سردار نے کُوچ کِیتا،
جلے والیئے بنت بناؤندے نی۔
آئے ہور پہاڑ دے سبھ راجے،
جہڑے تیغ دے دھنی کہاؤندے نی۔
آئے سبھ مجھَیل دُوآبیئے جی،
سندھانوالیئے کاٹھیاں پاؤندے نی۔
شاہ محمدا، چڑھی اَکال رجمنٹ،
کھنڈے سار دے صقل کراؤندے نی۔ ٥٩

مظہر علی تے ماگھے خاں کُوچ کِیتا،
توپاں شہر تھیں باہر نِکالیاں نی۔
بیڑا چڑھیا سُلطان محمود والا،
توپاں نال اِمام شاہ والِیاں نی۔
الہٰی بخش پٹولی نے مانج کے جی،
دھوپ دیئے کے تخت بہالیاں نی۔
شاہ محمدا، ایسیاں لِشک آئیاں،
بِجلی وانگ جو دین وِکھالیاں نی۔ ٦٠

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels